Ñañemoag̃uíkena Ñandejárare

Mbaʼépa Jehová oipota jajapo?

Deuteronomio 10:12, 13

HETÁPE ningo ijetuʼu akóinte iñeʼẽrendu hag̃ua. Oĩ voi umi iñeʼẽrenduvaʼerãguinte iñeʼẽrendúva ipatrón arhélpe. Ajépa ndojoguaiete Jehová siervokuérape! Haʼekuéra ningo iñeʼẽrenduséguinte iñeʼẽrendu Ñandejárape. Mbaʼérepa jaʼe upéicha? Jaikuaa hag̃ua ñahesaʼỹijomíta Moisés ohaivaʼekue Deuteronomio 10:12, 13-pe. a

Moisés oñeʼẽrõ guare umi Israelguápe Jehová rembipotáre, oporandu ko mbaʼe: ‘Mbaʼépa Jehová oipota pejapo?’ (versíkulo 12). Jehová ningo opa mbaʼe Apohare, ha haʼe rupi jaikove (Salmo 36:9; Isaías 33:22). Upévare Jehová ikatu voi ojerure ñandéve haʼe oipotáva guive. Haʼe añoite la ikatúva ñandeovliga ñaneñeʼẽrendu hag̃ua chupe. Péro Jehová ndojapói upéicha. Haʼe ningo oipota ‘ñaneñeʼẽrendu chupe ñande pyʼaite guive’ (Romanos 6:17).

Mbaʼépa ñanepytyvõta ñaneñeʼẽrendu hag̃ua Jehovápe ñande pyʼaite guive? Pe versíkulo 12-pe heʼi: ‘Pekyhyje Ñandejáragui’. b Koʼápe Moisés ndeʼirihína jakyhyjevaʼerãha Jehovágui ñandekastigárõ g̃uarã jajavy haguére. Heʼisentehína jarrespetavaʼerãha Jehovápe ha ndajajapoivaʼerãha mbaʼeve ombopochýtava chupe.

Upéicharõ jepe ndahaʼéi jakyhyjéguinte ñaneñeʼẽrenduvaʼerã Jehovápe. Moisés omombeʼu mbaʼépa Jehová oipota jajapo: ‘Pehayhu chupe pende pyʼaite guive ha pene ánga mbytete guive’ (versíkulo 12). Upéicharõ jahayhúgui Jehovápe ñaneñeʼẽrenduvaʼerã chupe. Upéva ndeʼiséi avei jaʼenteha jahayhuha chupe. Peteĩ kuatiañeʼẽ heʼi: “Umi ñeʼẽ ojeporúva evréope ojeʼe hag̃ua oñeñandúva ohechauka avei mbaʼérepa ojejapo peteĩ mbaʼe”. Upéva heʼise umi ohayhúva Jehovápe ohechaukaha upéva umi mbaʼe ojapóva rupive. Upéicharõ ñande jahayhúva Jehovápe ñande pyʼaite guive, ñañehaʼãta jajapo opa mbaʼe ombovyʼátava chupe (Proverbios 27:11).

Upéicharõ, opa mbaʼépepa ñaneñeʼẽrenduvaʼerã Jehovápe? Moisés heʼi: ‘Peiko haʼe oipotaháicha’ (versíkulo 12). Jehová ningo oipota ñaneñeʼẽrendu chupe opa mbaʼépe. Ikatu oĩ heʼíva ndaideprovechoichéne hag̃ua ñandéve jajapóramo upéicha. Péro Ñandejára ningo oipota iporãvante ñandéve g̃uarã.

Ñaneñeʼẽrendúramo Jehovápe ñande pyʼaite guive jahupytýta heta mbaʼe porã. Moisés ningo heʼi voi versíkulo 13-pe: ‘Pejapo Jehová heʼíva oho porã hag̃ua peẽme’. La Biblia heʼi avei: ‘Ñandejára niko mborayhu’, upévare katuete iporãvéta jajapóramo opa mbaʼe haʼe heʼíva ñandéve (1 Juan 4:8). Jajapóramo upéicha nañasẽvaimoʼãi koʼág̃a ni amo gotyove (Isaías 48:17). Heta mbaʼe vaígui ningo jajeíta ha ikatúta voi jaiko vyʼápe opa árare Ñandejára Rréino poguýpe. c

Péicha jahecha iporãveha ñaneñeʼẽrendu Jehovápe ñande pyʼaite guive ha opaite mbaʼépe. Jajapóramo upéicha ñañemoag̃uivéta hese. Jehová ningo ñanderayhueterei ha iporãvante oipota ñandéve g̃uarã.

[Nóta]