Momo Lie Omanu va Kuetele Atatahãi Atiamẽla Kespiritu Sandu?

ESPIRITU sandu li lomboloka nye? Epulilo eli li molẽha ndu okuti lia leluka, pole, oku sanga etambululo liaco ka ca lelukile. Papa Benedict XVI wa sapuilile owiñi umue kofeka yo Australia hati: “Lalimue eteke tu sanga elomboloko lia suapo liatiamẽla kespiritu sandu.”

Kuli atambululo alua kuenda ovisimĩlo via litepa viatiamẽla kepulilo liokuti: Espiritu sandu li lomboloka nye? Vamue va siata oku popia hati:

• Espiritu sandu omunu umue o kasi vokati kolondonge via Kristu.

• Espiritu sandu uloño wa Suku.

• Espiritu sandu li lomboloka emõleho lia Suku kovilinga violuali.

• Espiritu sandu li lomboloka omunu watatu kelongiso lio Suku Yimosi Muvatatu.

Catiamẽla kondaka yaco, momo lie omanu va kuetele ovisimĩlo via litepa? Ocili okuti, ovisimĩlo viaco via tunda kosimbu kocita cakuãla N.Y.Y., eci olonoño vimue vietavo via popia hati, espiritu sandu omunu umue wa lisoka la Suku. Pole, ovisimĩlo evi ka vi sangiwa Vembimbiliya kuenda olondonge via Kristu haicoko via enda oku longisa. Elivulu limue li tukuiwa hati, New Catholic Encyclopedia (Nova Enciclopédia Católica) lia popia hati: “Otestamento Yale ka yi lombolola okuti espiritu lia Suku, omunu. ... Pole, espiritu lia Suku li lomboloka unene Waye.” Noke liamisako hati: “Votestamento Yokaliye, mu sangiwa ovinimbu vialua vi lekisa okuti espiritu sandu, ocina cimue, pole, hamunuko; uvangi waco u limbukiwila kelitokeko li sangiwa pokati kespiritu kuenda unene wa Suku.”

Eli olio esunga lieci omanu ka va tavela okuti unene u lomboloka omunu. Ekonomuiso limue lia lingiwa ndopo kofeka yo Estados Unidos, lia lekisa okuti omanu ka va tava kovisimĩlo viokuti, espiritu sandu li lomboloka omunu ale “ocendalomuenyo cimue.” Anga hẽ, omanu vaco va kuete esunga? Ale tu sukila oku tava kovisimĩlo violonoño vietavo vina via popia hati, “Espiritu Sandu li lomboloka omunu umue wa litepa la Isia kuenda la Mõla”?

Oco tu kuate elomboloko liwa, tu sukila oku kũlĩhĩsa Ondaka ya Suku, Embimbiliya lina li lombolola ciwa catiamẽla kespiritu sandu. Upostolo Paulu wa soneha hati: “Ovisonehua vi kola viosi ovitumasuku, kuenje vi silivila oku longisa, loku lungula.”—2 Timoteo 3:16.

Momo lie o sukilila oku kũlĩha ocili catiamẽla kespiritu sandu? Momo oku kũlĩha ocili caco, ci yulula onjila yoku tambula ekuatiso lia Suku. Ove hẽ, olonjanja vimue wa siata oku liyeva okuti ku kuete ongusu yoku pandikisa? Yesu wa likuminya olondonge viaye hati: “Pingi kuenje cu wihiwi, ... Nda ene ... wa kũlĩhi oku eca oviali viwa komãla vene, Isiene ukuailu he, ka velipo oku avela espiritu sandu kuava vo pinga?”—Luka 11:9, 13.

Vocipama ci kuãimo, tuka kũlĩhĩsa Ovisonehua vi lombolola catiamẽla kespiritu sandu. Tuka limbukavo ndomo ukũlĩhĩso waco u tu kuatisa.

[Elitalatu kemẽla 3]

Ovisonehua vi tu sapuila eci ci lomboloka espiritu sandu