Mpeve Santu: Sambu na Nki Bangindu ya Kisaka-Saka?

MPEVE SANTU kele inki? Ngyufula yai kemonana bonso nde yo kele mpasi ve, kansi yo lenda vanda mpasi na kuzwa mvutu ya petepete. Pape Benoit XVI kutubilaka kibuka mosi ya bantu na Australie nde: “Yo kemonana bonso nde yo kele mpasi na kubakisa pwelele kana Mpeve kele inki.”

Ya kyeleka, bangindu mpi badute kele mingi na yina metala ngyufula, Mpeve santu kele inki? Beno takuta awa na nsi ndambu ya bamvutu yina bantu kepesaka mbala mingi:

• Muntu ya kyeleka yina kezingaka na kati ya balongoki ya Kristu.

• Nsiku ya Nzambi yina kemonanaka na bisalu.

• Kima yina Nzambi kesadilaka sambu na kumonisa ngolo na yandi na nsi-ntoto.

• Muntu ya tatu ya Butatu.

Sambu na nki bangindu ya kisaka-saka ya mutindu yai? Bangindu ya kisaka-saka yai kuyantikaka na mvu-nkama ya iya T.B. ntangu bantu yankaka ya kelongukaka teolozi kutubaka nde mpeve santu kele muntu yina kele kiteso mosi ti Nzambi na mutindu mosi buna. Kansi, yai kuvandaka ve ngindu yina Masonuku to balongoki ya ntete ya Kristu vandaka kulonga. Ansiklopedi ya Mpa ya Katolika (angl.) ketendula nde: “Yo kele pwelele nde Kuwakana ya Ntama kebakaka ve mpeve ya Nzambi bonso muntu . . . Mpeve ya Nzambi kele kaka ngolo na yandi.” Ansiklopedi yina keyika nde: “Mikapu mingi ya Kuwakana ya Mpa ketubila mpeve ya Nzambi bonso kima, kansi ve bonso muntu; yo kemonana kibeni na kufwanana yina kele na kati ya mpeve mpi ngolo ya Nzambi.”

Beto kebakisa sambu na nki bantu kemonaka mpasi na kutadila ngolo bonso muntu. Yo yina, nsosa mosi ya bo mesala ntama mingi ve na États-Unis kumonisaka nde bantu mingi kebuyaka ngindu ya ketubaka nde mpeve santu kele muntu to “kigangwa ya kezingaka.” Keti bo ketuba kyeleka? To keti beto fwete kwikila bantu ya kelongukaka teolozi yina kedindamaka nde “Mpeve Santu kele Muntu ya meswaswana mpenza ti Tata mpi Mwana”?

Sambu na kubaka mvutu ya kutudila ntima, beto fwete kwenda na Ndinga ya Nzambi, Biblia, yina kepesaka bantendula mingi sambu na mpeve santu. Ntumwa Polo kusonikaka nde: “Bo sonikaka Mukanda ya Nzambi yonso na ngolo na yandi; mambu yonso kele na kati yo kele mfunu sambu na kulonga bantu mambu ya kieleka, sambu na kusungika bifu yina kele na mambu ya bantu ke longuka.”​—2 Timoteo 3:16.

Sambu na nki nge fwete sosa kuzaba kyeleka na yina metala mpeve santu? Sambu, kuzaba kyeleka yina lenda kangudila nge nzila ya kubaka lusadisu ya kekatuka na Nzambi. Keti bantangu yankaka nge kemonaka nde nge lenda kuka ve kusala kisalu ti ngolo na nge mosi? Yezu kusilaka balongoki na yandi nde: “Beno landa kaka na kulomba mambu yina ya beno ke na yo mfunu, ebuna Nzambi ta pesa beno yo . . . Kana beno zaba kupesa makabu ya mbote na bana na beno, zaba nde Tata yina kele na zulu ta pesa mpenza mpeve na yandi na bantu yina ke lombaka yandi mpeve!”​—Luka 11:9, 13.

Na masolo yina kelanda, beto tabika nde Masonuku kumonisa beto kana mpeve santu kele inki. Mpi beto tamona mutindu yo lenda natila beto mambote na luzingu na beto.

[Bangogo sambu na kubenda dikebi ya kele na lutiti 3]

Masonuku kemonisaka beto kana mpeve santu kele inki