Pe E Tāua iā te Oe le Laveaʻiga ua Faia e Ieova mo Oe?

“Ia viia Ieova le Atua o Isaraelu, ona ua silasila mai o ia ma laveaʻi i ona tagata.”—LUKA 1:68.

1, 2. E ono faataʻitaʻia faapefea le mataʻutia o le tulaga ua tatou iai i aso nei, ma o ā fesili o le a tatou talanoaina?

SEʻI faapea o loo e maʻi i se falemaʻi. O loo e i se potu o loo mamaʻi uma ai tagata i le maʻi e tasi, o se maʻi e leai se togafiti. Ina ua e iloa e iai se fomaʻi o loo faia se taumafaiga e saʻilia se togafitiga, ua e lagona ai ua iai se faamoemoe. Ua e faatalitali ma le naunau i se tala e uiga i saʻiliʻiliga a le fomaʻi. I se tasi aso, ua e iloa ai ua maua se togafitiga! Sa faia e lenei fomaʻi ni taumafaiga fitā ina ia maua ai le togafitiga. O ā ni ou lagona o le a iai? E mautinoa e lagona lou faaaloalo ma le lotofaafetai i le tagata na mauaina le togafitiga, lea ua laveaʻiina ai oe ma le toʻatele o isi mai le oti.

² E foliga mai atonu ua soona faatele naʻuā na faamatalaga, ae peitaʻi ua fetaui lelei ma le tulaga moni o loo tatou fesagaʻia. Ua sili atu le matuiā o le tulaga ua tatou iai nei i lo o le tulaga e pei ona faamatalaina. Ua tatou matuā manaʻomia lava se laveaʻi. (Faitau le Roma 7:24.) E telē se gaoioiga ua faia e Ieova ina ia laveaʻia ai i tatou. E tele foʻi ni faataulaga mataʻina na faia e lona Alo. Seʻi o tatou iloiloina la ni fesili autū se fā. Aiseā e tatou te manaʻomia ai se laveaʻiga? O le ā na faataulaga e Iesu ina ia laveaʻiina ai i tatou? O le ā na faia e Ieova ina ia laveaʻiina ai i tatou? E faapefea ona faaalia e tāua iā i tatou le laveaʻiga mai i le Atua?

 Le Pogai Tatou te Manaʻomia ai se Laveaʻiga

3. Ua faapefea ona faatusatusa le agasala i se faamaʻi pipisi?

³ E tusa ai ma se fua faatatau talu ai nei, o se tasi o faamaʻi pipisi e sili ona leaga i le talafaasolopito, o le fulū Sepania i le 1918, lea na maliliu ai le faitau miliona o tagata. E iai isi faamaʻi e sili atu ona mataʻutia. E ui e toʻaitiiti ni tagata e pisia ai, ae o le toʻatele lava o i latou e feoti ai. * Ae peitaʻi, e faapefea pe afai e tatou te faatusatusa le agasala i sea ituaiga faamaʻi? Manatu i upu o loo i le Roma 5:12: ‘Ua oo mai le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma auā ua agasala uma lava.’ Ua aafia tagata uma lava i le agasala. (Faitau le Roma 3:23.) E toʻafia tagata ua feoti ona o le agasala? Na tusi Paulo, ua oo mai le oti “i tagata uma” ona o le agasala.

4. O le ā le finagalo o Ieova i le umi o o tatou olaga, ma e faapefea ona ese lana silafaga mai i manatu o le toʻatele i aso nei?

⁴ O le toʻatele o tagata i aso nei e vaai i le agasala ma le oti o se mea masani. E latou te popole i le vave ona feoti ae leʻi taitai, ae galo ai le tulaga “masani,” o le oo mai o le oti ona ua faasolo ina matutua. E faigofie lava ona galo i tagata le finagalo o Lē na faia mea. Ua matuā puupuu lava lo tatou olaga nai lo o le mea na ia finagalo i ai. O le mea moni, e leai se tagata ua ola mo na o se “aso e tasi” i le silafaga a Ieova. (2 Pete. 3:8) Ua faapea mai le Afioga a le Atua, ua puupuu lava o tatou olaga e pei o le mutia. (Sala. 39:5; 1 Pete. 1:24) E manaʻomia ona tatou manatua lenā manatu. Aiseā? Pe afai e tatou te iloa le mataʻutia o le “faamaʻi” ua tatou aafia ai, e tatou te talisapaia atili ai le tāua o le “togafitiga”—o lo tatou laveaʻiga lea.

5. O le ā le mea ua tatou lē maua ona o le agasala?

⁵ Ina ia iloa le mataʻutia o le agasala ma ona aafiaga, e tatau ona tatou taumafai e malamalama i le mea ua faia e le agasala iā i tatou. Atonu e faigatā lenā mea i le taimi muamua, ona o le agasala ua tatou lē maua ai le tulaga na iai o tatou uluaʻi mātua. I le amataga na olioli Atamu ma Eva i le ola lelei atoatoa. Sa lelei atoatoa le mafaufau ma le tino, ma sa mafai ona la pulea o la mafaufauga, faalogona ma gaoioiga. O lea la, sa mafai ai ona faaauau pea ona la atiaʻe uiga mataʻina o ni auauna a le Atua. Nai lo lea, na la teena lenā meaalofa matagofie. E ala i le filifili e agasala iā Ieova, na melea ai e Atamu ma Eva ma le la fanau, le ituaiga olaga na fuafuaina e Ieova mo i latou. (Kene. 3:16-19) I le taimi e tasi, ua la faaoo iā i laʻua lava ma i tatou le “faamaʻi” mataʻutia lea na tatou talanoaina. Ua tonu ai ona faasalaina i laʻua e Ieova. Ae ua ia ofo mai iā i tatou le faamoemoe o le laveaʻiga.—Sala. 103:10.

Faataulaga na Faia e Iesu Ina ia Laveaʻi ai i Tatou

6, 7. (a) Na muaʻi faaalia faapefea e Ieova e telē se taulaga e manaʻomia mo lo tatou laveaʻiga? (e) O le ā e tatou te aʻoaʻoina mai i taulaga na ofo atu e Apelu, ma augātamā na soifua a o leʻi tuuina mai le tulafono?

⁶ Na silafia e Ieova e telē se taulaga e manaʻomia ina ia laveaʻi ai le fanau a Atamu ma Eva. I le valoaga o loo i le Kenese 3:15, ua tatou iloa ai le mea sa manaʻomia mo le laveaʻiga. O le a saunia e Ieova se “fanau,” o sē e laveaʻi, o lē o le a ia faaumatiaina Satani i se aso, ma tuʻimomomoina o ia e lē toe iai lava. Peitaʻi, o le a puapuagatia lē e laveaʻi a o faagasolo taimi, ma faamanuʻalia ai lona mulivae i se uiga faafaatusa. E matuā tigā lenā tulaga ma vaivai ai, ae o le ā e uiga i ai? O le ā e tatau ona onosaia e Lē ua Filifilia e Ieova?

⁷ Ina ia laveaʻi tagata mai le agasala, e saunia e lē e laveaʻi se auala e faia ai le togisala, ma faia ai se leleiga a tagata ma le Atua, i le  aveesea o āuga o le agasala. O le ā e aofia ai i lenā mea? I le amataga, sa iai ni faailoga e iloa ai o le a manaʻomia se taulaga. Ina ua ofoina atu e le uluaʻi tagata faamaoni o Apelu taulaga i manu iā Ieova, sa ia maua le faamaoniga a le Atua. Mulimuli ane, na ofo atu e augātamā e matataʻu i le Atua e pei o Noa, Aperaamo, Iakopo, ma Iopu taulaga faapena na fiafia i ai le Atua. (Kene. 4:4; 8:20, 21; 22:13; 31:54; Iopu 1:5) I senituri mulimuli ane, na faailoa atili mai ai e le Tulafono a Mose i tagata, le tāua o le taulaga.

8. O le ā na faia e le ositaulaga sili i le Aso o le Togisala?

⁸ I taulaga aupito sili ona tāua sa manaʻomia i le Tulafono, o taulaga ia sa ofoina atu i le Aso o le Togisala. I lenā aso, e fai ai e le ositaulaga sili se faasologa o gaoioiga faafaatusa. E na te ofoina atu taulaga iā Ieova ina ia totogi ai agasala—muamua, o agasala a le vasega o ositaulaga, ona sosoo ai lea ma ituaiga e lē o ni ositaulaga. E ulu atu le ositaulaga sili i le mea e Sili Ona Paia o le fale fetafaʻi po o le malumalu, lea e na o ia e mafai ona ulu atu i ai i lea aso e tasi o le tausaga. O inā e na te sausau ai le toto o taulaga i luma o le atolaau o le feagaiga. I luga aʻe o lenā atolaau paia, e aliaʻi mai ai i nisi taimi se ao pupula, e faaatagia ai le faatasi ai o Ieova le Atua.—Eso. 25:22; Levi. 16:1-30.

9. (a) O ai na faaatagia ai le ositaulaga sili i le Aso o le Togisala, ma o le ā na faaatagia ai taulaga na ia ofoina atu? (e) O le ā na faaatagia ai le ulu atu o le ositaulaga sili i le mea e Sili ona Paia?

⁹ Sa faagaeeina le aposetolo o Paulo e faailoa mai le uiga o na gaoioiga faafaatusa. Na ia faaalia o le ositaulaga sili, e faaatagia ai le Mesia, o Iesu Keriso, a o le ofoina atu o taulaga, ua faaatagia ai le maliu faataulagaina o Keriso. (Epe. 9:11-14) O lenā taulaga lelei atoatoa ua saunia ai se togisala mo vaega e lua o tagata—le vasega faaositaulaga a Keriso e 144,000, o ona uso ua faauuina i le agaga, ma “isi mamoe.” (Ioa. 10:16) Pe a ulu atu le ositaulaga sili i le mea e Sili ona Paia, ua ia faaatagia ai le ulu atu o Iesu i le lagi, e ofo atu iā Ieova le Atua le tāua o le taulaga togiola.—Epe. 9:24, 25.

10. O ā mea na faaalia e valoaga o le Tusi Paia o le a oo i le Mesia?

¹⁰ E manino mai, o le laveaʻiina o le fanau a Atamu ma Eva e manaʻomia ai se taulaga telē. E ao ona faataulagaina e le Mesia lona soifua! Na taʻu mai e perofeta o Tusitusiga Eperu ni auʻiliʻiliga manino e uiga i lenei upu moni. O se faaaʻoaʻoga, na taʻua tuusaʻo e le perofeta o Tanielu e faapea, o le a “fasiotia” pe faasalaina i le oti “le Mesia le Alii,” ina ia “fai ai . . . le togiola mo agasala.” (Tani. 9:24-26) Na valoia e Isaia o le a teena le Mesia, sauāina, ma faasalaina i le oti, pe faamanuʻalia, ona o agasala a tagata lē lelei atoatoa.—Isa. 53:4, 5, 7.

11. O ā auala e faaalia ai na finagalo malie le Alo o Ieova e faataulaga o ia lava, ina ia laveaʻiina ai i tatou?

¹¹ A o leʻi afio mai i le lalolagi, sa silafia e le Alo e toʻatasi o le Atua, le mea e manaʻomia mo ia ina ia laveaʻia ai i tatou. E tatau ona matuā puapuagatia o ia ma iʻu lava ina fasiotia. Ina ua faailoa atu e lona Tamā iā te ia na upu moni, pe na ia faatalatū ma tetee? I le isi itu,  na ia gauaʻi ma le lotomalie i faatonuga a lona Tamā. (Isa. 50:4-6) A o iai i le lalolagi, sa faapena foʻi ona usiusitai Iesu i le faia o le finagalo o lona Tamā. Aiseā? Na ia saunia se tali e ala i upu nei: “Ou te alofa i le Tamā.” Na ia toe tali e faapea: “E leai lava se tasi e sili atu lona alofa nai lo o lenei, o le foaʻiina atu lea e se tasi o lona ola mo ana uō.” (Ioa. 14:31; 15:13) Ua laveaʻiina la i tatou ona o le tele o le alofa o le Alo o Ieova. E ui lava sa tatau ona faataulagaina lona ola lelei atoatoa, ae sa ia fiafia ina ia laveaʻiina ai i tatou.

Le Mea na Faia e Ieova Ina ia Laveaʻiina ai i Tatou

12. O le finagalo o ai ua faailoa mai i le togiola, ma aiseā na ia saunia ai?

¹² E lē o Iesu na filifilia le faia o le taulaga togiola po o le auala e fai ai. Nai lo o lea, o lenei auala mo le laveaʻiina, o le vala autū lea o le finagalo o Ieova. Na taʻua e le aposetolo o Paulo e faapea, o le fata faitaulaga i le malumalu lea sa ofo atu ai taulaga, ua faaatagia ai le finagalo o Ieova. (Epe. 10:10) O lona uiga la, o le laveaʻiga ua tatou maua e ala mai i le taulaga a Keriso, o le mea aupito sili lea o loo tatou nofo aitalafu ai iā Ieova. (Luka 1:68) O le faailoaga lea o lona finagalo atoatoa ma le tele o lona alofa i tagata.—Faitau le Ioane 3:16.

13, 14. E faapefea i le faaaʻoaʻoga a Aperaamo ona fesoasoani iā i tatou, e talisapaia ai le mea ua faia e Ieova mo i tatou?

¹³ O le ā na faataulaga e Ieova e faaalia ai lona alofa iā i tatou? E faigatā iā i tatou ona malamalama i ai. Peitaʻi, o loo iai se tala i le Tusi Paia e mafai ona fesoasoani iā i tatou e malamalama lelei ai i le mataupu. Na fetalai atu Ieova i le tagata faamaoni o Aperaamo e fai se mea e sili ona faigatā—ia ofo atu lona atalii o Isaako e fai ma taulaga. O le mea moni, o Aperaamo o se tamā alofa. Na fetalai atu Ieova iā te ia e faatatau iā Isaako e faapea, “o lou atalii e toʻatasi, o lē ua pele iā te oe.” (Kene. 22:2) Peitaʻi, na iloa e Aperaamo, o le faia o le finagalo o Ieova e sili atu ona tāua, nai lo o lona alofa iā Isaako, ma sa usiusitai Aperaamo. Peitaʻi, e leʻi faatagaina e Ieova Aperaamo e faia le mea o le a Ia faia i se aso. Na auina mai e le Atua se agelu e taofia Aperaamo a o toetoe lava ia faia le taulaga i lona atalii. Sa matuā maumauaʻi Aperaamo e usiusitai i lona Atua i lenei tofotofoga faigatā, auā na ia mautinoa e pau le auala e toe vaai ai iā Isaako, o le toetū. Ae sa ia faatuatua atoatoa o le a faia e le Atua lenā toetū. O le mea moni, na taʻua e Paulo na maua e Aperaamo Isaako e ala i le toetū “i se auala faafaatusa.”—Epe. 11:19.

¹⁴ Pe e mafai ona faaāta i lou mafaufau tigā na oo iā Aperaamo a o sauni e ofo atu lona atalii? O lona uiga, e fesoasoani le mea na oo iā Aperaamo e faataʻitaʻia mai ai lagona o Ieova, ina ua faataulagaina lē na ia taʻua “o loʻu Atalii pele.” (Mata. 3:17) Ae ia manatua, e sili atu ona ogaoga tigā na oo iā Ieova. Sa la olioli faatasi ma lona Alo i le faitau miliona po o le faitau piliona foʻi o tausaga. Sa galulue fiafia le Alo faatasi ma lona Tamā e avea ma ana “tufuga” pele ma o lana Fofoga Fetalai, o “le Upu.” (Faata. 8:22, 30, 31; Ioa. 1:1) O mea  na onosaia e Ieova a o faapuapuagatia, tauemua, ma iʻu ina fasiotia lona Alo o se tagata solitulafono, e sili mamao atu i lo o mea ua tatou iloa. E telē se faataulagaina na faia e Ieova ina ia laveaʻiina ai i tatou! E faapefea la ona faaalia e tāua iā i tatou lenā laveaʻiga?

E Faapefea Ona E Faaalia e Tāua iā te Oe le Laveaʻiga?

15. Na faapefea ona faaiʻuina e Iesu le gaoioiga sili o le togisala, ma o le ā ua mafai ona faia ona o lenei mea?

¹⁵ Na faaiʻuina e Iesu le gaoioiga sili o le togisala ina ua toe faatūina o ia i le lagi. Ina ua toe aufaatasi ma lona Tamā pele, na ia tuuina atu ai iā te Ia le tāua o lana taulaga. Na sosoo ai ma le tele o faamanuiaga. Na maua ai le faamagaloga atoatoa, muamua, mo agasala a uso faauuina o Keriso, ona sosoo ai lea ma “le lalolagi atoa.” Ona o lenā taulaga, o i latou uma i aso nei ua salamō moni mai i a latou agasala, ma avea ma soo moni o Keriso, e mafai ona olioli i se faiā māfana ma Ieova le Atua. (1 Ioa. 2:2) E faapefea ona faatatau lenei tulaga iā te oe?

16. E faapefea ona faataʻitaʻia le pogai e ao ai ona tatou talisapaia le laveaʻiga ua faia e Ieova mo i tatou?

¹⁶ Seʻi o tatou toe foʻi i le talafaatusa na taʻua i le amataga. Sei faapea ua alu atu le fomaʻi lea na mauaina le togafitiga o le faamaʻi, i le potu o loo e iai faatasi ma isi maʻi, ma se tala e faapea: E so o se maʻi e na te talia le togafitiga ma usitai i faatonuga e tuuina atu, o le a malosi lona maʻi. Ae faapefea pe afai o le toʻatele o tagata mamaʻi e mumusu e usitaia faatonuga a le fomaʻi, ma finau atu e faigatā tele ona inu nei vai pe mulimuli i faatonuga mo le togafitiga? Po o le mea foʻi lenā o le a e faia, e ui ua e mautinoa e aogā le togafitiga? O le mea moni e leai! E lē taumatea o le a e faailoa atu le lotofaafetai i le togafitiga, ma mulimuli lelei i faatonuga, ma atonu e iʻu ina e taʻu atu i isi lau filifiliga. I se uiga e sili atu, e ao iā i tatou taʻitoʻatasi ona faailoa atu iā Ieova, lo tatou matuā talisapaia o le laveaʻiga ua ia faia, e ala i le taulaga togiola a lona Alo.—Faitau le Roma 6:17, 18.

17. O ā auala e faaalia ai lou talisapaia o le mea ua faia e Ieova e laveaʻiina ai oe?

¹⁷ Pe afai e tatou te talisapaia le mea ua faia e Ieova ma lona Alo, ina ia laveaʻiina ai i tatou mai le agasala ma le oti, o le a tatou faaalia atu la. (1 Ioa. 5:3) O le a tatou tau faasaga i o tatou faanaunauga e faia le agasala. E tatou te lē lolo atu i le faia ma le loto i ai o le agasala, ma taʻitaʻia atu ai i se olaga faafiaamiotonu uigalua. O lenā auala e taʻu atu ai, e lē tāua iā i tatou pe talisapaia le togiola silisili. Peitaʻi, o le a faaalia lo tatou talisapaia e ala i le galulue malosi e tausia pea se faiā lelei ma Ieova. (2 Pete. 3:14) O le a tatou faaalia e ala i le taʻu atu i isi o lo tatou faamoemoe matagofie o le laveaʻiga, ma atonu e mafai ai foʻi e i latou ona maua se tulaga mamā i le silafaga a Ieova, ma le faamoemoe mo se lumanaʻi e faavavau. (1 Timo. 4:16) E mautinoa lava le tatau ona tuuina atu iā Ieova ma lona Alo, o o tatou taimi uma ma le malosi, ina ia viia ai i laʻua! (Mare. 12:28-30) Seʻi mafaufau i ai! E mafai ona tatou taulaʻi atu i le taimi o le a togafitia atoatoa ai i tatou mai i le agasala. E mafai ona tatou ola i le olaga e pei ona finagalo i ai le Atua, e lelei atoatoa e faavavau—ua mafaia nei mea uma ona o le mea ua faia e Ieova e laveaʻiina ai i tatou!—Roma 8:21.

[Faaopoopoga i lalo]

O le a Faapefea Ona E Tali?

• Aiseā ua e manaʻomia vave ai se laveaʻiga?

• E faapefea ona aafia oe i le gaoioiga a Iesu o le faataulagaina o ia lava?

• O le ā sou lagona e uiga i le meaalofa a Ieova, o le togiola?

• O ā mea ua uunaʻia oe e faia ina ia tali atu ai, i sauniuniga ua faia e Ieova e laveaʻiina ai oe?

[Fesili mo le Suʻesuʻega]

[Ata i le itulau 27]

I le Aso o le Togisala, na avea ai le ositaulaga sili i Isaraelu ma faatusa manino o le Mesia

[Ata i le itulau 28]

O le lotomalie o Aperaamo e ofo atu lona atalii, ua aʻoaʻoina ai i tatou e uiga i le taulaga silisili ua faia e Ieova