Na o Tšeela Godimo Seo Modimo a se Dirilego Gore a go Hlakodiše?

“A go tumišwe Jehofa Modimo wa Isiraele, gobane o lebišitše tlhokomelo ya gagwe bathong ba gagwe, gomme a ba hlakodiša.”—LUKA 1:68.

1, 2. Boemo bja rena bjo bo šiišago bja gona bjale bo ka bapetšwa le’ng, gona ke dipotšišo dife tšeo re tlago go di ahla-ahla?

AKANYA o robetše malaong sepetlele. O ka phapošing ya balwetši yeo go yona batho ka moka ba swerwego ke bolwetši bjo bo swanago, bjo bo bolayago le bjo bo sa alafegego. Ge o e-kwa gore go na le ngaka e nngwe yeo e etelelago pele nyakišišong ya go hwetša pheko, o ba le kholofelo. O fagahlela go kwa seo se fihleletšwego ke nyakišišo yeo. Ka letšatši le lengwe o kwa gore go hweditšwe pheko! Ngaka yeo e hweditšego pheko e dirile boikgafo bjo bogolo gore pheko yeo e hwetšagale. O be o tla ikwa bjang? Ga go pelaelo gore o tla hlompha ngaka yeo ka mo go tseneletšego le go e leboga ka ge e butše sebaka sa gore wena le ba bangwe le hlakodišwe lehung.

² Boemo bjo bo ka bonala e le bjo bo feteleditšwego, eupša bo swana le boemo bjo rena ka moka re lebeletšanego le bjona. Yo mongwe le yo mongwe wa rena o lebeletšane le boemo bjo bo šiišago kudu go feta bjo bo sa tšwago go hlaloswa. Re tloga re nyaka mohlakodiši. (Bala Baroma 7:24.) E le gore a re hlakodiše, Jehofa o dirile boikgafo bjo bogolo. Morwa wa gagwe le yena o dirile boikgafo bjo bogolo. Ka gona, anke re ahla-ahleng dipotšišo tše nne tša motheo. Ke ka baka la’ng re nyaka tlhakodišo? Tlhakodišo ya rena e bakile gore Jesu a dire boikgafo bofe? Jehofa yena o dirile boikgafo bofe? Gona, re ka bontšha bjang gore re tšeela godimo tlhakodišo e tšwago go Modimo?

Lebaka Leo ka Lona re Nyakago Tlhakodišo

3. Sebe se swana bjang le leuba la bolwetši?

³ Go ya ka kakanyetšo e nngwe ya morago bjale, le lengwe la mauba a šoro kudu historing ya batho e bile la Kwatama ya 1918 yeo e bolailego  batho ba dimilione tše masome. Malwetši a mangwe le ona a a bolaya. Gaešita le ge a ka fetela batho ba sego kae, a bolaya karolo e kgolo ya batho bao a ba fetelago. * Lega go le bjalo, go thwe’ng ge e ba re ka bapetša leuba le bjalo le sebe? Gopola mantšu a Baroma 5:12 a rego: “Ka motho o tee sebe se tsene lefaseng, gomme lehu la tsena ka sebe, ka baka leo lehu le aparetše batho bohle gobane bohle ba dirile sebe.” (Baroma 5:12) Ka ge batho ba sa phethagalago ka moka ba dira dibe, motho yo mongwe le yo mongwe o feteditšwe ka sebe. (Bala Baroma 3:23.) Ke batho ba bakae bao ba bolawago ke sebe? Paulo o ngwadile gore sebe se bolaya “batho bohle.”

4. Jehofa o lebelela nywaga ya rena ya bophelo bjang, gona pono ya gagwe e fapane bjang le ya batho ba bantši lehono?

⁴ Batho ba bantši lehono ga ba lebelele sebe le lehu e le dilo tše šoro. Ba tshwenyega ka seo ba rego ke go hwa ga motho pele ga nako, eupša ge motho a e-hwa ka baka la botšofadi ba re ke lehu la tlhago. Go bonolo kudu gore batho ba lebale pono ya Mmopi. Bophelo bja rena ke bjo bokopana kudu go feta kamoo a bego a rerile. Ge e le gabotse, ga go na motho yo a phetšego “letšatši” go ya ka pono ya Jehofa. (2 Pet. 3:8) Ke ka baka leo Lentšu la Modimo le rego bophelo bja rena ke bjo bokopana, go etša bjang bjo bo melago selemo gomme bja hwa marega goba moya woo motho a o ntšhago ka dinko ge a hema. (Ps. 39:5; 1 Pet. 1:24) Re swanetše go dula re gopola pono yeo. Ka baka la’ng? Ge e ba re kwešiša kamoo sebe se lego sehlogo ka gona, re tla kwešiša gakaone bohlokwa bja seo re ka rego ke pheko—tlhakodišo ya rena.

5. Sebe se dirile gore re lahlegelwe ke’ng?

⁵ E le gore re kwešiše kamoo sebe le ditla-morago tša sona di lego sehlogo ka gona, re swanetše go katanela go kwešiša seo sebe se re dirilego sona. Go dira bjalo go ka thoma ka go ba thata ka gobane sebe se dirile gore re lahlegelwe ke selo seo batswadi ba rena ba pele ba bego ba e-na le sona. Mathomong Adama le Efa ba be ba thabela bophelo bjo bo phethagetšego. Ka ge ba be ba phethagetše mmeleng le monaganong, ba be ba ka kgetha go laola menagano, maikwelo le ditiro tša bona. Ka go rialo, bjalo ka bahlanka ba Jehofa ba be ba ka kgona go hlagolela dika tše di kgahlišago e le gore ba diriše bokgoni bjo bogolo bjo ba bego ba e-na le bjona. Go e na le moo, ba ile ba lahla mpho yeo e bohlokwa. Ka go kgetha go dira sebe kgahlanong le Jehofa, ba ile ba lahlegelwa ke bophelo bjoo Jehofa a bego a bo rerile bakeng sa bona le bana ba bona. (Gen. 3:16-19) Ka nako e swanago, ba ile ba itsenya gaešita le go re fetetša ka seo re ka rego ke bolwetši bjo šoro bjoo re bego re dutše re bo ahla-ahla. Ka mo go swanetšego, Jehofa o ile a ba ahlola. Eupša rena o re holofetša tlhakodišo.—Ps. 103:10.

Boikgafo Bjoo Jesu a bo Dirilego Bakeng sa go re Hlakodiša

6, 7. (a) Jehofa o bontšhitše bjang la mathomo gore tlhakodišo ya rena e be e tla nyaka boikgafo bjo bogolo? (b) Re ka ithuta’ng dihlabelong tšeo di bego di dirwa ke Abele le bapatriareka bao ba phetšego mehleng ya pele ga Molao wa Moše?

⁶ Jehofa o be a tseba gore go hlakodiša ditlogolwana tša Adama le Efa go tla nyaka boikgafo bjo bogolo. Boporofeteng bjo bo lego go Genesi 3:15, re ithuta gore seo se be se tla akaretšang. Jehofa o be a tla nea “peu” goba mohlakodiši, yoo ka letšatši le lengwe a bego a tla fediša Sathane, a mo pšhatla gore a se sa hlwa a e-ba gona. Lega go le bjalo, mohlakodiši yoo o be a tla tlaišega, a longwa serethe ka tsela ya seswantšhetšo. Go kwagala ntho yeo e le e kwešago bohloko le e fokodišago, eupša se se bolela’ng? Ge e le gabotse, Mokgethwa wa Jehofa o be a tla swanelwa ke go kgotlelela’ng?

⁷ E le gore a hlakodiše batho sebeng, mohlakodiši o be a tla dira poelanyo, e lego tsela ya go boelanya batho le Modimo ka go fediša ditla-morago tša sebe. Seo se be se tla akaretša’ng? Go ile gwa bonala e sa le pele gore go be go tla nyakega sehlabelo. Ge motho wa pele yo a bego a  botega, Abele, a be a direla Jehofa dihlabelo ka diphoofolo, Modimo o ile a mo amogela. Ka morago, bapatriareka ba boifago Modimo ba bjalo ka Noa, Aborahama, Jakobo le Jobo ba ile ba dira dihlabelo tše swanago tšeo di ilego tša kgahla Modimo. (Gen. 4:4; 8:20, 21; 22:13; 31:54; Jobo 1:5) Nywaga-kgolo ka morago, Molao wa Moše o ile wa lebiša tlhokomelo kudu tabeng ya dihlabelo.

8. Moperisita yo a phagamego o be a dira’ng ngwaga le ngwaga ka Letšatši la Poelanyo?

⁸ Tše dingwe tša dihlabelo tše bohlokwa tšeo di bego di nyakwa ke Molao ke tšeo di bego di dirwa ngwaga le ngwaga ka Letšatši la Poelanyo. Letšatšing leo, moperisita yo a phagamego o be a dira mediro ya seswantšhetšo ka go latelana. O be a direla Jehofa dihlabelo bakeng sa go dira poelanyo ya dibe—sa pele bakeng sa baperisita, ke moka bakeng sa meloko yeo e sego ya boperisita. Moperisita yo a phagamego o be a tsena ka Sekgethwa-kgethweng sa taberenakele goba tempele moo go bego go tsena yena feela ka letšatši lona leo feela mo ngwageng. Ke moka, o be a gaša madi a dihlabelo pele ga areka ya kgwerano. Ka dinako tše dingwe ka godimo ga polokelo yeo e kgethwa go be go bonala leru leo le phadimago leo le bego le emela go ba gona ga Jehofa.—Ek. 25:22; Lef. 16:1-30.

9. (a) Ka Letšatši la Poelanyo, moperisita yo a phagamego o be a swantšhetša mang, gona dihlabelo di be di swantšhetša’ng? (b) Ke’ng seo se bego se swantšhetšwa ke go tsena ga moperisita yo a phagamego ka Sekgethwa-kgethweng?

⁹ Moapostola Paulo o ile a budulelwa gore a utolle seo se bolelwago ke mediro ye ya seswantšhetšo. O bontšhitše gore moperisita yo a phagamego o be a swantšhetša Mesia, Jesu Kriste, mola go dirwa ga dihlabelo go be go emela lehu la Kriste la sehlabelo. (Baheb. 9:11-14) Sehlabelo seo se se phethagetšego se be se tla dira poelanyo ya kgonthe bakeng sa dihlopha tše pedi tša batho—sehlopha sa baperisita sa bana babo Kriste ba 144 000 ba tloditšwego ka moya gotee le sehlopha sa “dinku tše dingwe.” (Joh. 10:16) Ge moperisita yo a phagamego a be a tsena ka Sekgethwa-kgethweng, o be a swantšhetša go tsena ga Jesu legodimong go yo nea Jehofa Modimo mohola wa sehlabelo sa topollo.—Baheb. 9:24, 25.

10. Boporofeta bja Beibele bo bontšhitše gore Mesia o be a tla diragalelwa ke’ng?

¹⁰ Go molaleng gore tlhakodišo ya ditlogolwana tša Adama le Efa e be e tla nyaka boikgafo bjo bogolo. Mesia o be a tla swanelwa ke go gafa bophelo bja gagwe. Baporofeta ba Mangwalo a Seheberu ba hlalositše therešo ye ka tsela e kwagalago kudu. Ka mohlala, moporofeta Daniele o boletše ka go lebanya gore “Motlotšwa Mo-êta-pele” o be a tla “tlošwa” goba a bolawa e le gore a ‘fediše dikarogo.’ (Dan. 9:24-26) Jesaya o boletše e sa le pele gore Mesia o be a tla ganwa, a tlaišwa gomme a bolawa goba a hlabja e le gore a rwale dibe tša batho ba sa phethagalago.—Jes. 53:4, 5, 7.

11. Morwa wa Jehofa o bontšhitše ka ditsela dife gore o ikemišeditše go ikgafa e le gore re hlakodišwe?

¹¹ Pele a e-tla lefaseng, Morwa yo a tswetšwego a nnoši wa Modimo o ile a lemoga gore tlhakodišo ya rena e tla nyaka gore a dire boikgafo. O be a tla swanelwa ke go tlaišega ka tsela e sehlogo gomme a bolawe. Ge Tatagwe a be a mo ruta ditherešo tšeo, na o ile a di tlogela goba a rabela? Ka mo go fapanego, o ile a ikokobeletša taelo ya Tatagwe ka go rata. (Jes. 50:4-6) Ka mo go swanago, ge a be a le mo lefaseng, Jesu o ile a  kwa gomme a phetha thato ya Tatagwe. Ka baka la’ng? O neile karabo ka mantšu a a rego: “Ke rata Tate.” O neile karabo e nngwe gape ka mantšu a a rego: “Ga go yo a nago le lerato le le fetago le, gore motho a gafe moya wa gagwe ka baka la bagwera ba gagwe.” (Joh. 14:31; 15:13) Ka gona, re hlakodišwa kudu-kudu ka baka la lerato leo Morwa wa Jehofa a re ratago ka lona. Gaešita le ge go be go nyakega gore a gafe bophelo bja gagwe bjo bo phethagetšego, o ile a thabela go dira bjalo e le gore re ka hlakodišwa.

Boikgafo Bjoo Jehofa a bo Dirilego Bakeng sa go re Hlakodiša

12. Topollo ke pontšho ya thato ya mang, gona ke ka baka la’ng a e neile?

¹² Jesu e be e se yena Mothomi wa sehlabelo sa topollo e bile e be e se yena a rerilego gore se dirwe. Go e na le moo, tsela ye ya go hlakodiša batho ke karolo ya bohlokwa ya thato ya Jehofa. Moapostola Paulo o bontšhitše gore dihlabelo tšeo di bego di dirwa aletareng ya tempele di be di emela thato ya Jehofa. (Baheb. 10:10) Ka gona, tlhakodišo yeo re e hwetšago ka sehlabelo sa Kriste ke selo seo re swanetšego go leboga Jehofa ka baka la sona. (Luka 1:68) Ke pontšho thato ya gagwe e phethagetšego le ya lerato leo le tseneletšego leo a ratago batho ka lona.—Bala Johane 3:16.

13, 14. Mohlala wa Aborahama o ka re thuša bjang go kwešiša seo Jehofa a re diretšego sona?

¹³ Jehofa o gafile’ng e le gore a re bontšhe lerato la gagwe ka tsela ye? Go thata gore re kwešiše seo gabotse. Lega go le bjalo, go na le pego ya Beibele yeo e ka re thušago go kwešiša taba ye gabotse. Jehofa o ile a kgopela monna yo a botegago Aborahama gore a dire selo seo se bego se le thata kudu—go neela morwa wa gagwe Isaka bjalo ka sehlabelo. Ge e le gabotse, Aborahama e be e le tate yo a nago le lerato. Ge Jehofa a bolela le yena mabapi le Isaka o itše ke ‘morwa wa gago o tee yo a rategago.’ (Gen. 22:2) Lega go le bjalo, Aborahama o ile a bona go dira thato ya Jehofa go le bohlokwa go feta lerato leo a ratago Isaka ka lona. Aborahama o ile a kwa Jehofa. Lega go le bjalo, Jehofa ga se a ka a dumelela Aborahama go dira seo Yena a bego a tla se dira ka letšatši le lengwe. Modimo o ile a romela morongwa gore a thibele Aborahama pele a dira morwa wa gagwe sehlabelo. Aborahama o be a ikemišeditše go kwa Modimo wa gagwe tekong yeo e thata mo e lego gore o be a kgodišegile gore kholofelo e nnoši ya gore a bone morwa wa gagwe ke ge a ka tsošwa bahung. Eupša o be a e-na le tumelo e feletšego ya gore Modimo o tla mo tsoša. Ka kgonthe, Paulo o itše Aborahama o ile a amogela Isaka gape ka gore a tsošwe “ka tsela ya seswantšhetšo.”—Baheb. 11:19.

¹⁴ Na o ka kgona go akanya bohloko bjo Aborahama a bego a bo kwa ge a be a lokišetša go dira morwa wa gagwe sehlabelo? Ka tsela e itšego, phihlelo ya Aborahama e re thuša go kwešiša kamoo Jehofa a bego a ikwa ka gona ge a be a dira sehlabelo ka yo a mmitšago “Morwa wa-ka, morategi.” (Mat. 3:17) Lega go le bjalo, gopola gore go ka direga gore bohloko bjo Jehofa a bego a bo kwa ke bjo bo tseneletšego le go feta. Yena le Morwa wa gagwe ba thabetše go ba gotee ka nywaga e sa balegego e dimilione goba mohlomongwe e dimilione tše dikete. Morwa o be a thabela go šoma le Tatagwe yo a rategago e le “mošomi yo a nago le bokgoni” gape e le Mmoleledi wa gagwe, “Lentšu.” (Die. 8:22, 30, 31, NW; Joh. 1:1) Bohloko bjoo Jehofa a bo kgotleletšego ge Morwa wa gagwe a be a tlaišwa, a kwerwa gomme a bolawa  bjalo ka sesenyi ke bjo bo tseneletšego kudu go feta kamoo re ka kwešišago. Tlhakodišo ya rena e bakile gore Jehofa a dire boikgafo bjo bogolo kudu! Ka gona, re ka bontšha bjang gore re tšeela tlhakodišo yeo godimo?

O ka Bontšha Bjang gore o Tšeela Tlhakodišo Godimo?

15. Jesu o phethile bjang modiro o mogolo wa poelanyo, gona seo se ile sa dira gore go kgonege eng?

¹⁵ Jesu o phethile modiro o mogolo wa poelanyo ka morago ga gore a tsošetšwe legodimong. Ge a boelantšwe le Tatagwe, o ile a mo nea mohola wa sehlabelo sa gagwe. Ka morago ga moo go ile tša latela ditšhegofatšo tše dintši. Go ile gwa kgonega gore dibe di lebalelwe ka mo go feletšego, sa pele go lebalelwe tša bana babo Kriste ba tloditšwego, ke moka go lebalelwe “tša lefase ka moka.” Ka baka la sehlabelo seo, lehono batho ka moka bao ba sokologago e le ka kgonthe dibeng tša bona gomme ba e-ba balatedi ba kgonthe ba Kriste ba ka ba le boemo bjo bobotse pele ga Jehofa Modimo. (1 Joh. 2:2) Taba ye e šoma bjang go wena?

16. Re ka dira papišo efe go bontšha gore ke ka baka la’ng re swanetše go bontšha tebogo bakeng sa tlhakodišo yeo Jehofa a dirilego gore go kgonege gore re e hwetše?

¹⁶ Anke re boele papišong yela ya mathomong. A re re ngaka yela e hweditšego pheko ya bolwetši e tla go balwetši bao ba lego ka phapošing yeo o lego ka go yona gomme e ba botša gore: Motho le ge e le ofe yo a amogelago kalafo gomme a e-ja le go itšhidulla go latela ditaelo tšeo a di neilwego o tla fola e le ka kgonthe. Go thwe’ng ge e ba balwetši bao ba lego ka phapošing yeo o lego ka go yona ba gana go latela ditaelo tša ngaka, ba phega kgang ka gore go tla ba thata gore ba nwe dihlare goba go latela ditaelo tša mabapi le go ja le boitšhidullo? Na o tla ba tlatša, gaešita le ge o e-na le bohlatse bjo bo kgodišago bja gore pheko yeo e a šoma? Ruri ga go bjalo le gatee! Ga go pelaelo gore o tla leboga pheko yeo gomme wa latela ditaelo tša ngaka ka kelohloko, mohlomongwe wa ba wa botša le ba bangwe ka kgetho ya gago. Ka kwešišo e nabilego, yo mongwe le yo mongwe wa rena o swanetše go fagahlela go bontšha Jehofa kamoo a lebogago tlhakodišo yeo a dirilego gore e kgonege ka sehlabelo sa Morwa wa gagwe sa topollo.—Bala Baroma 6:17, 18.

17. O ka bontšha tebogo ka ditsela dife bakeng sa seo Jehofa a se dirilego go go hlakodiša?

¹⁷ Ge e ba re e-na le tebogo bakeng sa seo Jehofa le Morwa wa gagwe ba se dirilego e le gore ba re hlakodiše sebeng, re tla e bontšha. (1 Joh. 5:3) Re tla lwantšha tshekamelo ya rena ya go dira dibe. Re ka se ke ra ineela mokgweng wa go dira dibe ka boomo gomme ra phela bophelo bjo bo lego gabedi bja boikaketši bjoo gantši bo sepedišanago le mokgwa woo. Tsela e bjalo ya bophelo e tla swana le ge e ba re bolela gore ga re leboge topollo le gatee. Go e na le moo, re tla bontšha tebogo ya rena ka go šoma ka thata gore re dule re hlwekile mahlong a Modimo. (2 Pet. 3:14) Re tla bontšha tebogo yeo ka go botša ba bangwe ka kholofelo ya rena ya tlhakodišo e le gore le bona ba ka ba le boemo bjo bobotse pele ga Jehofa gomme ba ba le kholofelo ya go phela ka mo go sa felego. (1 Tim. 4:16) Ruri Jehofa le Morwa wa gagwe ba swanelwa ke nako le matla le ge e le afe ao re ka a dirišago go ba tumiša! (Mar. 12:28-30) Nagana ka seo! Re ka lebelela pele nakong yeo ka yona re tlago go lokologa sebeng ka mo go feletšego. Re ka phela bophelo go ya kamoo Modimo a bego a rerile gore re bo phele, re phethagetše gomme re phela ka mo go sa felego—sohle se e le ka baka la seo Jehofa a se dirilego e le gore a re hlakodiše!—Baroma 8:21.

[Mongwalo wa tlase]

O be o tla Araba Bjang?

• Ke ka baka la’ng o nyaka tlhakodišo ka mo go akgofilego?

• Boikgafo bja Jesu bo go kgoma bjang?

• O ikwa bjang ka mpho ya Jehofa ya topollo?

• O tutueletšega go dira’ng ka baka la ditokišetšo tša Jehofa tša go go hlakodiša?

[Dipotšišo tša Thuto]

[Seswantšho go letlakala 27]

Ka Letšatši la Poelanyo, moperisita yo a phagamego kua Isiraele o be a fetoga seswantšho seo se phelago sa Mesia

[Seswantšho go letlakala 28]

Go ikemišetša ga Aborahama go dira morwa wa gagwe sehlabelo go re ruta mo gontši ka sehlabelo sa Jehofa se segolo kudu