Unsay Gipangayo ni Jehova Kanato?
Pakigsuod sa Diyos
Unsay Gipangayo ni Jehova Kanato?
MOSUNOD o dili mosunod—ang pagdesisyon dili kanunayng sayon. Kon ang usa ka amo isog o sobra ka estrikto, ang iyang mga sakop lagmit mosunod kaniya apan kontragusto. Apan kon bahin kang Jehova nga Diyos, ang iyang mga magsisimba kinabubut-ong nagsunod kaniya. Ngano? Sa pagtubag niana, atong hisgotan ang mga pulong ni Moises nga nasulat sa Deuteronomio 10:12, 13. a
Sa dihang gisumaryo ni Moises ang mga balaod sa Diyos, siya nagsuknag makaiikag nga pangutana: “Unsay gipangayo ni Jehova nga imong Diyos kanimo?” (Bersikulo 12) Ang Diyos adunay katungod sa pagpangayo sa bisan unsang butang kanato tungod kay siya ang Soberanong Ginoo ug ang Tuboran ug Tigsustento sa kinabuhi. (Salmo 36:9; Isaias 33:22) Takos gayod siyang sundon. Apan dili niya gusto nga pinugos ang atong pagsunod kaniya. Unsay iyang gipangayo kanato? Buot niya nga kita ‘magmasinugtanon gikan sa kasingkasing.’—Roma 6:17.
Unsay magpalihok kanato nga kinabubut-ong mosunod sa Diyos? Si Moises naghisgot sa usa niana, nga mao: “Ang pagkahadlok kang Jehova nga imong Diyos.” b (Bersikulo 12) Dili kini daotang matang sa kahadlok, kondili kahadlok kini nga makalapas sa mga balaod sa Diyos. Kon kita adunay kahadlok sa Diyos, likayan gayod nato ang mga butang nga makapasuko kaniya.
Apan unsay atong pangunang motibo sa pagsunod sa Diyos? Si Moises nag-ingon: ‘Higugmaa si Jehova ug alagara siya sa bug-os mong kasingkasing ug sa bug-os mong kalag.’ (Bersikulo 12) Ang paghigugma sa Diyos naglangkit ug labaw pa sa pagbati. Ang usa ka reperensiya nag-ingon: “Ang Hebreohanong mga berbo alang sa pagbati usahay nagtumong usab sa mga buhat nga resulta niana.” Busa, kon gihigugma gayod nato ang Diyos, kita mobuhat sa mga butang nga makapahimuot kaniya.—Proverbio 27:11.
Hangtod asa nato sugton ang Diyos? Si Moises nag-ingon: ‘Lakaw sa tanan niyang mga dalan.’ (Bersikulo 12) Buot ni Jehova nga buhaton nato ang tanan nga gisugo niya kanato. Ang bug-os ba nga pagsunod sa Diyos makawala sa atong kalipay? Dili gayod.
Ang atong kinabubut-ong pagsunod magdalag mga panalangin. Si Moises misulat: ‘Tumana ang kasugoan nga akong gisugo kanimo niining adlawa, alang sa imong kaayohan.’ (Bersikulo 13) Oo, ang matag sugo ni Jehova—ang tanan nga iyang gipangayo kanato—maoy alang sa atong kaayohan. Makaseguro kita niana tungod kay ang Bibliya nag-ingon: “Ang Diyos gugma.” (1 Juan 4:8) Ang mga sugo nga iyang gihatag maoy alang sa atong dumalayong kaayohan. (Isaias 48:17) Pinaagi sa pagbuhat sa tanang gisugo ni Jehova kanato, atong malikayan ang daghang problema karon, ug sa umaabot atong maangkon ang dumalayong mga panalangin ubos sa pagmando sa Gingharian. c
Mosunod o dili mosunod? Kon bahin sa mga sugo ni Jehova, angay gayod nga bug-os ug kinabubut-on kitang mosunod. Mao kana ang maalamong butang nga buhaton. Pinaagi niana, kita mas masuod kang Jehova, ang mahigugmaong Diyos nga interesado gayod sa atong kaayohan.
[Mga footnote]
a Ang mga pulong ni Moises mapadapat sa karaang Israel, apan ang mga prinsipyo niini mapadapat usab karon sa mga tawo nga gustong mopahimuot sa Diyos.—Roma 15:4.
b Sa tibuok basahon sa Deuteronomio, gipasiugda ni Moises nga ang pagkahadlok sa Diyos mao ang prinsipyo nga angayng mogiya sa mga alagad sa Diyos.—Deuteronomio 4:10; 6:13, 24; 8:6; 13:4; 31:12, 13.
c Alang sa dugang impormasyon, tan-awa ang kapitulo 3, “Unsa ang Katuyoan sa Diyos Alang sa Yuta?,” sa librong Unsay Tinuod nga Gitudlo sa Bibliya? nga gipatik sa mga Saksi ni Jehova.