Kọ Who Wo Edẹro Kẹ Oware Nọ Jihova O Ru No Re O Siwi Owhẹ?

“Ujiro u te Ọnowo na Ọghẹnẹ Izrẹl; epanọ o weze bru ahwo riẹ ọ tẹ ta e.”—LUK 1:68.

1, 2. Oriruo vẹ whọ rẹ sai ro dhesẹ epanọ uyero mai u yoma te, kọ didi enọ ma be te t’ẹme kpahe?

 DAI roro inọ whọ rrọ ehwa evaọ ẹsipito. Whọ rrọ ubrukpẹ nọ ahwo nọ a wo oghẹrẹ ẹyao ọvo na a rrọ, ekpehre ẹyao nọ a be sai siwi hi. Nọ who yo nnọ edọkita jọ ọ be gwọlọ umu nọ a re ro siwi ẹyao na, eva i te mu owhẹ họ ẹwere. Who bi fi ezọ h’otọ kẹdẹ kẹdẹ re who yo sọ a duku umu jọ no. Ẹdẹjọ, who te yo nnọ a ruẹ umu nọ u re kpo ẹyao na no! Uye o bẹ edọkita nọ ọ ruẹ umu na gaga. Ẹvẹ who re rri edọkita na? Whọ rẹ lẹ siwi edọkita na ọnọ ọ gbẹ edhere kẹ owhẹ gbe amọfa buobu re a sae zọ.

² Onana o sae wọhọ osia jọ gheghe, rekọ nọ uyero nọ mai kpobi ma rẹriẹ ovao ku. Uyero nọ ma rrọ u tube yoma vi onọ ma jọ obehru dhesẹ na. Ma gwọlọ ohwo nọ o re siwi omai kpata kpata. (Se Ahwo Rom 7:24.) Jihova ọ rehọ uye bẹ omariẹ gaga re ọ sai siwi omai. Ọmọ riẹ ọ rehọ uye bẹ omariẹ gaga re. Joma ta ẹme kpahe enọ ene jọ. Fikieme ma rọ gwọlọ  esiwo? Didi uye Jesu ọ rọ bẹ omariẹ re ma ruẹse zọ? Kọ didi uye Jihova ọ rọ bẹ omariẹ? Ẹvẹ ma sai ro dhesẹ inọ oware nọ Ọghẹnẹ o ru re o siwi omai o d’omai ẹro?

Oware nọ Ma Rọ Gwọlọ Esiwo

3. Ẹvẹ uzioraha o rọ wọhọ ẹyao nọ o re vo?

³ Wọhọ epanọ ahwo jọ a ta kẹle na, ẹyao jọ nọ o re vo nọ ọ mai kpe ahwo no họ ẹyao ọtehekọ ọrọ 1918, ọnọ o kpe ahwo ima buobu. Eyao efa e riẹ nọ i yoma vi ọnana. Dede nọ i re kru ahwo bu tere he, enwenọ ahwo kpobi nọ eyao na i kie i re whu. * Rekọ ẹvẹ otẹrọnọ ma rehọ uzioraha rọ wawọ ẹyao otiọye na? Kareghẹhọ eme nọ e rrọ Ahwo Rom 5:12: “Umuomu orọ fiki omọvo vaha ruọ akpọ na, gbe uwhu fiki izieraha, fikiere uwhu u te zite ahwo kpobi: keme fiki onana uwhu u ro te ahwo kpobi, keme ahwo kpobi a raha uzi.” Ohwo kpobi ẹyao nọ a re se uzioraha na o rrọ oma, keme ahwo-akpọ kpobi a gba ha. (Se Ahwo Rom 3:23.) Kọ bro ahwo ẹyao nana o bi kpe? Pọl o kere inọ uzioraha o be wha uwhu se ‘ahwo kpobi.’

4. Ẹvẹ Jihova o bi rri epanọ uzuazọ mai o kpẹre te, kọ ẹvẹ eriwo riẹ o ro wo ohẹriẹ no orọ ahwo buobu nẹnẹ?

⁴ Ahwo buobu nẹnẹ a riẹ hẹ inọ ẹyao gbe uwhu i yoma te eyao nọ ma fodẹ na. Ozodhẹ rai họ re a whu nọ a re kpako ho, rekọ nọ ohwo ọ tẹ kpako no uwhu riẹ o rẹ gbẹ da ha. O lọhọ gaga re oghẹrẹ nọ Ọghẹnẹ ọ gwọlọ nọ ma rria tọ te o thọrọ omai ẹro. Uzuazọ mai o kpẹre gaga vi epanọ Ọghẹnẹ ọ gwọlọ. Evaọ aro Jihova ohwo-akpọ ọvuọvo ọ re rria te “ẹdẹ ọvo” ho. (2 Pita 3:8) Fikiere Ebaibol e ta inọ uzuazọ mai o re kpẹkpẹe wọhọ ẹbe nọ o re lo no hayo wọhọ ẹwẹ-okuo. (Ol. 39:5; 1 Pita 1:24) U fo inọ ma re roro kpahe epanọ uzuazọ mai o kpẹre te. Fikieme? Ma tẹ riẹ epanọ “ẹyao” nọ ọ rrọ omai oma na ọ ga te, ẹsiẹ ma rẹ mai dhesẹ edẹro kẹ “usiwo” na—koyehọ oware nọ Ọghẹnẹ o ru no re ọ sai siwi omai.

5. Eme uzioraha u mi omai no?

⁵ Re ma riẹ epanọ uzioraha gbe uwhu e gbẹdẹ te, ma rẹ daoma wo otoriẹ oware nọ uzioraha u ru omai no. Oyena o rẹ sae kake jọ bẹbẹ keme oware nọ ma ri wo ẹdọvo ho oye uzioraha u mi omai. Adamu avọ Ivi a kake reawere uzuazọ ogbagba. Fikinọ a jọ gbagba, a rẹ sae kpọ iroro gbe owojẹ rai. Fiki onana, o lọhọ re a wo usu okpekpe kugbe Jihova Ọghẹnẹ je ru oware nọ Ọghẹnẹ ọ gwọlọ mi ai. Ukpoye, a ku okẹ oghaghae yena fiẹ. Fikinọ a salọ inọ a rẹ thọ uzi Jihova, a te ku oghẹrẹ uzuazọ nọ Jihova ọ gwọlọ kẹ ai gbe emọ rai fiẹ. (Emu. 3:16-19) A tẹ jẹ rọ enẹ wha ekpehre “ẹyao” nọ ma be ta ẹme kpahe na se oma rai gbe omai. Fikiere Jihova o te brukpe ai. Rekọ ọ tẹ ya eyaa esiwo kẹ omai.—Ol. 103:10.

Uye nọ Jesu Ọ rọ bẹ Omariẹ re Ma Ruẹse Zọ

6, 7. (a) Ẹvẹ Jihova ọ rọ kaki dhesẹ inọ esiwo mai o te gwọlọ oware ulogbo jọ mi ei? (b) Eme ma rẹ sai wuhrẹ no idheidhe Ebẹle gbe erọ ezae ẹrọwọ efa ze?

⁶ Jihova ọ riẹ inọ re ọ sae ta emọ Adamu avọ Ivi no igbo, o te gwọlọ oware ulogbo jọ mi ei. Evaọ eruẹaruẹ nọ a kere fihọ Emuhọ 3:15, ma se kpahe oware nọ esiwo mai o te gwọlọ. Jihova o ti vi ‘ubi’ jọ ze, osiwi, ọnọ o ti kpe Setan no ẹdẹjọ. Rekọ uye o te bẹ osiwi na, o te wọhọ ẹsenọ a rowo iẹe ithihrawọ. O ginẹ wọhọ nnọ osiwi na o ti wo edada, rekọ eme họ otofa  eme yena? Didi uye o te bẹ Ọnọ Jihova ọ Salọ na?

⁷ Re ọ sae ta ahwo-akpọ no uzioraha, osiwi na ọ rẹ gwọlọ edhere nọ ọ rẹ rọ ruẹrẹ ahwo-akpọ họ kugbe Ọghẹnẹ ẹkwoma esino uzioraha. Eme oyena o te gwọlọ? Imuẹro e jariẹ no emuhọ ze inọ o te gwọlọ idheidhe. Okenọ Ebẹle, ohwo-akpọ ọsosuọ nọ o wo ẹrọwọ, ọ rehọ arao dheidhe, Ọghẹnẹ ọ jẹ idhe na rehọ. Uwhremu na, idibo Ọghẹnẹ wọhọ Noa, Abraham, Jekọp, gbe Job a rehọ erao dheidhe, yọ idhe rai e were Ọghẹnẹ. (Emu. 4:4; 8:20, 21; 22:13; 31:54; Job 1:5) Nọ ikpe buobu e ruọ emu no, Uzi nọ Ọghẹnẹ ọ rọ kẹ emọ Izrẹl u ru ẹme idheidhe vevẹ ziezi.

8. Eme ozerẹ okpehru na o re ru evaọ Ẹdẹ Omavoro na?

⁸ Usu idheidhe nọ e mai wuzou nọ Uzi na o fodẹ họ enọ a jẹ hai dhe evaọ Ẹdẹ Omavoro nọ a jẹ hai ru k’ukpe k’ukpe na. Evaọ ẹdẹ ọyena, eware buobu e riẹ nọ ozerẹ okpehru na o re ru. O re dheidhe kẹ Jihova fiki omavoro izieraha, orọ ọsosuọ izieraha izerẹ na, kẹsena rọkẹ erua edekọ na. Ozerẹ okpehru na ọ rẹ ruọ ubrukpẹ Ọrẹri Erẹri na evaọ uwou-udhu na hayo etẹmpol na, oria nọ ọye ọvo ọ rẹ sae rueva, yọ ẹdẹ nana ọvo evaọ ukpe na soso. Ọ vẹ jọ etẹe frẹ azẹ erao nọ a ro dheidhe na evaọ aro okọ ọvo na. Ẹsejọ ẹgho ọnwranwra ọ rẹ jọ ehru okọ ọvo na, onọ u dhesẹ inọ Jihova Ọghẹnẹ ọ rrọ etẹe.—Ọny. 25:22; Izerẹ 16:1-30.

9. (a) Evaọ Ẹdẹ Omavoro na, ono ozerẹ okpehru na o dikihẹ kẹ, kọ eme idheidhe riẹ i dhesẹ? (b) Eme Ọrẹri Erẹri nọ ozerẹ okpehru na ọ jẹ hae rueva u dikihẹ kẹ?

⁹ Ọghẹnẹ ọ kẹ Pọl ukọ na ẹzi dhesẹ oware nọ idhe nọ a jẹ hai dhe na i dikihẹ kẹ. O dhesẹ inọ ozerẹ okpehru na o dikihẹ kẹ Mesaya na, Jesu Kristi, idheidhe na i te dikihẹ kẹ uwhu Kristi. (Hib. 9:11-14) Idhe egbagba erọ Kristi i ti voro izieraha ẹko ahwo ivẹ no—inievo Kristi nọ i bu te 144,000 na, enọ e rrọ izerẹ nọ a rọ ẹzi wholo na, jegbe “igodẹ efa” na. (Jọn 10:16) Okenọ ozerẹ okpehru na ọ tẹ ruọ evaọ Ọrẹri Erẹri na, o dikihẹ kẹ Jesu nọ o kpohọ odhiwu re ọ rehọ aghare idheidhe ẹtanigbo riẹ bru Jihova Ọghẹnẹ.—Hib. 9:24, 25.

10. Eme eruẹaruẹ Ebaibol e ta inọ o te via kẹ Mesaya na?

¹⁰ O rrọ vevẹ inọ re a siwi emọ Adamu avọ Ivi o te gwọlọ oware ulogbo. Mesaya na ọ te rehọ uzuazọ riẹ dheidhe. Eruẹaro erọ Ikereakere Hibru na a dhesẹ onana vevẹ. Wọhọ oriruo, Daniẹl ọruẹaro na ọ ta inọ a re ti “si ọnọ a wholo na no,” koyehọ a ti kpei, re a ruẹsi “voroma imuemu.” (Dan. 9:24-26) Aizaya ọ ruẹaro inọ ahwo a te siọ Mesaya na, a te lahiẹe, a ve je kpei, hayo duwu ei, re ọ ruẹse wha izieraha ahwo-akpọ nọ e gba ha.—Aiz. 53:4, 5, 7.

11. Idhere vẹ Ọmọ Jihova o re dhesẹ unevaze riẹ re ọ rehọ oma riẹ dheidhe re ma sai wo esiwo?

¹¹ Taure Jesu ọ tẹ te ziọ otọakpọ, ọ riẹ  oware nọ o te via kẹe re ma sai wo esiwo. Ọ te ruẹ uye gaga, uwhremu na a ve ti kpei. Okenọ Ọsẹ riẹ o dhesẹ eware nana kẹe, kọ o sienẹ h’emu hayo veghe uzou? Ijo, ọ roma kpotọ kẹ oreva Ọsẹ riẹ. (Aiz. 50:4-6) Epọvo na re, okenọ Jesu ọ jọ otọakpọ, ọ roma kpotọ kẹ oreva Ọsẹ riẹ. Fikieme? Ọ ta nọ: “Me you Ọsẹ na.” Ọ kẹ ẹjiroro ọfa nọ o ro ru onana nọ ọ ta nọ: “Ohwo ọvo o wo uyoyou nọ o ro vi ona ha, re ohwo o siobọno uzuazọ riẹ fihọ otọ fiki ezọ riẹ.” (Jọn 14:31; 15:13) Fikiere oware ulogbo jọ nọ o wha esiwo se omai họ uyoyou nọ Ọmọ Jihova o wo kẹ omai. Dede nọ o gwọlọ nọ a re kpei re ma ruẹsi wo esiwo, ọ rọwo inọ o re whu fiki mai.

Uye nọ Jihova Ọ rọ bẹ Omariẹ re Ma Ruẹse Zọ

12. Ono o ru ọruẹrẹfihotọ ẹtanigbo na, kọ eme o wọ riẹ ru ei?

¹² Jesu họ ọnọ o ru ọruẹrẹfihotọ idhe ẹtanigbo na ha. Ukpoye, Jihova họ ọnọ o ru rie. Pọl ukọ na o dhesẹ inọ agbada-idhe nọ o jọ etẹmpol na, o dikihẹ kẹ oreva Jihova. (Hib. 10:10) Fikiere Jihova ma rẹ mai yere rọkẹ esiwo nọ idheidhe Kristi o wha se omai. (Luk 1:68) O rrọ odhesẹvia oreva ọgbagba riẹ gbe uyoyou ulogbo riẹ kẹ ahwo-akpọ.—Se Jọn 3:16.

13, 14. Ẹvẹ oriruo Abraham o rẹ sai ro fi obọ họ kẹ omai wo ovuhumuo kẹ oware nọ Jihova o ru kẹ omai no?

¹³ Uye vẹ Jihova ọ rọ bẹ oma riẹ re o ru ẹtanigbo na lọhọ? O rẹ jọ bẹbẹ kẹ omai re ma wo otoriẹ onana. Ikuigbe Ebaibol jọ o riẹ nọ o rẹ sai fi obọ họ ru ẹme na vẹ kẹ omai. Jihova ọ ta kẹ Abraham, ọzae ẹrọwọ na, inọ o ru oware jọ nọ o bẹ gaga, inọ ọ rehọ ọmọ riẹ Aiziki ro dheidhe. Abraham o you ọmọ riẹ. Jihova o dhesẹ ọmọ riẹ na wọhọ “ọmọzae ọvo ra na Aiziki, ọnọ who you.” (Emu. 22:2) Rekọ Abraham ọ ruẹ inọ eruo oreva Jihova o roja vi uyoyou riẹ kẹ Aiziki. Fikiere o te yoẹme kẹ Jihova. Ghele na, Jihova ọ kẹ Abraham uvẹ hẹ re o ru oware nọ ọye omariẹ o bi ti ru ẹdẹjọ. Abraham ọ jẹ te nwane rehọ ọmọ riẹ dheidhe no, rekọ Ọghẹnẹ o te vi ukọ-odhiwu jọ re ọ dae ji. Abraham ọ gba riẹ mu inọ o re yoẹme kẹ Ọghẹnẹ riẹ evaọ odawọ ogaga nana te epanọ u ro mu ei ẹro inọ ẹkwoma ẹkparomatha ọvo ọ te rọ wariẹ ruẹ ọmọ riẹ. Rekọ o wo ẹrọwọ inọ Ọghẹnẹ ọ te kpare ọmọ riẹ ze. Evaọ uzẹme, Pọl ọ ta inọ Abraham ọ rehọ ẹkwoma ẹkparomatha ‘wo ọmọ riẹ zihe ze.’—Hib. 11:19.

¹⁴ Dai roro epanọ o jẹ da Abraham te nọ o je ru re ọ rehọ ọmọ riẹ dheidhe. Evaọ oghẹrẹ jọ, enẹ o jọ kẹ Jihova okenọ ọ rehọ ọnọ o se “Ọmọ oyoyou mẹ” na ro dheidhe. (Mat. 3:17) Rekọ kareghẹhọ inọ edada Jihova e mae ga vi orọ Abraham. Tei te Ọmọ riẹ a rria kugbe ikpe nọ a rẹ sai kele he no. Ọmọ na ọ rehọ oghọghọ lele Ọsẹ  riẹ ru iruo wọhọ “osu iruo” gbe wọhọ Ọtota riẹ, “Ẹme na.” (Itẹ 8:22, 30, 31; Jọn 1:1) Ma rẹ sai gbiku epanọ o da Jihova te he nọ a jẹ lahiẹ Ọmọ riẹ, nọ a je sei ẹkoko, gbe nọ a kpei wọhọ ogbulegbu. Jihova ọ rọ uye bẹ oma riẹ gaga re ma ruẹse zọ. Kọ ẹvẹ ma sai ro dhesẹ inọ esiwo nana o d’omai ẹro?

Ẹvẹ Whọ Sai ro Dhesẹ Inọ Esiwo na O d’Owhẹ Ẹro?

15. Ẹvẹ Jesu o ro ku idhe omavoro na họ, kọ ẹvẹ onana o rọ lọhọ?

¹⁵ Jesu o kuọ idhe omavoro na họ nọ ọ kparoma kpobọ odhiwu no. Nọ ọ wariẹ kuomagbe Ọsẹ oyoyou riẹ no, o te dhesẹ kẹ Ọsẹ riẹ inọ o dheidhe ẹtanigbo na no. Eghale buobu i te lele ei. Uvi erọvrẹ e tẹ lọhọ, orọ ọsosuọ rọkẹ izieraha inievo Kristi nọ a rọ ẹzi wholo na, kẹsena kọ erọ “akpọ na ọsoso.” Fiki idhe nana, enọ i kurẹriẹ no eva ze kpobi je zihe ruọ uvi ilele Jesu a rẹ reawere emamọ usu kugbe Jihova Ọghẹnẹ. (1 Jọn 2:2) Ẹvẹ onana u ro kie kpahe owhẹ?

16. Ẹvẹ ma re dhesẹ oware nọ o rẹ lẹliẹ omai wo edẹro kẹ esiwo nọ Jihova o ru lọhọ k’omai na?

¹⁶ Joma zihe kpohọ oriruo nọ ma jọ obọ emuhọ kẹ na. Dae rehọ iẹe nọ edọkita nọ o duku umu nọ o re kpo ẹyao na ọ ziọ ubrukpẹ nọ a fi owhai họ evaọ ẹsipito na, ọ tẹ ta nọ: Ohwo kpobi nọ ọ rehọ umu na je ru oware nọ ọ ta kẹe, ẹyao riẹ o ti kpo. Kọ ẹvẹ otẹrọnọ ibuobu enọ e be mọ na a siọ ẹme edọkita na, be vro inọ re a rehọ umu na je ru oware nọ edọkita na ọ ta na o ga hrọ? Kọ whọ te raro kele ai o tẹ make rọnọ u mu owhẹ ẹro inọ umu na o te ginẹ sẹ? Kakaka! Ababọ avro whọ rẹ rọ ọwhọ rehọ umu na who ve je lele ithubro edọkita na ziezi, ẹsejọhọ tubẹ vuẹ amọfa inọ whọ gwọlọ rehọ umu na. O mai tube wuzou re mai omomọvo ma dhesẹ kẹ Jihova inọ ma wo edẹro kẹ esiwo nọ ọ rehọ ẹkwoma idhe ẹtanigbo Ọmọ riẹ ru lọhọ na.—Se Ahwo Rom 6:17, 18.

17. Idhere vẹ who re ro dhesẹ inọ who wo edẹro kẹ oware nọ Jihova o ru no re o siwi owhẹ?

¹⁷ Otẹrọnọ oware nọ Jihova avọ Ọmọ riẹ a ru k’omai re a sai siwi omai no uzioraha gbe uwhu o d’omai ẹro, ma re dhesẹ iẹe via. (1 Jọn 5:3) Ma rẹ daoma re ma whaha uzioraha. Ma re keke aro fihọ raha uzi hi re ma jẹ viẹ amọfa họ roro inọ ma rrọ emamọ ahwo. Uruemu utioye na o rẹ wọhọ ẹsenọ ma be ta nọ ma se ẹtanigbo na gbe oware ovo ho. Ukpoye, ma re dhesẹ edẹro ẹkwoma oma nọ ma rẹ dawo gaga re ma jọ fuafo evaọ aro Ọghẹnẹ. (2 Pita 3:14) Ma re dhesẹ edẹro mai ẹkwoma ẹruore esiwo na nọ ma re whowho kẹ amọfa, re ae omarai a sai wo emamọ edikihẹ evaọ aro Jihova gbe ẹruore uzuazọ ebẹdẹ bẹdẹ. (1 Tim. 4:16) Jihova avọ Ọmọ riẹ a te enọ ma rẹ rehọ oke gbe ẹgba mai kpobi jiri. (Mak 12:28-30) Dai roro ei! Ma rẹ sai rẹro oke nọ a ti si uzioraha kpobi no omai oma. Ma vẹ te rria oghẹrẹ uzuazọ nọ Ọghẹnẹ ọ ma omaa riẹ kẹ omai, ẹgbagba bẹdẹ bẹdẹ—enana kpobi fiki oware nọ Jihova o ru no re o siwi omai!—Rom 8:21.

[Oruvẹ-obotọ]

Ẹvẹ Whọ te k’Uyo?

• Fikieme whọ rọ gwọlọ esiwo kpata kpata?

• Ẹvẹ who rri uye nọ Jesu ọ rọ bẹ oma riẹ fiki ra?

• Ẹvẹ who rri idhe ẹtanigbo na nọ Jihova o ru lọhọ?

• Eme whọ gba riẹ mu nnọ who re ru kpahe ọruẹrẹfihotọ nọ Jihova o ru re o siwi owhẹ?

[Enọ Uwuhrẹ]

[Uwoho nọ o rrọ ẹwẹ-obe avọ 27]

Evaọ Ẹdẹ Omavoro na, ozerẹ okpehru Izrẹl o dikihẹ kẹ Mesaya na

[Uwoho nọ o rrọ ẹwẹ-obe avọ 28]

Unevaze Abraham re ọ rehọ ọmọ riẹ dheidhe u wuhrẹ omai kpahe idhe nọ e mae rro nọ Jihova o dhe