Batamela Kgaufsi le Modimo

Ke Eng Seo Jehofa a se Nyakago go Rena?

Doiteronomio 10:12, 13

GO KWA goba go se kwe—go dira phetho ga se ka mehla go lego bonolo. Ge motho yo a nago le matla a taolo a le makgwakgwa goba a nyaka dilo ka šiši a ka hwetša feela kobamelo ya go ithola kgwara go bao ba lego ka tlase ga bolaodi bja gagwe. Lega go le bjalo, Jehofa Modimo o hwetša kobamelo ya boithatelo go barapedi ba gagwe. Ka baka la’ng? Go araba potšišo yeo, a re hlahlobeng mantšu a Moše ao a hwetšwago go Doiteronomio 10:12, 13. *

Ge a be a dira kakaretšo ya dinyakwa tša Modimo, Moše o ile a rotoša potšišo e šišinyago kgopolo e rego: “Morêna Modimo wa xaxo O nyaka’ng xo wêna?” (Temana 12) Modimo o na le tshwanelo ya go nyaka selo le ge e le sefe seo a se nyakago go rena. Lebaka ke gore ke Mmuši Morena le Monei wa bophelo. (Psalme 36:9; Jesaya 33:22) Jehofa o na le tshwanelo ya go nyaka gore re mo kwe. Lega go le bjalo, ga a nyake gore re mo kwe ka kgang. Ke’ng seo a se nyakago go rena? Gore re be “ba kwago go tšwa pelong.”—Baroma 6:17.

Ke’ng seo se ka re tutueletšago go kwa Modimo ka go rata? Moše o bolela ka selo se tee, ka gore: “O boifê Morêna Modimo wa xaxo.” * (Temana 12) Ye ga se poifo e fokolago ya go tšhaba ditla-morago tše sa kgahlišego eupša, go e na le moo, ke tlhompho ya go hlompha Modimo le ditsela tša gagwe. Ge e ba re boifa Modimo e le ruri, re tla nyaka go phema go se mo kgahliše.

Lega go le bjalo, maikemišetšo a rena a magolo a go kwa Modimo e swanetše go ba afe? Moše o re: “O mo [Jehofa] rate, o direle Jehofa, Modimo wa gago ka pelo ya gago ka moka le ka moya wa gago ka moka.” (Temana 12, PK) Go rata Modimo go akaretša se se fetago maikwelo. Puku e nngwe ya ditšhupetšo e hlalosa ka gore: “Madiri a Seheberu bakeng sa maikwelo ka dinako tše dingwe a bolela ka ditiro tšeo di tlišwago ke ona.” Puku yona yeo e bolela gore go rata Modimo go bolela “go [mo] dira dilo ka lerato.” Ka mantšu a mangwe, ge e ba re rata Modimo e le ka kgonthe, re tla dira dilo ka tsela yeo re tsebago gore e a mo kgahla.—Diema 27:11.

Re swanetše go kwa Modimo go fihla bokgoleng bofe? Moše o re: “O sepelê ditseleng tša xaxwe [Modimo] mo xo fêla.” (Temana 12) Jehofa o nyaka gore re dire sohle seo a rego re se dire. Na go kwa mo go bjalo mo go feletšego go tla re kweša bohloko? Seo ga se kgonege.

Go kwa ga rena ka go rata go tla tliša ditšhegofatšo. Moše o ngwala gore: ‘O hlokomele ditaelo tše ke go hlathollelago tšona lehono, gore o letlege.’ (Temana 13) Ee, taelo e nngwe le e nngwe ya Jehofa—sohle seo a se nyakago go rena—e dira gore re letlege. E swanetše go ba bjalo. Beibele e re: “Modimo ke lerato.” (1 Johane 4:8) Le gona, o re file ditaelo tšeo di tlago go dira gore re letlege ka mo go sa felego. (Jesaya 48:17) Go dira sohle seo Jehofa a se nyakago go rena go tla re šireletša dikgakanegong tša gona bjale gomme gwa re lebiša ditšhegofatšong tša ka mo go sa felego tša nakong e tlago ka tlase ga Mmušo wa gagwe. *

Go kwa goba go se kwe—ge go tliwa go seo Jehofa a se nyakago go rena, go na le kgetho e tee feela e bohlale. Go kwa ka mo go feletšego le ka go rata ke selo se sekaone-kaone ka mehla. Tsela e bjalo ya potego e re batametša kudu go Jehofa, Modimo yo lerato yoo a dulago a re kganyogela tše dibotse.

[Mengwalo ya tlase]