Roho Maler Ang’o Momiyo Wachni Chocho Ji?

ROHO maler en ang’o? Penjono nenore ka gima en penjo mayot, to kata kamano chiwo dwoko nyalo bedo gima tek. Pope Benedict mar 16 nowacho ne oganda e piny Australia niya: “Nenore ni ok wanyal ng’eyo e yo maler chuth, gima Roho en.”

Kuom adier, ji nikod paro mathoth kendo gin gi kiawa mang’eny ka openjgi ni, Roho maler en ang’o? Moko kuom dwoko ma ji hinyo chiwo gin kaka magi:

• En ng’ato madier modak ei jopuonjre Kristo.

• En yo ma Nyasaye chikogo tijene.

• En gima nyiso ni Nyasaye chiko gik matimore e piny.

• En ng’at mar adek kuom nyasaye ma Nyadidek.

Ang’o momiyo wachni chocho ji kamano? Wachni nochako chocho ji e higini mag 500 E Ndalowa, kane jopuonj moko mag din ochako puonjo ji ni roho maler en ng’ato masie, kendo ni roho maler romre kod Nyasaye. Kata kamano, mano ok e gima Ndiko puonjo, to kata mana jolup Kristo mokwongo ok nopuonjo gima chalo kamano. New Catholic Encyclopedia lero wachno kama: “Muma Machon ok nyis ni roho mar Nyasaye en ng’ato . . . Roho mar Nyasaye en mana teko mar Nyasaye.” Bugno medo wacho ni: “Thoth ndiko manie Muma Manyien lero ni roho mar Nyasaye en gimoro, to ok ng’ato, to mano nenore maler sama iporo roho kod teko mar Nyasaye.”

En adier ni ok yot ne ji paro ni teko nyalo bedo ng’ato. Nikech mano, nonro ma nyocha otim e piny Amerka, ne oyudo ni thoth ji kwedo paro mar ni roho maler en ng’ato kata ni en “gima nigi ngima.” Be gin kare? Koso onego wayie kod josomo mag weche din majiwo ni “Roho Maler en Ng’ato mana kaka Wuoro koda Wuowi”?

Mondo wayud dwoko mwanyalo geno, dwarore ni wadog ei Wach Nyasaye ma en Muma, ma leronwa gima roho maler en e yo matut. Jaote Paulo nondiko kama: “Ndiko duto mowuok kuom much Nyasaye, konyo kuom puonjo ji, kuom kwero gik maricho.”—2 Timotheo 3:16.

Ang’o momiyo onego imany adier kuom gima roho maler en? En nikech ng’eyo adiera kuom wachni nyalo miyo iyud kony mowuok kuom Nyasaye. Be seche moko iwinjo ka nano kuom tekoni iwuon ok en gima yot? Yesu nosingone jopuonjrene kama: ‘Kwauru, eka nomiu. Ka un ung’eyo miyo nyithindu mich mabeyo, Wuoru me polo ok nochiw mokadho roho maler ni jo ma kwaye koso?’—Luka 11: 9, 13.

E sula mago maluwo, Ndiko biro leronwa gima roho maler en. Kendo wabiro neno kaka onyalo bedo gi teko makonyo e ngimawa.

[Weche manie ite mar 3]

Ndiko leronwa gima roho maler en