Kasin Papablien Moy Ginawa nen Jehova Pian Iliktar Ka?

“Nirayew komon si Jehova a Dios na Israel, lapud inimano to tan inliktar to iray totoo to.”​—LUC. 1:68, NW.

1, 2. (a) Iyilustra so inkaseryoso na kipapasen tayo. (b) Antoray tepet a pantongtongan tayo?

ISIPEN pan sakey kan pasyente ed ospital. Wala ka’d sakey a kuarto a kaibam iray arum nin kaparehom na sakit. Makapatey iyan sakit tan anggapo ni adiskobrin tambal to. Sanen naamtaan mon walay sakey a doktor a mangidadauloy pananap na tambal ed satan, awalaan kay ilalo. Pitalaran moy antokaman a balita nipaakar ed satan. Sakey ya agew, naamtaan mon wala lay adiskobrin tambal! Dakdakel so insakripisyo na samay doktor pian napawala itan. Anto kasi naliknam? Seguradon misalsalamat ka tan baleg so respetom ed sayan toon nanggaway paraan pian sika tan say arum ni et niliktar ed patey.

² Nayarin singa madrama iyan situasyon, balet diad tua, mipadpara’d satan so kipapasen tayon amin. Mas grabe ni ingen so situasyon na balang sakey ed sikatayo. Kakkaukolan tayoy sakey a manangiliktar. (Basaen so Roma 7:24.) Pian niliktar itayo, balbaleg so insakripisyo nen Jehova tan ontan met na Anak to. Pantongtongan tayo sirin so apatiran importantin tepet. Akin et kaukolan tayoy panangiliktar? Antoy insakripisyo nen Jesus pian niliktar itayo? Antoy insakripisyo nen Jehova? Tan panon tayon nipatnag a papablien tayoy panangiliktar na Dios?

 Akin et Kaukolan Tayoy Panangiliktar?

3. Panon a nibagan mipadpara so kasalanan ed sakey a sankamundoan ya epidemya?

³ Unong ed agano nin impanaral, sakey ed saray sankagrabian ya epidemya et say trangkaso Español nen 1918 ya amatey na pigamplon milyon a totoo. Wala ni ray arum a sakit a mas makapatey. Nayarin daiset labat so nadapoan na saratan ingen ta baleg a porsiento ed sikara so ompatey. * Balet, panon to no ikompara tayo so kasalanan ed ontan ya epidemya? Nonoten pay imbaga na Roma 5:12: “Say kasalanan linmoob ed mundo lapu ed sakey a too, tan say patey lapu ed kasalanan; et say patey ed satan linma ed amin a too, ta amin nankasalanan.” Siento porsiento na katooan so adapoan na kasalanan, ta amin et agperpekto. (Basaen so Roma 3:23.) Tan pigaray ompapatey? Insulat nen Pablo a lapud kasalanan et ompapatey so “amin a too.”

4. Anto so panmoria nen Jehova ed katikey na bilay tayo, tan antoy pidumaan na panmoria to ed panmoria na dakel natan?

⁴ Parad dakel a totoo natan, normal labat so kasalanan tan patey. Anggaman pampapagaan da met so biglaan ya ipapatey, ipapasen da balet a “natural” labat ya ompatey so too lapud inkatatken. No maminsan, mainomay tayon nalingwanan so panmoria na Manamalsa. Say katuaan to, antiktikey a maong so bilay tayo no ikompara ed samay inggagala to. Diad panmoria na Dios ingen et anggapo ni toon akapambilay na anggan “sanagew” labat. (2 Ped. 3:8) Kanian ibabaga na Salitay Dios a say bilay tayo et singa labat sengaw odino dikan maples a nalenes. (Sant. 4:14; 1 Ped. 1:24) Nepeg a lawas tayon nonoten itan. Akin? No namomoria tayoy inkagrabe na “sakit” a mamapairap ed sikatayo, mas naapresya tayoy kaimportantian na “tambal”​—say kililiktar tayo.

5. Anto so agtayon balot atawayan lapud kasalanan?

⁵ Pian namoriay inkagrabe na kasalanan tan saray epekto na satan, nepeg tayon talosan no antoy intarok na kasalanan ed sikatayo. Nayarin diad primero et mairap a talosan itan ta agtayo nin balot atawayan so bengatlan naandi lapud kasalanan, salanti, say perpekton bilay. Diad gapo et nanggayagaan itan di Adan tan Eva. Lapud perpektoy kanonotan tan laman da, sarag dan pilien a kontrolen so panagnonot, liknaan, tan kiwas da. Sirin, sarag dan itultuloy a bayuboan iray alay abig a kualidad bilang lingkor nen Jehova a Dios. Balet, pinirdi da itan a mabmablin regalo. Pinili ray mankasalanan ed si Jehova, kanian abalang da imay klase na bilay ya inggagala nen Jehova parad sikara tan ed saray ilalak da. (Gen. 3:16-19) Ontan met, intarok da’d inkasikara tan ed sikatayo so teriblin “sakit” a pantotongtongan tayo, salanti, say kasalanan. Makatunongan labat a kinondena ira nen Jehova. Balet, walay ilalon kililiktar ya iyoopresi to ed sikatayo.​—Sal. 103:10.

Antoy Insakripisyo nen Jesus Pian Niliktar Itayo?

6, 7. (a) Kapigan primeron impaamta nen Jehova a say kililiktar tayo et mankaukolan na balbaleg a sakripisyo? (b) Antoy naaralan tayo ed impangibagat di Abel tan saramay patriarkan nambilay antis na Ganggan?

⁶ Amta nen Jehova a balbaleg so isakripisyo to pian niliktar iray ilalak nen Adan tan Eva. Diad propesiya a walad Genesis 3:15, naamtaan tayo so nipaakar ed satan a panangiliktar. Mangitarya si Jehova na sakey ya “ilalak,” sakey a manangiliktar, a maneral ed si Satanas. Balet, satan a manangiliktar et ondalan ed irap, ya aliling to et nasugat ed mukor. Maseguron ansakit tan makapairap itan. Balet, anto kasi kabaliksan na satan? Anto kasi kaukolan a sungdoan na samay Pinili nen Jehova?

⁷ Pian niliktar so katooan ed kasalanan, kaukolan a naandi iray epekto na satan. Samay manangiliktar sirin et kaukolan a mangitaryay panakbong ed kasalanan pian makapipulangan  so katooan ed Dios. Anto so lalanoren na satan? Nensaman et wala la ray pakapatnagan a kaukolan so sakey a bagat. Sanen si Abel, say sankaunaan a matoor a too, et angibagat na ayep ed si Jehova, sikatoy inabobonan na Dios. Diad saginonor, saray matakot ed Dios a patriarkan di Noe, Abraham, Jacob, tan Job et nambagat met, tan satan et amaliket ed Dios. (Gen. 4:4; 8:20, 21; 22:13; 31:54; Job 1:5) Kalabas na pigaran siglo, mas indanet na Mosaikon Ganggan so nipaakar ed panagbagat.

8. Anto so gagawaen na atagey a saserdote diad tinaon ya Agew na Pananakbong?

⁸ Kaiba ed saray sankaimportantian a bagat a kinaukolan na Ganggan et saramay iyaapay diad tinaon ya Agew na Pananakbong. Diad satan ya agew, walaray mantutumbokan a masimbolikon gawaen na atagey a saserdote. Sikatoy mangiyaapay na bagat ed si Jehova ya onkanan panakbong ed saray kasalanan​—unona et parad saray saserdote tan arum nin Levita, insan parad arum nin Israelita. Onloob so atagey a saserdote ed Sankasantosan a silir ed tabernakulo odino templo. Sikato labat so nayarin onloob ditan tan nagawaan to labat itan diad satan ya agew. Ditan et ipatedter to so dala na saray bagat ed arapan na kaban na sipan. Diad petek na satan a sagradon kaban et walay onleletaw no maminsan a masnag tan maliwliwawan lurem, a mangirerepresenta ed kiwawala nen Jehova a Dios.​—Exo. 25:22; Lev. 16:1-30.

9. (a) Diad Agew na Pananakbong, siopay irerepresenta na atagey a saserdote, tan anto so isisimbolo na saray bagat ya inyapay to? (b) Anto so isisimbolo na inloob na atagey a saserdote ed Sankasantosan a silir?

⁹ Si apostol Pablo so apuyanan a mangipaamtay kabaliksan na saratan. Impabitar to a say irerepresenta na atagey a saserdote et say Mesias, si Jesu-Kristo, tan say pangiyapay ed saray bagat et mangisisimbolo ed masakripisyon impatey nen Kristo. (Heb. 9:11-14) Satan a perpekton bagat so mangitarya na peteg a pananakbong parad duaran grupo na totoo​—say makasaserdoten grupo na alanaan iran agagi nen Kristo a manbilang na 144,000, tan say ‘arum a karnero.’ (Juan 10:16) Say inloob na atagey a saserdote ed Sankasantosan a silir et mangisisimbolo ed iloob nen Jesus ed mismon tawen pian ipresenta ed arapan nen Jehova a Dios so balor na dondon bagat.​—Heb. 9:24, 25.

10. Unong ed propesiya na Biblia, antoray naeksperiensya na Mesias?

¹⁰ Malinew sirin a say panangiliktar ed saray ilalak nen Adan tan Eva et mankaukolan na baleg a sakripisyo. Kaukolan ya isakripisyo na Mesias so bilay to! Sayan katuaan et malinlinew ya indetalye na saray propeta ed Hebreon Kasulatan. Singa bilang, direktan imbaga nen propeta Daniel a say “Alanaan” o Mesias et “naekal,” odino napapatey, pian “nagawa so pipupulangan lapu ed inkauges.” (Dan. 9:24-26) Impasakbay nen Isaias a say Mesias et ipulisay, pasegsegangen, tan pateyen, odino sugaten, pian akoen iray kasalanan na agperpekton katooan.​—Isa. 53:4, 5, 7.

11. Diad antoran paraan ya impatnag na Anak nen Jehova so inkamabulos ton isakripisyoy inkasikato pian niliktar itayo?

¹¹ Antis a linma’d dalin, amta na bogbogtong ya Anak na Dios no antoy kaukolan ton isakripisyo pian niliktar itayo. Kaukolan toy  ondalan ed pinasyan irap tan ipapatey. Sanen impaamta iratan ed sikato nen Ama to, kasin sikatoy tinmakot odino nanrebelde? Andi, noagta mabulos a nampasakop ed instruksion nen Ama to. (Isa. 50:4-6) Ontan met, sanen wadiad dalin si Jesus, matulok ton sinumpal so linawa nen Ama to. Akin? Inter toy sakey a rason: “Inarok so Ama.” Tan nia ni sananey a rason to: “Andian so too na babaleg ya aro nen saya, a sakey a too italaga to so bilay to nipaakar ed saray kakaaro to.” (Juan 14:31; 15:13) Kanian say sakey a manunan rason no akin a posible so kililiktar tayo et say panangaro na Anak nen Jehova. Anggaman kinaukolan ton isakripisyoy perpekton bilay to bilang too, maliket ton ginawa itan pian niliktar itayo.

Antoy Insakripisyo nen Jehova?

12. Siopay akanlinawa ed pangitaryay dondon, tan akin ya intarya to itan?

¹² Aliwan si Jesus so Lapuan odino Angigagala na dondon bagat. Noagta, sayan panangiliktar et manunan kabiangan na linawa nen Jehova. Ipapatnag na saray imbaga nen apostol Pablo a say isisimbolo na samay altar ed templo a pangiyaapayan na bagat et say linawa nen Jehova. (Heb. 10:10) Kanian, no nipaakar ed kililiktar tayo panamegley na bagat nen Kristo, say manunan akautangan tayo et si Jehova. (Luc. 1:68) Panangipatnag itan na perpekton linawa to tan baleg a panangaro to ed katooan.​—Basaen so Juan 3:16.

13, 14. Panon ya ontulong so alimbawa nen Abraham pian naapresya tayoy ginawa nen Jehova parad sikatayo?

¹³ Anto so insakripisyo nen Jehova pian nipatnag toy ontan a panangaro to ed sikatayo? Mairap tayo itan a narandan. Balet, walay salaysay ed Biblia ya ontulong ed sikatayon natalosan itan. Kinerew nen Jehova ed matoor a toon si Abraham a gawaen to so bengatlan agaylay irap​—say pangibagat ed anak ton si Isaac. Si Abraham et sakey a maaron ama. Sanen akitongtong ed sikato si Jehova, tinukoy Toy Isaac bilang “say anak mo a bogbogtong, ya inad-arom.” (Gen. 22:2) Anggaman ontan, parad si Abraham et mas importante so panggawa ed linawa nen Jehova nen say panangaro to ed si Isaac. Si Abraham et tinmulok. Balet, ag-inabuloyan nen Jehova a gawaen nen Abraham so bengatlan gawaen Ton mismo ed arapen. Angibaki so Dios na anghel pian pugeray Abraham nen kuanto lan ibagat so anak to. Ontan lay inkadeterminado nen Abraham ya unoren so Dios to ed sayan mairap a subok, ya inisip to a seguradon nanengneng to labat so anak to a mabilay lamet diad kioli. Sigpot so pananisia to a gawaen na Dios itan a pamaoli. Inkuan nen Pablo ya inawat nen Abraham si Isaac panamegley na kikiolin walay ‘iyaaliling to.’​—Heb. 11:19.

¹⁴ Naisip yo ta so sakit ya alikna nen Abraham legan ton ipaparaan so pangibagat ed anak to? Say agawa ed si Abraham et ontulong pian niyilustra so pangibagat nen Jehova ed samay sakey a tinawag ton ‘Ana’ko ya inad-arok.’ (Mat. 3:17) Balet ta nibagan mas grabe so sakit ya alikna nen Jehova. Sikaran sanama et abaybayag lan sanulop, diad minilyon, nayarin binilyon ni ingen a taon. Maliket ya akikimey so Anak ed Ama to bilang inad-aron “uloen a komikimey” tan Pinagkasangiyan to, “say Verbo.”  (Uli. 8:22, 30, 31; Juan 1:1) Agtayon balot narandan no antoy sinungdoan nen Jehova legan a say Anak to et papairapen, mumudmoraen, tan pinatey a singa kriminal. Talagan balbaleg so insakripisyo nen Jehova pian niliktar itayo! Panon tayo sirin a nipatnag so panamabli ed satan a panangiliktar?

Panon Mon Nipatnag a Papablien Mo so Panangiliktar?

15. Panon ya akompleto nen Jesus so matalonggaring a ginawa ton pananakbong, tan antoy nagmaliw a posible lapud satan?

¹⁵ Akompleto nen Jesus so matalonggaring a ginawa ton pananakbong kayari na inkioli to ed tawen. Ditan et akaiba to lamet so inad-aro ton Ama tan impresenta to’d Sikato so balor na bagat to. Nanresulta itan ed daakan a bendisyon. Nagmaliw lan posible so sigpot a kaperdonay kasalanan, unona, na saramay alanaan ya agagi nen Kristo, insan na saramay “lapag na mundo.” Lapud satan a bagat, amin a masimoon a magbabawi natan ed saray kasalanan da tan magmaliw a tuan papatumbok nen Kristo et nawalaan ira na malinis a talindeg ed arap nen Jehova a Dios. (1 Juan 2:2) Panon kan nagunggonaan ed satan?

16. Iyilustra no akin a nepeg tayon apresyaen so panangiliktar nen Jehova ed sikatayo.

¹⁶ Pawilen tayo pa imay ilustrasyon diad gapo. Kunwari et samay doktor ya akadiskobre ed tambal et linma ed kuarton kawalaan yo tan inkuan to: Siopaman a pasyentin manpatambal tan tumboken toy amin ya instruksion et seguradon onabig. Panon to no ag-itan awaten na saray kaparam a pasyente, ya irarason dan masyadon marama so iyinum na tambal tan mairap a tumboken iray instruksion? Aligen mo ra kasi, anggano walay mabiskeg ya ebidensya a talagan epektibo imay tambal? Siempre andi! Seguradon misalsalamat ka lapud satan a tambal tan tumboken mon maong iray instruksion na doktor. Ompan ibagam ni ingen ed arum so desisyon mo. Mipadpara, nepeg a panggunaetan na balang sakey ed sikatayo ya ipatnag ed si Jehova a talagan aapresyaen tayo so panangiliktar to, a nagmaliw a posible panamegley na dondon bagat na Anak to.​—Basaen so Roma 6:17, 18.

17. Panon mon nipatnag so apresasyon mo ed ginawa nen Jehova pian iliktar ka?

¹⁷ No apresyaen tayoy ginawa nen Jehova tan say Anak to pian iliktar itayo manlapud kasalanan tan patey, nepeg a napatnagan itan ed sikatayo. (1 Juan 5:3) Labanan tayo so tendensyan mankasalanan. Agtayon balot aabuloyan so inkasikatayon lamlamen so ginagalan panaggaway kasalanan a manresulta ed doblin estandarte na kabibilay. Ta no ontay pambilay tayo, singa tayo la ibabagan agtayon balot papablien odino aapresyaen so dondon. Imbes et ipatnag tayoy apresasyon diad panggunaet tayon mansiansian malinis ed arapan na Dios. (2 Ped. 3:14) Nipatnag tayo itan diad pangibaga ed arum nipaakar ed alay abig ya ilalo tayo a kiliktar, pian nawalaan met ira na malinis a talindeg ed si Jehova tan andi-anggaan ya ilalo diad arapen. (1 Tim. 4:16) On, peteg a si Jehova tan say Anak to so makanepegan a pangiteran tayo na amin a panaon tan biskeg tayo parad kirayewan da! (Mar. 12:28-30) Nonoten pa itan! Makapanilalo itayon onsabi panaon et sigpot tayo lan nibulos ed kasalanan. Makapambilay itayo la unong ed samay talagan inggagala na Dios​—perpekto itayo la ed andi-anggaan, amin na saraya et lapud ginawa nen Jehova pian iliktar itayo!​—Roma 8:21.

[Paimano ed Leksab]

Panon Mon Ebatan?

• Akin et kakkaukolan moy panangiliktar?

• Antoy epekto ed sika na impangisakripisyo nen Jesus ed inkasikato?

• Anto so naliliknam ed regalo nen Jehova a dondon?

• Napapakiwas kan gawaen so anto lapud saray intarya nen Jehova pian iliktar ka?

[Tepetepet Parad Panagaral]

[Litrato ed pahina 27]

Diad Agew na Pananakbong, irerepresenta na atagey a saserdote ed Israel so Mesias

[Litrato ed pahina 28]

Dakdakel so naaralan tayo nipaakar ed baleg a sakripisyo nen Jehova diad samay inkamabulos nen Abraham ya iyapay so anak to