Umadanika iti Dios

Ania ti Kalikaguman Kadatayo ni Jehova?

Deuteronomio 10:12, 13

AGTULNOG wenno agsukir​—saan a kanayon a nalaka a desisionan dayta. No nagubsang wenno nalabes ti kalikaguman ti maysa kadagiti iturayanna, nalabit nga agtulnogda kenkuana ngem mapilpilitanda laeng. Nupay kasta, kayat ni Jehova a Dios a naimpusuan ti panagtulnog dagiti agdaydayaw kenkuana. Apay? Tapno maammuantayo ti sungbat, usigentayo dagiti sasao ni Moises iti Deuteronomio 10:12, 13. a

Iti pananggupgop ni Moises kadagiti kalikaguman ti Dios, makapainteres ti saludsodna: “Ania ti kidkiddawen kenka ni Jehova a Diosmo?” (Bersikulo 12) Kalintegan ti Dios a kiddawen ti aniaman kadatayo, agraman ti panagtulnogtayo kenkuana. Isu ngamin ti Soberano nga Apo ken ti Gubuayan ken Mangsussustiner iti biag. (Salmo 36:9; Isaias 33:22) Kaskasdi, saannatayo a piliten nga agtulnog. Ania ti kalikagumanna kadatayo? Ti ‘panagtulnogtayo manipud iti puso.’​—Roma 6:17.

Ania ti mangtignay kadatayo a naimpusuan nga agtulnog iti Dios? Dinakamat ni Moises ti maysa a rason: “Ti panagbuteng ken Jehova a Diosmo.” b (Bersikulo 12) Saan a panagbuteng dayta gapu kadagiti dakes a resulta, no di ket gapu iti umiso ken nadayaw a panagraem iti Dios ken kadagiti pagalagadanna. No addaantayo iti nauneg a panagraem kenkuana, ditay kayat a saktan ti riknana.

Ngem ania ti kangrunaan a motibotayo nga agtulnog iti Dios? Kinuna ni Moises: “Ayatem [ni Jehova] ken . . . agserbika ken Jehova a Diosmo buyogen ti isuamin a pusom ken isuamin a kararuam.” (Bersikulo 12) Saan laeng nga emosion ti ramanen ti panagayat iti Dios. Kuna ti maysa a reperensia: “No dadduma, dagiti Hebreo a berbo para iti emosion ket tumukoy met kadagiti tignay a maitunos iti dayta.” Innayonna pay a ti panagayat iti Dios kaipapananna “ti panagtignaytayo iti pamay-an a makaay-ayo” kenkuana.​—Proverbio 27:11.

Agingga iti ania nga agtulnogtayo iti Dios? Kuna ni Moises: ‘Magnaka iti amin a daldalan ti Dios.’ (Bersikulo 12) Kayat ni Jehova nga aramidentayo ti amin a kiddawenna. Pagdaksantayo kadi ti naan-anay a panagtulnog kenkuana? Saan a pulos.

Mangyeg kadagiti bendision ti naimpusuan a panagtulnogtayo. Insurat ni Moises: “Salimetmetam dagiti bilin . . . nga ibilbilinko kenka ita nga aldaw, [a] maipaay a pagimbagam.” (Bersikulo 13) Wen, amin a bilin ni Jehova​—amin a kiddawenna kadatayo​—ket pagimbagantayo. Kasano a kasta? “Ti Dios ket ayat,” kuna ti Biblia. (1 Juan 4:8) Gapuna, intedna dagita a bilin agpaay iti manayon a pagimbagantayo. (Isaias 48:17) No aramidentayo ti amin a kidkiddawen kadatayo ni Jehova, maliklikantayo ti adu a pannakapaay ita ken dayta ti mangituggod kadatayo kadagiti manayon a bendision iti masanguanan iti sidong ti Pagarianna. c

Agtulnog wenno agsukir? No maipapan iti kalikaguman ni Jehova kadatayo, adda laeng maysa a nainsiriban a pilientayo​—ti naan-anay ken naimpusuan a panagtulnog. Dayta ti kanayon a kasayaatan a pilientayo. Ti kasta a kinatulnog ti ad-adda a mangpasinged kadatayo ken Jehova, ti naayat a Dios a kanayon a ti pagimbagantayo ti pampanunotenna.

[Footnotes]