Te maitai rahi o te haapiiraa a te Atua
Te maitai rahi o te haapiiraa a te Atua
“Oia mau ïa e mea faufaa ore atoa te mau mea atoa nei ia ˈu, i te maitai rahi ra i te ite i te Mesia.”—PHIL. 3:8.
1, 2. Eaha ta vetahi mau Kerisetiano i faaoti, e no te aha?
MAI to ˈna nainairaa, e piahi maramarama o Robert. E vau noa matahiti to ˈna i te haereraa mai te orometua i to ˈna fare e parau ia ˈna e e nehenehe oia e rave i te mau mea atoa. Ua faaite oia e e nehenehe o ˈna e riro ei taote. Maoti ta ˈna parau tuite tuarua nota maitai roa, e nehenehe o ˈna e ô i te mau haapiiraa tuatoru maitai roa i to ˈna fenua. Ua faaoti râ Robert eiaha e farii i teie fanaˈoraa hoê roa ia au i te manaˈo o te rahiraa no te rave i te taviniraa pionie tamau.
2 E toroa teitei i roto i teie nei ao tei mua i te Kerisetiano paari e apî e rave rahi mai ia Robert. No te tapi i te mau fa pae varua, aita vetahi i maiti i te faaohipa hope roa i teie mau toroa. (Kor. 1, 7:29-31) Eaha te turai i te mau Kerisetiano mai ia Robert ia haa rahi i roto i te pororaa? Na mua roa, no to ratou ïa here ia Iehova, e no to ratou atoa haafaufaaraa i te maitai rahi o te haapiiraa a te Atua. Ua manaˈo aˈenei oe mai te aha te huru o to oe oraraa ahiri aita oe i ite i te parau mau? Ia feruri tatou i te tahi mau haamaitairaa faahiahia ta tatou e fanaˈo ra no te mea ua haapiihia tatou e Iehova, e haafaufaa noa ïa tatou i te evanelia ta tatou e poro ra ma te itoito rahi ia vetahi ê.
E fanaˈoraa rahi ia haapiihia tatou e te Atua
3. No te aha tatou e papu ai e e hinaaro Iehova e haapii i te taata tia ore?
3 No to ˈna maitai e hinaaro ai Iehova e haapii i te taata tia ore. No te mau Kerisetiano faatavaihia, te tohu ra te Isaia 54:13: “E te mau tamarii atoa na oe ra, e haapiihia ïa e Iehova, e e hau rahi to te mau tamarii na oe ra.” E tano atoa teie mau parau no te mau “mamoe ê atu” a te Mesia. (Ioa. 10:16) Mea maramarama te reira i roto i te hoê parau tohu e tupu ra i to tatou tau. Ua ite orama Isaia i te tairururaa mai te mau taata o te mau nunaa atoa i te haamoriraa mau. Te faataa ra oia ia ratou i te parauraa te tahi i te tahi: “E haere tatou i nia i te mouˈa o Iehova, i te fare o te Atua o Iakoba; e na ˈna e haapii mai i ta ˈna haapaoraa, e haere tatou na te eˈa ta ˈna e faaite maira.” (Isa. 2:1-3) E fanaˈoraa rahi mau ia haapiihia tatou e te Atua!
4. Eaha ta Iehova e titau ra i te feia ta ˈna e haapii ra?
4 Eaha te titauhia ia haapiihia tatou e Iehova? Te hoê titauraa rahi, ia haehaa e ia farii te hoê taata ia haapiihia oia. Ua papai te fatu salamo Davida: “Maitai to Iehova e te piˈo ore . . . E haapii mai oia i te feia aau mǎrû i to ˈna iho eˈa.” (Sal. 25:8, 9) Ua parau Iesu: “E haamaitai au ia oe, e tau Metua, e te Fatu o te raˈi e te fenua, i te mea, huna ê noâ oe i teie nei mau parau i te feia paari e te ite ra, ua faaite mai oe i te tamarii nei.” (Luka 10:21) E hinaaro iho â tatou e haafatata ˈtu i te hoê Atua o te “horoa maira i te maitai no tei haehaa.”—Pet. 1, 5:5.
5. Mea nafea to tatou iteraa i te Atua?
5 Ei tavini a Iehova, no to tatou iho ite aore ra paari anei i haapii ai tatou i te parau mau? Eita. Eita roa ˈtu tatou e ite i te Atua na nia noa i to tatou iho manaˈo. Ua parau Iesu: “E ore roa te taata e tae mai ia ˈu nei, maori râ ia faatae mai te Metua o tei tono mai ia ˈu nei ia ˈna.” (Ioa. 6:44) Te faatae maira Iehova i te mau taata e au i te mamoe, “tei hinaarohia [no] te mau fenua atoa,” na roto i te pororaa e te varua moˈa. (Hag. 2:7) Te mauruuru mau ra oe i to Iehova faataeraa mai ia oe i ta ˈna Tamaiti, e ere anei?—A taio i te Ieremia 9:23, 24.
Te maitairaa mai te oraraa o te taata
6. Ia noaa i te taata “te ite ia Iehova,” eaha ïa te tauiraa faahiahia e itehia?
6 Ma te rave i te hoê faahohoˈaraa, te faataa ra te parau tohu a Isaia i te tauiraa te huru o te taata i to tatou tau. Ua riro te taata haavî uˈana ei taata faatupu i te hau. (A taio i te Isaia 11:6-9.) Ua haapii te mau taata tei au ore roa te tahi i te tahi no to ratou iri, nunaa, opu, aore ra taˈere ê, i te faaea hau noa. Ei auraa parau, ua “tiapai ratou i ta ratou ˈoˈe ei auri arote.” (Isa. 2:4) Eaha te tumu o teie mau tauiraa faahiahia? Ua noaa ia ratou “te ite ia Iehova” ta ratou i faaohipa i roto i to ratou oraraa. Noa ˈtu e mea tia ore te mau tavini a te Atua, e fetii taeae mau ratou i te ao nei. Te haapapu ra te auraa te rahiraa i te parau apî maitai e te hotu maitai o te reira, i te maitai rahi o te haapiiraa a te Atua.—Mat. 11:19.
7, 8. (a) E tauturu te haapiiraa a te Atua i te taata ia huri i teihea mau “pare” i raro? (b) Eaha te faaite ra e e arue ta te Atua haapiiraa ia ˈna?
7 Ua faaau te aposetolo Paulo i te pororaa a te mau tavini a te Atua i te hoê tamaˈi pae varua. Ua papai oia: “E ere . . . ta matou nei mauhaa tamaˈi i ta te tino, e mauhaa puai rahi râ i te Atua, i te huriraa i te mau pare i raro. I te huriraa ˈtu i te feruri teoteo ra i raro, e te mau mea teitei atoa tei faateitei ia ore ia noaa te ite i te Atua.” (Kor. 2, 10:4, 5) E faatiamâ te haapiiraa a te Atua i te taata i teihea mau “pare”? Te mau haapiiraa hape, te mau ohipa manamana, te mau philosophia a te taata, e te vai ra ˈtu â, o te faateimaha. (Kol. 2:8) E tauturu te haapiiraa a te Atua i te taata ia haavî i te mau peu iino e ia faatupu i te mau huru maitatai ta te Atua e au. (Kor. 1, 6:9-11) E maitai te oraraa o te utuafare e e noaa i te feia aita e tiaturiraa to ratou te hoê fa mau. Teie te huru haapiiraa e hinaaro-mau-hia i teie mahana.
8 O te haapao maitai, aore ra haerea tia, te hoê huru maitai ta Iehova e tauturu i te taata ia faatupu, mai tei faatiahia ˈtu i muri nei. (Heb. 13:18) Ua farii te hoê vahine i Initia i te haapii i te Bibilia e i muri aˈe ua riro mai oia ei taata poro bapetizo-ore-hia. I te hoê mahana, i to ˈna hoˈiraa i te fare na te paturaa mai i te hoê Piha a te Basileia, ua ite oia i raro i pihai iho i te hoê tapearaa pereoo uta i te hoê fifi piru moni rahi. Noa ˈtu e e vahine veve oia, ua horoa oia i te fifi i te mutoi ia imi i te fatu. Ua maere roa te mutoi! I muri iho, ua ui te tahi atu mutoi ia ˈna, “Eaha oe i faahoˈi mai ai i teie fifi?” Ua faataa oia, “I to ˈu haapiiraa i te Bibilia, ua taui au, e vahine haerea maitai ïa vau i teie nei.” Ma te faahiahia, ua parau oia i te matahiapo Kerisetiano tei apee ia ˈna i te fare mutoi: “Ua hau atu i te 38 mirioni taata i teie hau o te fenua Initia. Mai te peu e e nehenehe outou e tauturu hoê ahuru taata ia riro mai teie vahine, aita ˈtu ai ïa.” Ia manaˈo tatou i te mau mirioni taata ua maitai mai to ratou oraraa maoti te haapiiraa a te Atua, mea rahi ïa te tumu no te arue ia Iehova, e ere anei?
9. E nafea te taata e taui roa ˈi i to ratou oraraa?
9 E nehenehe te taata e taui roa i to ratou oraraa maoti te puai o te Parau a te Atua e te tauturu a te varua moˈa ta Iehova e horoa mai. (Roma 12:2; Gal. 5:22, 23) Te na ô ra te Kolosa 3:10: “Ua faa-taata-apî [outou], o tei faahouhia i te ite ra, mai te huru atoa o tei hamani ia ˈna.” E puai to te poroi i roto i te Parau a te Atua, te Bibilia, e faaite i te huru mau o roto o te hoê taata. E nehenehe te reira e taui i to ˈna huru feruriraa e huru aau. (A taio i te Hebera 4:12. a) E riro te hoê taata ei hoa no te Atua, ma te tiaturi e ora e a muri noa ˈtu, ia noaa ia ˈna te ite mau i te mau Papai e ia faaau oia i to ˈna oraraa i nia i te mau ture aveia tia a Iehova.
Faaineineraa no a muri aˈe
10. (a) No te aha o Iehova anaˈe te nehenehe e tauturu ia tatou ia ineine no a muri aˈe? (b) Eaha te mau tauiraa rahi e fatata i te tupu i nia i te fenua taatoa?
10 O Iehova anaˈe te nehenehe e tauturu ia tatou ia ineine no a muri aˈe, no te mea ua ite oia eaha to mua. Ua ite oia i te oraraa a muri aˈe o te huitaata. (Isa. 46:9, 10) Te faaite ra te parau tohu bibilia e “ua fatata te mahana rahi o Iehova.” (Zeph. 1:14) No nia i taua mahana ra, e tupu iho â te Maseli 11:4: “Aita e faufaa to te taoˈa i te mahana e tupu ai te riri ra; area te parau-tia ra, e ora ïa i te reira e ore e pohe.” Ia haava Iehova i te ao a Satani, o ta ˈNa farii maitai te mea faufaa roa ˈˈe, eiaha râ te moni. Te na ô ra hoi te Ezekiela 7:19: “E faarue ratou i ta ratou ario i roto i te aroâ, e riro hoi ta ratou auro mai te mea viivii ra.” E nehenehe teie ite atea e tauturu ia tatou ia ohipa ma te paari i teie nei.
11. Eaha te hoê ravea e faaineine ai te haapiiraa a te Atua ia tatou no a muri aˈe?
11 Te hoê ravea taa maitai e faaineine ai te haapiiraa a te Atua ia tatou no te taeraa mai o te mahana o Iehova, o te tautururaa ïa ia tatou ia haamau i te mau fa matamua maitai. Ua papai te aposetolo Paulo ia Timoteo: “E aˈo atu i te feia taoˈa rahi i teie nei ao, eiaha ei aau teitei, eiaha hoi e tiaturi i te taoˈa rahi itea ore, ei te Atua ora râ.” Noa ˈtu e e ere tatou i te mea ona, e maitai tatou i teie aˈoraa a Iehova. Eaha ïa te auraa? Eiaha tatou e haapue i te taoˈa materia, e tutava râ tatou i te “hamani maitai” e te ‘taoˈahia i te ohipa maitatai.’ Ma te tuu i te taviniraa a Iehova na mua roa i roto i to tatou oraraa, e ‘haapue maite ïa tatou i te maitai tumu no tatou iho a muri atu.’ (Tim. 1, 6:17-19) Te faaite ra teie huru haapaeraa i te paari e au, ua parau hoi Iesu, “eaha ta te taata faufaa i noaa, ia noaa ia ˈna te taoˈa atoa o teie nei ao, ia ere oia i te ora?” (Mat. 16:26, 27) I te mea e te fatata maira te mahana o Iehova, ia uiui taitahi ïa tatou: ‘Te haapue nei au i te taoˈa ihea? O vai ta ˈu e tavini nei, te Atua anei aore ra te taoˈa rahi?’—Mat. 6:19, 20, 24.
12. No te aha eiaha ˈi tatou e toaruaru ia hiˈo ino mai vetahi i ta tatou taviniraa?
12 Te mea faufaa roa ˈˈe o te mau “ohipa maitatai” faataahia i roto i te Parau a te Atua no te mau Kerisetiano, o te faaoraraa ïa i te taata na roto i te pororaa i te Basileia e te faariroraa ia ratou ei pǐpǐ. (Mat. 24:14; 28:19, 20) Mai i te senekele matamua, e hiˈo ino mai vetahi i ta tatou taviniraa. (A taio i te Korinetia 1, 1:18-21.) Eita râ te reira e taui i te faufaa o ta tatou poroi e e faaiti mai i te faufaaraa ia tauturu i te taata atoa ia tiaturi i te reira i teie â taime. (Roma 10:13, 14) A tauturu ai tatou ia vetahi ê ia fanaˈo i te haapiiraa a te Atua, e haamaitai-rahi-hia tatou.
Haamaitaihia no te raveraa i te mau haapaeraa
13. Eaha te mau haapaeraa ta te aposetolo Paulo i rave no te evanelia?
13 Hou to ˈna riroraa ei Kerisetiano, ua haapiihia te aposetolo Paulo ia noaa ia ˈna te hoê tiaraa teitei i rotopu i te mau ati Iuda. Ua fatata 13 matahiti to ˈna a faarue ai oia i to ˈna oire tumu o Tareso ia haapiihia o ˈna e Gamaliela te haapii Ture faatura-rahi-hia i Ierusalema. (Ohi. 22:3) I muri aˈe, o Paulo te taata maramarama roa i rotopu i te mau taata o to ˈna ra tau, e ahiri oia i tamau noa mai tera, o ˈna paha ïa te taata rahi i roto i te haapaoraa ati Iuda. (Gal. 1:13, 14) I to ˈna fariiraa i te evanelia, ua ineine oia i te haapae i te mau mea atoa. Ua tatarahapa anei Paulo i ta ˈna maitiraa? Aita. Ua papai hoi oia: “Oia mau ïa e mea faufaa ore atoa te mau mea atoa nei ia ˈu, i te maitai rahi ra i te ite i te Mesia i tau Fatu ra ia Iesu: e faarue ai au i te mau mea atoa ra, e e aua [aore ra pehu] ïa ia ˈu.”—Phil. 3:8.
14, 15. Eaha ta tatou haamaitairaa ei ‘hoa rave ohipa no te Atua’?
14 Te rave ra te mau Kerisetiano i teie mahana i te mau haapaeraa no te evanelia mai ia Paulo. (Mar. 10:29, 30) E ere anei tatou i te tahi mea no te na reiraraa? Hoê â manaˈo to Robert, tei faahitihia i te omuaraa, e to te rahiraa i to ˈna parauraa: “Aita roa ˈtu vau e tatarahapa ra. Ua oaoa e ua mauruuru vau i ta ˈu taviniraa taime taatoa, e mea na reira ïa vau i ‘tamata ˈi e i ite ai i te maitai o Iehova.’ Ua haapae anaˈe au i te pae materia no te tapi i te mau fa pae varua, ua haamaitai noa Iehova ia ˈu hau atu i ta ˈu i haapae. E au ra e aita vau i haapae i te tahi mea. Ua faufaa-noa-hia vau!”—Sal. 34:8; Mas. 10:22.
15 Mai te peu e te poro ra e te haapii ra oe maa taime i teie nei, ua tamata e ua ite iho â oe i te maitai o Iehova. Aita anei oe i ite i te tahi taime i te tauturu a te varua o te Atua a faaite ai oe i te evanelia? Aita anei oe i ite i te mata oaoa o te taata i to Iehova haamahorahoraraa i to ratou aau ia haapao ratou i te poroi? (Ohi. 16:14) Aita anei Iehova i tauturu ia oe ia upootia mai i nia i te mau fifi, a nehenehe ai oe e faaaano i ta oe taviniraa? Aita anei te Atua i paturu ia oe i te taime fifi, a nehenehe ai oe e tavini noa ia ˈna noa ˈtu e te paruparu ra oe? (Sal. 29:11) Ia ite tatou iho i te tauturu a Iehova i roto i ta tatou taviniraa, e papu atu â ia tatou e te vai mau ra oia e e piri atu â tatou ia ˈna. (Isa. 41:10) E haamaitairaa mau te riroraa ei ‘hoa rave ohipa no te Atua’ i roto i te haapiiraa faufaa rahi a te Atua, e ere anei?—Kor. 1, 3:9.
16. Eaha to outou manaˈo i ta outou mau tutavaraa e haapaeraa tei taaihia i te haapiiraa a te Atua?
16 Mea rahi te taata e manaˈo ra e rave i roto i to ratou oraraa i te tahi mea faufaa o te haamanaˈohia. Ua ite tatou e e moe pinepine te mau ohipa faahiahia a teie nei ao. Area te mau ohipa ta Iehova e faatupu nei no te faaraa i to ˈna iˈoa, e vai noa ïa i roto i te tuatapaparaa o to ˈna nunaa. E haamanaˈo-noa-hia te reira. (Mas. 10:7; Heb. 6:10) Ia haafaufaa ïa tatou i ta tatou fanaˈoraa e haapii ia vetahi ê no nia ia Iehova, te hoê hoi ohipa o te ore roa e haamoehia.
[Nota i raro i te api]
a Hebera 4:12: “E mea ora hoi te parau a te Atua, e te puai rahi, e te ooi rahi hoi to te reira i to te ˈoˈe mata piti ra, i te putapupû-roa-raa hoi e taa ê noa ˈtu te [“ora e te feruriraa,” MN], e te tiaatiraa e te puo ivi aa, e te hiˈopoa hoi i te manaˈo e te opua o te aau ra.”
Eaha ta outou e pahono?
• Eaha ta Iehova e titau ra i te feia ta ˈna e haapii ra?
• E nafea te haapiiraa a te Atua e haamaitai ai i te oraraa o te taata?
• E nafea tatou e haamaitaihia ˈi i te tautururaa ia vetahi ê ia fanaˈo i te haapiiraa a te Atua?
[Uiraa haapiiraa]
[Hohoˈa i te api 25]
E fetii taeae mau i te ao nei te feia e haapiihia ra e Iehova
[Hohoˈa i te api 26]
E haamaitairaa mau te riroraa ei ‘hoa rave ohipa no te Atua’