¿Salvamänapaq Jehová ruramonqanta valorantsikku?

“Israel marca mayicuna, llapantsic grasiasta qor, ¡alabashun Diosnintsicta! Pemi noqantsicta rescatamarnintsic, salbam[arqontsic].” (LUC. 1:68.)

1, 2. a) ¿Ima ejemplotaq rikätsimantsik kawënintsik pasëpa mana allichö këkanqanta? b) ¿Ima tapukïkunapa respuestantataq kë tëmacho yachakushun?

KËMAN yarpäri, hospitalchö këkankiman. Y tsë këkanqëki cuartochöqa llapan qeshyaqkunapis qam qeshyanqëki mana hampikätsina qeshyallawan qeshyëkäyanman. Pero tsëpita musyarinki huk doctor tsë qeshyapaq hampita tarinampaq pasëpa estudiëkanqanta. ¡Imanö kushishqaraq shuyëkunkiman tsë qeshyapaq hampita tariramunanta! Alläpa afanakonqanchö y hasta kaponqantapis gastarnin ashenqanchö tariramun. ¿Imanötaq tikrarinkiman hampita tarirenqanta musyarirnin? ¡Imaraq tsë doctorta agradecikïkunkiman y respetëkunkiman qamta y wakintapis wanïpita salvëkuyäshonqëkipita!

² Itsa, noqaqa manam tsënö qeshyawantsu këkä ninkiman, pero alleq yarpachakurishqaqa tsë qeshyayoqpitapis más peorchömi këkantsik, pï karpis raslla salvëkamänatam wanantsik (lei Romanos 7:24). Y tsë salvamaqnintsikqa kayan Jehoväwan Tsurin Jesusmi y salvamänapaqqa pipis mana rurëta puëdenqantam rurayämushqa. Tsëmi kë tëmachoqa chusku tapukïkunapa respuestanta yachakushun: ¿Imanirtaq wanantsik  o ministintsik libramanantsikta? ¿Imatataq Jesus pagakunan karqan libramänapaq? ¿Jehoväqa ëka chanintataq pagakunan karqan? ¿Y imanötaq rikätsikushun Jehoväwan Jesus libramanapaq rurayämonqanta pasëpa valoranqantsikta?

¿Imanirtaq wanantsik libramänantsikta?

3. ¿Imanirtaq muyakoq qeshya cuentam nintsik hutsapaqqa?

³ Tsëllaraq huk willakoqmi 1918 watachö yurimoq atska chunka millón nunakunata wanutsenqan gripe española qeshyapaq nerqan, tsë tiempochö mëtsika nuna ushaq mantsëpaq muyakoq qeshya kanqanta. Pero kanmi wallkaq nunakunallata tsareq qeshyakunapis, pero tsarenqan kaqtaqa casi llapantam wanutsin. * Kananqa, Adan apamonqan hutsata muyakoq qeshyawan igualaratsishun. Romanos 5:12 nenqanmi kënö nin: “Adanmi jutsata rurecorqan, y tsenopam jutsa rure qallecorqan. Tserecurmi wani shamorqan. Tsemi que munducho llapan nunacuna jutsata rurarnin, wanuyan”. Awmi, hutsaqa llapan nunakunatam muyashqa y manam pipis sänoqa kantsu, llapantsikmi hutsayoq kantsik (lei Romanos 3:23). Tsë höraqa, ¿ëkaqtaq wanuyan hutsayoq kayanqampita? Apóstol Pablum qellqarqan ‘llapan nunacunam’ “wanuyan” nishpa.

4. ¿Imanötaq nuna rikan kawëta y imanötaq Jehová rikan?

⁴ Kanan tiempoqa wallkaq nunallam parlayanman hutsawan wani pasëpa mana allita apamonqanta. Rasunmi, ima desgraciawampis joven këkarlla wanuriyaptenqa mantsakäkuyan creïtapis puëdeyantsu, pero edäyar wanuyaptenqa tiemponnam karqan wanukunampaq niyan, tsënöpaq kamashqa kanqantsiktanö rikäyan. Nunaqa rasllam qonqarintsik wanïta Diosnintsik imanö rikanqantapis. Rasumpëpaqa, kawënintsikqa alläpa ichik tiempollam Diosnintsik qallananchö munanqampitaqa. Y Diosnintsikpa rikënimpaqqa manam ni pï nunallapis huk hunaqpita mastaqa kawashqatsu (2 Ped. 3:8). Tsëmi Diosnintsikpa Palabranqa willakun kawënintsikqa imëka ras pasareq wëtanölla, huk shutënölla o hamaninölla kanqanta (Sal. 39:5; 1 Ped. 1:24). ¿Imanirtaq këta yarparashwan? “Qeshyantsik” alläpa grave kanqanta musyarninmi más valorashun tsë tarikanqan hampita: libramänapaq Jehová llapan ruramonqanta.

5. ¿Imanö kawakïtataq oqrarerqontsik hutsarëkur?

⁵ Pasëpa mana allichö këkanqantsikta musyanantsikrëkur rikärishun hutsa imëka allikunata qechumanqantsikta. Itsa këta tanteanapaqqa sasa o aja kanman, hutsata manaraq rurar Adanwan Eva kayanqannö imëpis mana kashqa karnin. ¿Imanötaq pëkuna kayarqan? Adanwan Eva kawar qallayanqan witsanqa yarpëninkuna y cuerponkunapis hutsannaqmi karqan. Tsëmi yanapaq allillata yarpäyänampaq, shonqunkunata alleq tsaräyänampaq, llapan rurayanqampis allilla kanampaq, tsënöpa cada hunaq Diospa más alli sirveqninkuna tikrayänampaq. Tsënö kayanqanta valorayänampa rantinmi pëkunaqa despreciayarqan. Y Jehoväta mana wiyakurnenqa manam kikinkunapaq Jehová munanqanllatatsu oqrariyarqan, sinöqa noqantsikpaq kaqtawanmi (Gén. 3:16-19). Y manam tsëllapistsu, tsënö kayanqanwanmi apayämorqan tsë wanutsikoq qeshyata y muyayarqan llapan wambrankunata. Pero Jehoväqa alli ruraq Juez karninmi wanuyänampaq condenarerqan, pero noqantsiktaqa libramänantsikpaqmi awnimashqantsik (Sal. 103:10).

¿Imatataq Jesus pagakunan karqan libramänapaq?

6, 7. a) ¿Imëllapitanataq Jehová musyatsikorqan salvamänapaq huk chaniyoq pägotaraq wananqantsikta? b) ¿Abel y huk fiel nunakuna unë tiempochö animalta wanïkatsir kayäyanqan imatataq rikätsimantsik?

⁶ Jehoväqa musyarqanmi alläpa chaniyoq pägotaraq pagakunanta Adanpawan Ëvapa kastankunata hutsapita libranampaq. Génesis 3:15 nishqanchö qellqarëkaq profecïam musyatsimantsik tsë chaniyoq pago ima kanantapis. Jehoväqa qomänantsik karqan ‘mirënintam’, o  huk salvakoqtam, y pëmi tiempowan Satanasta chipyëpa ushakätsinan karqan. Pero tsë salvakoqqa atakanchö o chakinchömi huk pasëpa nanatsikoq herïdata chaskinan karqan. ¿Ima herïdatataq chaskinan karqan? ¿Ima hipakïpataq pasanan karqan Jehoväpa Akrashqan?

⁷ Llapan nuna salvacionta tariyänampaqqa, hutsampitaran perdonta chaskiyänan karqan, llapan hipakïkunaran ushakänan karqan, y Dioswanran amishtayänan karqan. Tsënöparaq salvacionta tariyänampaqqa ¿imatataq ruranan karqan tsë salvakoq? Adanwan Eva hutsata rurayanqanllapitanam musyakarqan huk sacrificioraq yanapakunanta. Abel shutiyoq punta fiel nunam, animalkunata wanïkatsir Diospaq kayaq tsërëkurmi Dioswan alli këta tareq. Y Noe, Abrahan, Jacob, Job y huk fiel nunakunapis tsënöllam rurayaq y Diosqa tsë llapan rurayanqanta kushishqam chaskeq (Gén. 4:4; 8:20, 21; 22:13; 31:54; Job 1:5). Tsëpita tiempowannam Jehoväpa Leyninqa más cläronö willakorqan israelïtakuna sacrificiota imanö rurayänampaqpis.

8. ¿Imatataq ruraq sumo sacerdote hutsankunapita perdonta chaskiyänampaq sacrificiota rurayanqan hunaqchö?

⁸ Huk más precisaq kaqqa karqan Ley mandakonqannö watachö huk kuti hutsankunapita perdonta chaskiyänampaq sacrificio rurayanqanmi. Cada wata fiestachö sumo sacerdote ruranqanqa shamoq tiempochö Jesus ruranampaq kaqtam rikätsikorqan. Kënömi ruraq, hutsankunapita perdonta chaskiyänampaqmi Jehoväpaq sacrificiota ruraq, puntataqa sacerdote kastakunapaq y tsëpitanam llapan israelïtakunapaq. Tsëpitanam yëkoq tabernaculopa o templopa Santïsimonman. Pëllam y tsë hunaqllam tsëmanqa yëkïta puëdeq. Tsëchönam wanutsiyanqan animalpa yawarninta pillchitseq arca del pacto nishqampa puntanman. Höraqa arca del pacto nishqampa hananchömi chipapëkaq pukutë yurireq, y tsëmi Jehová tsëchö këkanqanta rikätsikoq (Éxo. 25:22; Lev. 16:1-30).

9. a) Hutsapita perdonta chaskiyänampaq sacrificiota rurayanqan hunaq, ¿sumo sacerdote pï kanampaq kaqtataq rikätsikorqan? Y ¿animalkunata wanïkatsir kayayanqanqa imatataq rikätsikorqan? b) ¿Sumo sacerdote Santïsimoman yëkonqanqa imatataq rikätsikorqan?

⁹ Santo espíritu yanapaptinmi apóstol Pablu willakorqan kë rurëkuna shamoq tiempochö imapaq kanqantapis. Willakorqanmi, tsë sumo sacerdotepa rantin Mesias o Jesucristu kanqanta, y animalkunata wanïkatsir Diospaq kayayanqanqa wanunampaq kaq kanqanta (Heb. 9:11-14). Tsë hutsannaq nuna wanunqanrëkurmi ishkë grupo nunakuna perdonta chaskiyänan karqan: ciëlopa ewaqpaq kaq 144.000 Cristupa wawqinkuna y “mana yupetapis puedipaq” atskaq nunakuna o Cristupa wakin kaq ‘üshäncunapis’ (Juan 10:16). Sumo sacerdote Santísimo nishqanman yëkonqanqa, rikätsikorqan Jesus kawariramurnin ciëloman yëkonqantam y tsëchömi wanonqampa valorninta presentarqan (Heb. 9:24, 25).

10. Biblia willakonqannö ¿imataq pasanan karqan Diosnintsik awnikushqan Mesiasta?

¹⁰ Rikanqantsiknöpis, Adanpawan Ëvapa kastankuna hutsapita librashqa kayänampaqqa alläpa chaniyoq pägoran pagakänan karqan: Mesïasmi wanunan karqan. Escrituras Hebreas nishqanchö profëtakunapis alleq clärom këta willakuyarqan. Tantearinapaq, Danielmi nerqan “pushakoq Mesías” hutsata limpianampaq ‘wanunanta’ (Dan. 9:24-26). Hina Isaiaspis nerqanmi, mana kaqpaqmi churayanqa, qatikachäyanqam,  tuksïkäyanqam, o wanutsiyanqam, llapan nunapa hutsantam apakonqa (Isa. 53:4, 5, 7).

11. ¿Imanötaq Diospa Tsurin rikätsikorqan salvamänantsirëkur wanunampaq listo këkanqanta?

¹¹ Manaraq kë patsaman shamurmi Diospa kuyë Tsurenqa musyarqanna nunakunata salvanampaqqa, alläpa chaniyoq o huk hatun safriciotaraq rurananta, alläpa hipananta, y hasta wanunantapis. Kë llapampa pasananta Teytan willaptin, ¿mantsartsuraq manam rurashaqtsu nerqan? Manam. Kushishqam Teytan llapan nenqanta rurarqan (Isa. 50:4-6). Kë patsachö këkarpis llapanchömi Teytanta wiyakorqan. ¿Imanir? Kikinmi rikätsikorqan: “Dios Yayata cuyanqäta nunacuna musyayänanpaqmi” nirnin. Tsëpitanam kënö nerqan: “Que cuyaquimi cuyaqueqa manam pipis wanurinmantsu amiguncunapaqrecur” (Juan 14:31; 15:13). Tsëmi salvaciontaqa tarintsik Jesus kuyamanqantsikpitawanraq. Hutsapita salvamänapaq Teytan mandaptimpis, kikimpis listom këkarqan tsëta ruranampaq.

Jehová chaniyoqta pagakonqan

12. ¿Pï disponishqa kaptintaq salvacionta chaskerqontsik, y ima cumplikänampaqtaq tsë sacrificio rurakarqan?

¹² Yarpänantsikmi, noqantsikrëkur wanunampaqqa manam kikin Jesustsu disponerqan. Tsëtaqa Jehovämi disponerqan, tsurin wanonqanwan munënin cumplikänampaq. Apóstol Pabluqa, santo espíritu yanapaptinmi rikätsikorqan templochö sacrificio rurayanqanqa, Diospa voluntadnin kanqanta (Heb. 10:10). Tsëmi alläpa agradecikushwan Jehová salvamänantsikpaq disponenqanta, Pë munaptinmi tsë llapan rurakarqan (Luc. 1:68). Hinamampis, tsëwanmi rikätsimarqontsik nunakunata alläpa kuyanqanta (lei Juan 3:16).

13, 14. ¿Imanötaq Abrahan ruranqan yanapamantsik Jehová ruranqanta alläpa valoranapaq?

¹³ Nunakunata alläpa kuyanqanta Jehová rikätsinampaqqa, ¿ima valoryoqtataq pagakunan karqan? Yarpakacharllaqa manachi tantiëta puëdeshwantsu, pero Bibliachö huk willakïta tarenqantsikmi yanaparamäshun. Jehovämi nerqan fiel sirveqnin Abrahanta, tsurin Isaacta sacrificänampaq. Kë rurëqa Abrahanpaq manam fäciltsu karqan, pëqa alläpam tsurinta kuyaq. Y tsëtaqa Jehová musyarqanmi, tsëmi “kuyanqëki hapallan wambrëki” nerqan (Gén. 22:2). Tsënö kaptimpis Abrahanqa musyarqanmi Diosnin mañanqan más precisaq kanqanta tsurinta kuyanqampitapis, tsëmi cäsokur Dios mandanqanta rurarqan. Pero Jehoväqa manam permiterqantsu Abrahan tsurinta wanutsinantaqa, tiempowan kikin tsënö ruranan kaptimpis, tsëmi huk angelta kachëkorqan manaraq tsurinta wanutsiptin. Abrahanqa listom këkarqan Dios nenqanta ruranampaq, y musyarqanmi tsurin wanunanta, y kawarimuptinraq rikärinanta. Tsënö këkarpis Pëqa pasëpam markäkorqan Dios kawaritsinanman. Tsëmi Pablu kënö nerqan: “Isaacta wanushqanpita cawarishqa cuentatana[m] Abraham chasquerqan” (Heb. 11:19).

¹⁴ ¿Imanöraq Abrahan shonqunchö nanatsikorqan tsurinta sacrificänampaq alistanqan hora? Tsëtaqa manachi ichikllapis tantiëta puëdeshwantsu. Tsëqa rikätsikun ‘cuyë Tsurïn’ noqantsikrëkur wanuptin Jehová shonqunchö alläpa nanatsikonqantam (Mat. 3:17). Pero Jehová shonqunchö nanatsikonqanqa más hatunmi karqan. Kuyë Tsurinwanqa mana yupëtapis puëdepaq atska millón watakunam Jehoväqa  ciëlochö paqta karqan. Kë ‘maestroqa’ teytampa lädonchö alläpa kushishqam trabajarqan y willakoqnimpis karqanmi (Pro. 8:22, 30, 31; Juan 1:1). Tsurinta tukïta rurar castigar, burlakur llakitsiyaptin y imëka wanutsikoqtanö wanikätseqta rikar Jehová shonqunchö pasëpa nanatsikonqantaqa manachi tantiëta puëdeshwantsu. ¡Alläpa chaniyoq hatun sacrificiotam rurarqan salvamänantsikrëkur! ¿Imanötaq tsë ruramonqanta valoranqantsikta rikätsishwan?

¿Imanötaq rikätsikuntsik libramanqantsikta alläpa valoranqantsikta?

15. a) ¿Hutsankunapita perdonta chaskiyänampaq animalkunata wanïkatsir kayayanqanta imanötaq Jesus completarqan? b) ¿Tsë wanunqanwanqa ima bendicionkunatataq apamushqa?

¹⁵ Hutsankunapita perdonta chaskiyänampaq animalkunata wanïkatsir kayayanqantaqa, Jesusmi paqwë completarerqan kawariramur y ciëlota kutikurnin. Kuyë Teytanman tinkurirnam, wanïnimpa valorninta entregarqan. ¿Wanonqanwan ima bendicionkunatataq apamushqa? Hutsantsikpitam chipyëpa perdonta chaskintsik, puntataqa ciëlopa ewaqpaq kaqkuna y tsëpitanam ‘jinantin marcacunacho nunacuna’. Jesus wanunqanrëkurmi shonqunkunapita patsë hutsankunapita arrepentikoqkunaqa y Jesuspa qateqnin tikraqkunaqa Jehoväwan alli këta tariyanqa (1 Juan 2:2). ¿Imanötaq këqa noqantsikta yanapamantsik?

16. ¿Ima ejemplotaq rikätsimantsik Jehová salvamanqantsikpita agradecido kanantsikpaq?

¹⁶ Kutirishun Doctorpaq parlanqantsikman. Këman yarpäri: këkanqëki cuartoman chäramur llapan qeshyaqkunata niyäshunkiman, hampitam tarerqö qeshyëkikunapaq y këwanqa pasëpam kachakäyanki, pero kachakäyanëkipaqqa mana pantëpam niyanqäta rurayänëki kachakäyanqëkiyaq. Tsënö kaptimpis, wakinqa doctor nenqanta rurëta munayantsu alläpa sasam o ajam nirnin. ¿Imataraq qamqa rurankiman? ¿Tsë hampi mëläya alli këkaptimpis, manam munätsu ninkimantsuraq? ¡Manachi! Alläpa agradecïdochi kankiman y doctor llapan nenqantachi rurankiman. Y manachi tsëllatatsu rurankiman, wakin qeshyaqkunatapis animankimanchi Doctor nenqanta rurayänampaq. Tsënöllam noqantsikpis, llapan shonquntsikwan Jehoväta agradecikonqantsikta rikätsita puëdentsik tsurimpa kawëninwan libramanqantsikpita (lei Romanos 6:17, 18).

17. ¿Imanötaq agradecido kanqantsikta rikätsikushwan salvamänapaq Jehová ruranqanta?

¹⁷ Jehovätawan Tsurinta hutsapita y wanïpita salvamanqantsikpita alläpa agradecido kanqantsiktaqa rikätsishun pëkuna munayanqannö kawakurninmi (1 Juan 5:3). Mana alli munënintsikta y rurënintsiktam vencishun y ama ardëpaqa hutsa rurëta tïrashuntsu, hina manam ishkë cärayoq kashwantsu pakëllapa mana allikunata rurar. Tsëta rurarqa, Jesucristu wanonqampita agradecikonqantsikta y valoranqantsiktam manam rikätsikushuntsu. Tsëpa rantenqa, Diosnintsikpa rikënimpaq limpio kawakunapaq sinchikushun y tsënöpam rikätsishun alläpa agradecido kanqantsikta (2 Ped. 3:14). Hina nunakunatapis parlapäshunmi Diosnintsik tukï mana allikunapita libraramänata, tsënöpa pëkunapis Jehoväta reqiyänampaq y mana wanushpa kawakïta tariyänampaq (1 Tim. 4:16). Tsëmi Jehovätawan Jesustaqa llapan tiempontsikwan y kallpantsikwan servinantsik, ¿tsënöllaku qampis yarpanki? (Mar. 12:28-30.) Llapantsikmi shuyarantsik hutsapita libre këta y qallananchö Jehová munanqannö kawakïta: hutsannaq y mana wanushpa. Awmi, ¡libramänantsikrëkur Jehová ruramonqampitam kë llapan cumplikanqa! (Rom. 8:21.)

[Päginapa ura kuchunchö willakï]

¿Yarpankiku?

• ¿Imanirtaq salvamänantsik alläpa precisan?

• ¿Imatataq yachatsimantsik Jesus alli kawëninta haqirir noqantsikrëkur wanonqan?

• ¿Imataq ninki Jehová kuyë Tsurimpa kawëninwan salvamanqantsikpita?

• ¿Imanötaq Jehoväta agradecikunki salvamanqantsikpita?

[Yachakunapaq kaqpa tapukïninkuna]

[30 kaq päginachö dibüjukuna]

Hutsankunapita perdonta chaskiyänampaq sacrificiota rurayanqan hunaq sumo sacerdoteqa rikätsikorqa Mesias kanqantam

[31 kaq päginachö dibüjukuna]

Abrahan kuyë tsurinta sacrificänampaq listo këkanqanqa, rikätsimantsik Jehová hatun sacrificiota ruranqantam