¿Kunsa Jehová Diosax jiwasanakar mayistu?
Diosar jakʼachasipxam
¿Kunsa Jehová Diosax jiwasanakar mayistu?
ISTʼASIRÏÑAX chʼamakïspawa. Chiqpachansa, qhuru jan ukax sinti waykatir patronarux waljaniw pä chuymak istʼañ yatipxi. ¡Diosan luqtirinakapax janipuniw ukham chuymanïpkiti! Jupanakax taqi chuymaw Jehová Diosar istʼapxi. ¿Kunatsa ukham istʼapxi? Moisesan arunakapax Deuteronomio 10:12, 13 qillqatan jikxataski uka arunakaw uk sum amuytʼayistu. *
Diosax kuntï luqtirinakapat maykäna uka tuqit parlkasaxa, Moisesax mä wakiskir jisktʼa jisktʼäna: “¿Kunsa [Jehová] Diosamax jumanakat mayipxtamxa?” sasa (12 jiskʼa tʼaqa). Jupaw taqi kunxaru Munañani jachʼa Diosaxa, Jupaw jakäwi churistu ukat jakayaskarakistu (Salmo 36:9; Isaías 33:22). Ukatwa Juparux istʼañasapunixa. Ukampis Diosax janiw munkir jan munkir Jupar istʼañas munkiti. Jan ukasti, ‘taqi chuyma iyawssna’ ukwa Jupax muni (Romanos 6:17).
Ukampis ¿taqi chuyma istʼañatakix kunas yanapistaspa? 12 jiskʼa tʼaqanwa uka tuqit qhanañchasiski. Ukanxa akham siwa: ‘Jehová Diosamaruw axsarañama’ *, (NM) sasa. Uka jiskʼa tʼaqanxa Moisesax janiw jan wali luräwinakasat mutuyiri wali qhuru Diosar axsarañat parlkänti. Jan ukasti, Diosaru ukat kamachinakapar taqi chuyma respetañat parlaskäna, ukaw kunanakatï Diosan chuymap ustʼaykaspa uk jan lurañasatakix jarktʼistani.
‘Jupar munapxañanakasa, yupaychapxañasa, taqi chuymampi, taqi jakañampi’ ukwa Diosax muni sasaw Moisesax säna (12 jiskʼa tʼaqa). Mä arunxa, Jupar wal munasitas laykuw istʼañasa. Ukampis janiw Diosarux munastwa sañakïkiti. Biblia tuqit yatxattʼat mä jaqix akham siwa: “Hebreo arunxa, chuymasan utjki uka sentimientonakat parlki uka arunakax awisax kunanakatï uka sentimientonak utjañapatakix wiytki ukarakispawa” sasa. Diosar munasir jaqixa luräwinakapampiw kunatï chuymapan utjki uk uñachtʼayi. Ukhamasti, Diosar munasiñasax chiqpachapun utjchi ukhaxa, kunatï Jupar kusisiyki uk lurañatakiw chʼamachasiñäni (Proverbios 27:11).
Jichhasti, ¿qhawqsa Diosar istʼañasäspa? Moisesax akham sänwa: ‘Jupan thakipanjam arkam’ sasa (12 jiskʼa tʼaqa). Taqi kunan istʼañaswa Jupax muni. Ukampis yaqhipanakax taqi kunan istʼasirïñax janiw askïkaspati sasaw sapxaraki. Ukampisa, Diosar istʼañax jiwasan askisatakipuniwa.
Diosar taqi chuyma istʼañaw jiwasatakix wali askixa. 13 tʼaqanxa Moisesax qhanwa uka tuqit qhanañchäna: Jehová Diosax “mandamiento arunakaparjama, leyinakaparjama” sum sarnaqapxañaswa muni. Ukhamasti kunsay Jupax maychistani, kamachinakapar istʼañakipuniw jiwasatakix wali askïni. “Diosax munasiñawa”, ukxa janiw armañasäkiti (1 Juan 4:8). Ukhamasti, jichhürunakatakisa, jutïr urunakatakis kamachinakapax jiwasan askisatakipuniwa (Isaías 48:17). Kuntï maykistu uk lurañänixa, janiw jan walinakar purtʼasitas layku llakin uñjaskañäniti, ukat jutïrinxa Diosan Apnaqäwipax apnaqxani ukhax walja bendicionanakwa katuqarakiñäni. *
Ukhamasti, Jehová Diosax kuns mayistu ukhaxa, taqi kunana ukat taqi chuyma istʼañasarakiw wali askixa. Ukhamtï lurañänixa, munasir Jehová Diosarux jukʼampwa jakʼachasiñäni, Jupaw kunatix jiwasatak askïki uk sum yati.
[Qhanañchäwinaka]
^ Moisesax nayra Israel markarusay parlkchïnxa, kawkïr iwxtʼanakatix uka qillqatan jikxataski ukanakax Diosan chuymapar kusisiyañ munapki ukanakatakix askirakiwa (Romanos 15:4).
^ Jehová Diosar luqtapki ukanakax Diosar axsarapxapuniñapawa sasaw Deuteronomio libron walja kuti qhanañchasi (Deuteronomio 4:10; 6:24; 17:19).
^ Jukʼampi yatxatañatakixa, ¿Kunsa Bibliax chiqpachapuni yatichi? sat libron kimsïr jaljap uñxattʼäta “Kunas Diosan amtapaxa aka Uraqitakixa” siski uka pʼiqiñchäwi, uka librosti Jehová Diosan Qhanañchirinakapan luratawa.