Mu xa noʼox albajuk sbalil li chanubtasel chakʼ Diose

«Muʼyuc xa stu chquil o scotol cʼusitic yan ta sventa ti laj xa quil ti jaʼ toj echʼem slequil cʼalal laj cotquin li Cristo Jesuse.» (FILI. 3:8)

1, 2. ¿Kʼusi la snop la spas jlom yajtsʼaklomtak Cristo, xchiʼuk kʼu yuʼun?

 TOJ lek onoʼox pʼij ta chanun chʼi tal li Robert. Kʼalal vaxakib toʼox jabil yichʼoje, bat vulaʼanatuk ta sna yuʼun smaestra xchiʼuk albat ti xuʼ la tsta skotol li kʼusi tskʼan ta xkuxlejale xchiʼuk albat xtok ti tskʼan la ti akʼo sta yabtel ta doktorale. Ti kʼalal lek xaʼox chex jchʼiel tale lekik tajek skalifikasion tslokʼes, jaʼ yuʼun xuʼ ox xbat jechuk ta chanun ta junuk lekil universidad ta slumal. Pe sventa xkʼot ta pasel li kʼusi oy onoʼox ta yoʼontone, jaʼ ti x-och ta prekursore, li kerem taje laj yikta li kʼusi ox tstae, ti jaʼ noʼox stuk chakʼ lekilal chil li yan krixchanoetike.

² Ep yajtsʼaklomtak Cristo kʼuchaʼal li Robert taje xuʼ ox oy kʼusitik ep tstaik ek li ta balumile, pe junantike laj yiktaik sventa oy kʼusitik tstaik ta steklumal Dios (1 Cor. 7:29-31). ¿Kʼu yuʼun jaʼ laj yakʼ ta xkuxlejalik xcholel mantal li yajtsʼaklomtak Cristo taje? Ti kʼusie jaʼ ti skʼanojik li Jeovae, pe jech xtok, yuʼun yakʼojik venta ti mu xa noʼox albajuk sbalil li chanubtasel chakʼ Diose. ¿Mi oy jaʼtik to ajakʼojbe aba kʼu van avelan jechuk ti muʼyukuk xa chan tal li mantale? Nopo avaʼi li kʼupilik sba bendisionetik jtaojtik ta skoj li chanubtasel yakʼojbutik Jeovae. Yuʼun me jaʼ ta jkʼuxubintik-o mas li lekil aʼyeje xchiʼuk ti masuk oy ta koʼontontik xcholel li mantale.

Jaʼ jun mukʼta lekilal ti chkichʼtik chanubtasel yuʼun Jeovae

3. ¿Kʼuxi jnaʼojtik ti oy ta yoʼonton chchanubtas jpas mulil krixchanoetik li Jeovae?

³ Ta slekil yoʼonton tskʼan chchanubtas jpas mulil krixchanoetik li Jeovae. Xi chal li Isaías 54:13 ta sventa li tʼujbil yajtsʼaklomtak Cristoe: «Vuʼun ta jchanubtas jtuc li avalab anichʼnabe; lec chbatic, jun yoʼnton chcom scotolic». Taje te kapal skʼoplal ek li yan xchijtak Cristoe (Juan 10:16). ¿Kʼuxi jnaʼojtik? Jaʼ chal kaʼitik jun albil kʼop ti yakal chkʼot ta pasel ta jkʼakʼaliltike. Oy kʼusi akʼbat yil yuʼun Dios li Isaiase, te laj yil epal krixchanoetik ta skotol lumetik ti chtal yichʼik ta mukʼ Jeovae. Jech kʼuchaʼal chal albil kʼope, xi la chalbe sbaik ta jujuntale: «Laʼic, muycutic batel ta vits yuʼun li Mucʼul Diose; muycutic batel ta sna li Dios yuʼun Jacobe, yuʼun jaʼ te chijyacʼbutic quiltic li beetic yuʼune, jech chlic xanovcutic ta bicʼtal be yuʼun» (Isa. 2:1-3). Jaʼ jech, chichʼik chanubtasel yuʼun Jeova. ¡Jaʼ jun mukʼta lekilal!

4. ¿Kʼusi skʼan jpastik sventa xkichʼtik chanubtasel yuʼun li Jeovae?

⁴ ¿Kʼusi skʼan jpastik sventa xkichʼtik chanubtasel yuʼun li Diose? Jun ti kʼusi toj tsots skʼoplale jaʼ ti manxoukutike xchiʼuk ti xkakʼ jbatik ta chanubtasele. Xi la stsʼiba li jtsʼibajom yuʼun Salmoe: «Li Mucʼul Diose toj lec, toj tucʼ; [...] jaʼ chchanubtas ta spasel cʼusi tucʼ li bochʼo mu cʼusi snaʼique», jaʼ xkaltik, li buchʼu manxoike (Sal. 25:8, 9). Xi laj yal li Jesús eke: «Tati, voʼot Yajvalot li vinajel banamile, colaval ti muc xavacʼbe yaʼyic smelol li bochʼotic bijique, xchiʼuc li bochʼotic lec snaʼ yalojique. Jaʼ laj avacʼbe yaʼyic smelol li bochʼotic muʼyuc stu ch-ilatique» (Luc. 10:21). ¿Mi mu jechuk ti mu vokoluk chkaʼitik ta skʼanel jun Dios ti «chcʼuxubin» «li bochʼo biqʼuit chacʼ sbaique»? (1 Ped. 5:5.)

5. ¿Kʼuxi ti laj kojtikintik Diose?

⁵ ¿Mi xuʼ van xkaltik ti ta kipal xchiʼuk ta jpʼijil noʼox jtuktik laj kojtikintik li mantale xchiʼuk  ti skʼan te xi jxanav-o batele? Moʼoj; mu ta kipaltikuk noʼox jtuktik laj kojtikintik li Diose. Xi laj yal li Jesuse: «Muʼyuc bochʼo xuʼ yuʼun ta xtal ta jtojol me muc icʼbiluc tal yuʼun li Jtot ti la stacun tale» (Juan 6:44). Jaʼ jech, li Jeovae jaʼ chikʼ tal li skʼulejalik jujun balumile, jaʼ xkaltik, li manxo krixchanoetik kʼuchaʼal chijetike. Taje jaʼo te chikʼ talel kʼalal chichʼ cholel li lekil aʼyeje xchiʼuk li ta xchʼul espiritue (Hageo 2:7). ¿Mi mu tauk xa toj ta vokol yaʼel ta skoj ti laj yikʼot tal Jeova ta stojolal xNichʼone? (Kʼelo Jeremías 9:23, 24.)

Xuʼ tslekubtasbe xkuxlejal krixchanoetik

6. ¿Kʼusi toj lek chkʼot ta pasel yuʼun ta stojolal krixchanoetik li «yotquinel Mucʼul Dios[e]»?

⁶ Ta jun loʼil ti oy kʼusi slokʼol chtal ta sjol li buchʼu tskʼele, li albil kʼopetik yuʼun Isaiase alakʼ sba chalbe skʼoplal ti kʼuyelan yakal chjel xkuxlejal krixchanoetik avie. Ep krixchanoetik ti jsaʼ kʼopetik toʼoxe manxoik xa (kʼelo Isaías 11:6-9). Jlom ti tskontrain toʼox sbaik ta skoj ti jelel stsʼunbalike, snitilulalik, stalel xkuxlejal xchiʼuk slumalike laj xa xchan ti jun yoʼonton chkuxiike. «Jech chlic scʼatajesic ta locub banamil li yespadai[k]» xkaltik ta sventa li mantale (Isa. 2:4). ¿Kʼu yuʼun ti vaʼ yelan toj labal sba chjel stalelalike? Jaʼ ti «[chojtikinik] Mucʼul Dios» li krixchanoetike xchiʼuk ti chakʼ ta xkuxlejalik li kʼusi chchanike. Akʼo mi jpas mulil krixchanoetik li yajtuneltak Diose, ta batsʼi melel jaʼ yermano sbaik ta spʼejel Balumil. Li kʼupil sba lekil aʼyej xchiʼuk li kʼusi toj lek chkʼot ta pasel yuʼune jaʼ chakʼ ta ilel ti mu xa noʼox albajuk sbalil li chanubtasel chakʼ Diose (Mat. 11:19).

7, 8. 1) ¿Kʼusitik ti chichʼ lilinel xchiʼuk chichʼ lajesbel skʼoplal ta sventa li chanubtasel chakʼ Diose? 2) ¿Kʼusi svinajeb ti tskʼupil kʼopta Jeova li chanubtasel chakʼ Diose?

⁷ Li jtakbol Pabloe la skoʼoltas ta jun pas kʼop ta sventa mantal li abtelal tspas yajtuneltak Diose. Xi la stsʼibae: «Li cabtejebcutic sventa ta jpascutic o cʼope maʼuc sventa cristiano; jaʼ ta sventa svuʼel li Diose. Yuʼun jech xuʼ ta jlilincutic, ta jlajesbecutic scʼoplal sbijilic, srazonic li bochʼotic bij scuyoj sbaique. Jech muʼyuc stu chcom o li cʼusi chapal yuʼunique xchiʼuc li stoyobbailic ti jaʼ tsmac ta be yotquinel li Diose» (2 Cor. 10:4, 5). ¿Kʼusitik ti chichʼ lilinel xchiʼuk chichʼ lajesbel skʼoplal ta sventa li chanubtasel chakʼ Diose? Ti xkaltik uni jayibuke, jaʼ li loʼlaeletik ta relijione, li kʼusitik chʼunbil ta sventa li labtael o metsʼtaele xchiʼuk li spʼijil krixchanoetik ti chakʼik ta chanele (Col. 2:8). Li chanubtasel chakʼ Jeovae skoltaoj krixchanoetik ta yiktael li mulil tspasike xchiʼuk ti akʼo jechuk stalelalik ti kʼuyelan kʼupil sba chil Jeovae (1 Cor. 6:9-11). Chlekub xkuxlejal ta yutsʼ yalalik xtok xchiʼuk mas ch-ayan sbalil li xkuxlejalike. Taje jaʼ li chanubtasel ti chtun tajek li avie.

⁸ Jun li talelaletik ti tskoltautik Jeova ti oyuk kuʼuntike jaʼ ti muʼyuk kʼusi chopol ta jpastike, jech kʼuchaʼal chakʼ kiltik li kʼusi la snuptan jun antse (Heb. 13:18). Li ta Indiae lik xchan Vivlia jun ants, vaʼun kʼot ta jcholmantal ta tsʼakal ti muʼyuk bu yichʼoj voʼe. Pe oy jun veltae, kʼalal tsut xa tal ta sna ti ay ta abtel ta svaʼanel Salon sventa Tsobobbaile, te kilil la sta jlik kadena natsʼil ti pasbil ta kʼanal takʼin ti bu tsmala karoe. Akʼo mi abol sba li antse xchiʼuk ti te van 10,500 stojol li kadenae, bat sutes ta stojolal polisia xchiʼuk laj yalbe jun mol ta tsobobbail ti akʼo xbat chiʼinatuke. Li polisia ti la stsak sutele labal to laj yaʼi. Ta mas tsʼakale jakʼbat yuʼun yan polisia ti kʼu yuʼun la sutes kadena li ants taje, xi la stakʼe: «Yuʼun sjeloj xa jkuxlejal li chanubtasel chakʼ Vivliae. Jaʼ yuʼun li avie muʼyuk xa kʼusi chopol ta jpas». Labal to laj yaʼi li polisiae, vaʼun xi laj yalbe li mol ta tsobobbaile: «Li ta lum liʼe oy 38 miyon jnaklejetik. Ti xuʼuk avuʼun ti akʼo jechuk stalelal lajunvoʼuk krixchanoetik kʼuchaʼal li ants liʼe, toj yan xa noʼox sba yutsil ti jechuke». Ta smiyonal noʼox krixchanoetik slekubtasojbe xkuxlejal ta spʼejel Balumil li chanubtasel chakʼ Diose. ¿Mi mu jaʼuk jun smukʼta rasonal sventa jmuyubtatik-o Jeova taje?

9. ¿Kʼu yuʼun xuʼ xjel li kʼusi tsʼunul lek ta yoʼonton krixchanoetik kʼalal chchan li mantale?

⁹ Li sjuʼel ta sjelel kuxlejal li Vivliae xchiʼuk li  koltael chakʼ Jeova ta xchʼul espiritue, chakʼ akʼo xjel li kʼusi tsʼunul lek ta yoʼonton krixchanoetike (Rom. 12:2; Gál. 5:22, 23). Xi chalbutik mantal li Colosenses 3:10: «Jaʼ xa xalapic o batel li achʼ atalelique, yuʼun jech yantic chalecubic batel. Jech coʼol chacʼot achiʼuquic li Bochʼo la spasutique». Li mantal ta sKʼop Diose oy sjuʼel sventa tslokʼes ta sakil osil li kʼusi oy ta yoʼonton jun krixchanoe, tsjelbe li snopbene xchiʼuk li kʼusi oy ta yoʼontone (kʼelo Hebreos 4:12). Jech xtok, kʼalal chlik yojtikin lek kʼusi chal Vivlia li jun krixchanoe xchiʼuk ti chlik xchʼunbe li stukʼil mantaltak Diose, xuʼ me xamigoin xchiʼuk ti xlik spat yoʼonton sventa chkuxi sbatel osile.

Chkichʼtik chanubtasel ta sventa li kʼusi chtale

10. 1) ¿Kʼu yuʼun jaʼ Jeova ti buchʼu mas lek xuʼ xchanubtasutik ta sventa li kʼusi chtale? 2) ¿Kʼusitik ti tsots skʼoplal poʼot xa xkʼot ta pasel ta spʼejel Balumile?

¹⁰ Jaʼ Jeova ti buchʼu mas lek xuʼ xchanubtasutik ta sventa li kʼusi chtale, yuʼun snaʼoj li kʼusi poʼot xa xkʼot ta pasele. Jaʼ yaloj li kʼusi chkʼot ta pasel ta stojolal krixchanoetike (Isa. 46:9, 10). Li Vivliae chal ti «nopol xa scʼan sta li smucʼta cʼacʼalil Mucʼul Diose» (Sof. 1:14). Vaʼun jaʼo te chkʼot ta pasel li kʼusi chal Proverbios 11:4: «Li cʼulejalile muʼyuc cʼusi chtun o ti cʼalal yorail chichʼ chapanel scotol cristianoe; yan li stuqʼuil coʼntontique jaʼ chiscoltautic ta chamel ta lajel». Yuʼun kʼalal mi kʼot skʼakʼalil chchapanat yuʼun Dios li slumal Satanase, jaʼ me mas tsots skʼoplal ti kʼuyelan xkil jbatik xchiʼuk Diose. Mu me kʼusi xtun-o chkʼot li takʼine, yuʼun jech kʼuchaʼal chal Ezequiel 7:19, «ta sjipic ta xoraltic li saquil taqʼuin oy yuʼunique; muʼyuc stu chcom o li scʼanal taqʼuinique». Kʼalal jnaʼojtik taje jaʼ me tskoltautik ti akʼo lekuk kʼusi jnop jpastik li avie.

11. Alo jtosuk ti kʼuxi chchapanutik li chanubtasel chakʼ Dios ta sventa li skʼakʼalil Jeovae.

¹¹ Jtos ti kʼuxi chchapanutik li chanubtasel chakʼ Dios ta sventa li skʼakʼalil Jeovae jaʼ ti tskoltautik ta snopel lek li kʼusi baʼyel skʼan xkakʼ ta jkuxlejaltike. Xi laj yalbe Timoteo li jtakbol Pabloe: «Li jcʼulejetic liʼ ta banamile, albo mantal ti mu me stoy sbaique, ti mu me jaʼuc spat yoʼnton yuʼun li scʼulejalique. Yuʼun li cʼulejalile ta xlaj scʼoplal. Jaʼ acʼo spat yoʼntonic ta stojol li Diose». Xuʼ me xtun lek kuʼuntik li kʼusi laj yakʼ ta naʼel Dios liʼe, akʼo mi maʼuk jkʼulejutik. Ti kʼalal jaʼ ta jpat koʼontontik ta stojolal Diose, ti maʼuk ta stojolal kʼulejale, jaʼ me skʼan xal ti «acʼo [jpastik] cʼusitic leque, acʼo jaʼuc [jkʼulejaltik] ti lec cʼusitic [ta jpastike]», ti maʼuk jsaʼtik batel li kʼusitik ta jkʼan oyuk kuʼuntike. Mi jaʼ baʼyel ta jpastik batel li kʼusitik sventa mantale, ta me jtsob batel li jkʼulejaltik ta jtatik ta tsʼakale (1 Tim. 6:17-19). Ti vaʼ yelan ta jpastike jaʼ me chakʼ ta ilel ti pʼijutike, yuʼun jech kʼuchaʼal laj yal Jesuse, «¿cʼusi chlocʼ o yuʼun jun cristiano me jaʼ chuʼunin scotol cʼusitic oy liʼ ta banamil, me jaʼ chchʼay li xcuxlejale?» (Mat. 16:26, 27). Ta skoj ti toj nopol xa skʼan li skʼakʼalil Jeovae, skʼan me xi jakʼbe  jbatik ta jujuntale: «¿Bu yakal ta jtsob li jkʼulejale? ¿Mi jaʼ smosoun li Diose o mi jaʼ li kʼulejale?» (Mat. 6:19, 20, 24).

12. ¿Kʼu yuʼun mu stakʼ xchibaj koʼontontik mi oy buchʼu tslaban li kabteltik ta stojolal Diose?

¹² Jtos «ti lec cʼusitic» skʼan jpastik li yajtsʼaklomutik Cristo ti jaʼ baʼyel skʼan xkakʼ ta jkuxlejaltike, jaʼ li xcholbel skʼoplal Ajvalilal yuʼun Diose xchiʼuk li spasel ta yajtsʼaklom Cristo li krixchanoetik jech kʼuchaʼal chal Vivlia ti akʼo jech jpastike (Mat. 24:14; 28:19, 20). Akʼo mi jech, jech kʼuchaʼal kʼot ta pasel ta baʼyel sigloe oy buchʼutik tslabanik li kabteltik ta stojolal Diose (1 Cor. 1:18-21). Pe taje muʼyuk bu tsyalesbe sbalil li aʼyej ta jcholtike mi jaʼuk tsjutukajesbe skʼoplal li kabtel kichʼojtik sventa chkalbetik yaʼi krixchanoetik ti akʼo xchʼamik li lekil aʼyej ti kʼalal jaʼ to yoraile (Rom. 10:13, 14). Jech xtok, mi ta jkolta li jchiʼiltaktik ti akʼo stabeik sbalil li chanubtasel chakʼ Diose ep me ta jtatik bendision ek.

Chakʼbutik bendision Jeova kʼalal ta jtsʼik jvokoltike

13. ¿Kʼusi la sten komel jtakbol Pablo ta skoj li lekil aʼyeje?

¹³ Ta skeremal onoʼox laj yichʼ chanubtasel li jtakbol Pablo sventa xkuch lek echʼel yuʼun li ta stojolal judioetike. Mu toʼox bu lokʼem ta oxlajuneb jabil kʼalal la skomtsan li Tarso ti jaʼ te vokʼe, yoʼ xbat ta Jerusalén xchiʼuk ti xchanubtase yuʼun Gamaliele, jun ojtikinbil jchanubtasvanej ta Mantal (Hech. 22:3). Kuch tajek yuʼun li Pabloe, jaʼ yuʼun toj mukʼ van yabtel la sta jechuk ta stojolal judioetik ti muʼyukuk laj yikta sba ti kʼuyelan chichʼ chanubtasele (Gál. 1:13, 14). Pe laj yikta stekel kʼalal la xchʼam li lekil aʼyeje xchiʼuk ti kʼalal lik abtejuk ta stojolal Diose. ¿Mi chopol van laj yaʼi ti kʼusi la spase? Muʼyuk. Yuʼun xi la stsʼibae: «Muʼyuc xa stu chquil o scotol cʼusitic yan ta sventa ti laj xa quil ti jaʼ toj echʼem slequil cʼalal laj cotquin li Cristo Jesuse, jaʼ li Cajvale. Ta sventa ti jaʼ xa jcʼanoj o li Cristoe, jech la jip o comel scotol li cʼusitic jchʼunoj toʼoxe. Jaʼ xa jech chquil jech chac cʼu chaʼal cʼaʼep» (Fili. 3:8).

14, 15. ¿Kʼusi bendisional ta jtatik ti «ta jchiʼin[tik] ta abtel li Diose»?

¹⁴ Jaʼ jech ta jpastik kʼuchaʼal li jtakbol Pabloe, yuʼun oy kʼusitik jtenojtik komel ta skoj li lekil aʼyeje (Mar. 10:29, 30). Veno, pe ¿mi oy van kʼusi chʼabal kuʼuntik ta skoj taje? Jkʼeltik avil kʼusi chal Robert ti laj kalbetik skʼoplal ta slikebe, yuʼun li kʼusi chale jaʼ svinajeb li kʼusi tsnop ep ermanoetike: «Muʼyuk bu ta jsutes koʼonton ta jyalel. Yuʼun solel xi jmuyubaj noʼox xchiʼuk jun noʼox koʼonton yuʼun li chol mantal ta tsʼakal orae. Jaʼ kiloj-o, jaʼ jpasoj-o preva ti toj lek li  Jeovae. Kʼalal oy kʼusi ta jten komel sventa jta li kʼusi ta jkʼan ta mantale chakʼbun sbendision li Jeovae, mas to ep kʼusi chakʼbun jaʼ jutuk li kʼusi chkiktae. Muʼyuk kʼusi ta jten komel yilel, yuʼun mas to ep kʼusi ta jta» (Sal. 34:8; Pro. 10:22).

¹⁵ Mi oy xa kʼuk sjalil ti yakal cha chol mantale xchiʼuk ti cha chanubtasvane, ta batsʼi melel aviloj van ti toj lek yoʼonton li Jeovae. ¿Mi oy aviloj junuk velta kʼuyelan la skoltaot li chʼul espiritu kʼalal cha chol li lekil aʼyeje? ¿Mi oy aviloj kʼuyelan xmuyubaj noʼox sat li krixchanoetik kʼalal chjambat yoʼontonik yuʼun Jeova sventa xaʼiik li mantale? (Hech. 16:14.) ¿Mi oy skoltaojot Jeova sventa stsal avuʼun li kʼusi tsmakot sventa xavakʼ sjunul akuxlejal ta spasbel li yabtele? ¿Mi oy avaʼioj ti tskoltaot ti kʼalal oy tajek avokole xchiʼuk ti laj yakʼbot avipal sventa mu xa lubtsaj ti kʼalal mu xa xuʼ tajek chavaʼie? (2 Tim. 4:17.) Kʼalal chkiltik ti tskoltautik Jeova li ta kabteltik ta stojolale, mas me kuxul chkaʼitik xchiʼuk mas me chi jnopaj ta stojolal (Isa. 41:10). ¿Mi mu toj lekuk ti «ta jchiʼin[tik] ta abtel [Dios]» ta spasel li abtelal ti toj tsots skʼoplal ti jaʼ li chanubtasel ta Vivliae? (1 Cor. 3:9.)

16. ¿Kʼusi cha nop ta sventa ti oy kʼusi atenoj komel sventa cha kolta aba li ta chanubtasel chakʼ Diose?

¹⁶ Epal krixchanoetike tskʼanik ti oyuk snaʼobil li kʼusi tspasike. Pe kʼuchaʼal jnaʼojtike, akʼo mi yan sba yutsil li kʼusitik chkʼot ta pasel yuʼun jun krixchano liʼ ta balumile, ti kʼusi onoʼox chkʼot ta pasele jaʼ ti chchʼay ta jolale. Pe li kʼusi yakal tspas Jeova avi sventa chchʼultajes li sbie muʼyuk ta xtupʼ ta jyalel ta sjunul li kuxlejale; muʼyuk chchʼay ta jolal (Pro. 10:7; Heb. 6:10). Jaʼ yuʼun chaʼa, oyuk me sbalil xkiltik li yan sba yutsil jmoton jtaojtik ti ta jkolta jbatik ek li ta chanubtasel chakʼ Dios avi kʼakʼal ti muʼyuk-o jech pasbile.

¿Kʼusi cha takʼ?

• ¿Kʼusi skʼan jpastik sventa xkichʼtik chanubtasel yuʼun li Jeovae?

• ¿Kʼuxi jnaʼojtik ti tslekubtasbe xkuxlejal krixchanoetik li chanubtasel chakʼ Diose?

• ¿Kʼusi bendisionetik ta jtatik ta skoj ti ta jkolta jchiʼiltaktik ti akʼo xichʼik chanubtasel yuʼun li Diose?

[Sjakʼobiltak sventa xchanobil]

[Lokʼol ta pajina 23]

Li buchʼutik chichʼik chanubtasel yuʼun Jeovae lek xil sbaik xchiʼuk li yermanotakik ta spʼejel Balumile

[Lokʼol ta pajina 24]

¿Mi mu jechuk ti jaʼ jun mukʼta bendision ti «ta jchiʼin[tik] ta abtel li Diose»?