Hala Serka Dios

Kiko Yehova Ta Pidi di Nos?

Deuteronomio 10:​12 i 13

KIKO pa hasi: obedesé òf no obedesé? No ta semper fásil pa disidí esei. Ora un hefe ta trata esnan ku ta traha bou di dje brutu òf ta eksigí demasiado di nan, kisas nan ta obedes’é, pero di mala gana. Di otro banda, Yehova Dios su sirbidónan ta obedes’é di buena gana. Dikon? Pa kontestá e pregunta ei, laga nos analisá e palabranan di Moisés na Deuteronomio 10:​12 i 13. *

Resumiendo Dios su rekisitonan, Moisés a hasi un pregunta interesante: “Kiko SEÑOR bo Dios ta pidi di bo?” (Versíkulo 12) Dios tin e derecho di pidi loke e ke di nos. Al fin i al kabo, e ta e Señor Soberano i e Fuente i Sostenedor di bida. (Salmo 36:9; Isaias 33:22) Pero tòg, Yehova no ke pa nos sinti nos mes fòrsá pa obedes’é. Kiko e ta pidi di nos? Wèl, e ke pa nos ta “obedesidu di kurason.”​—Romanonan 6:17.

Kiko por motivá nos pa obedesé Dios boluntariamente? Moisés a menshoná un faktor, ora el a bisa: “Teme SEÑOR bo Dios.” * (Versíkulo 12) Esaki no ta un temor insaludabel, sino mas bien, un rèspèt profundo pa Dios i su kamindanan. Si nos tin un rèspèt profundo pa Dios, nos lo evitá di desagrad’é.

Pero, na promé lugá kiko mester motivá nos pa obedesé Dios? Moisés a bisa: ‘Stima Yehova, i sirbi SEÑOR bo Dios ku henter bo kurason i ku henter bo alma.’ (Versíkulo 12) Stima Dios no tin di haber ku sintimentu so. Un eksperto riba tereno di Beibel a splika: “Verbonan hebreo pa sintimentu tin bes ta referí tambe na e akshonnan ku e sintimentunan akí ta produsí.” Tambe el a bisa ku amor pa Dios ta nifiká “aktua na un manera amoroso” pa kuné. Ku otro palabra, si di bèrdat nos ta stima Dios, nos lo aktua na un manera ku lo agrad’é.​—Proverbionan 27:11.

Te kon leu nos mester obedesé Dios? Moisés a bisa: “Kana den tur [Dios] su kamindanan.” (Versíkulo 12) Yehova ke pa nos hasi tur loke e ta pidi di nos. Si nos obedes’é den tur kos, esei lo perhudiká nos? Di ningun manera.

Ora nos obedesé Dios boluntariamente, esei lo trese bendishon kuné. Moisés a skirbi: “Warda e mandamentunan . . . ku mi ta ordená bo awe pa bo mes bon.” (Versíkulo 13) Sí, kada mandamentu di Yehova—tur kos ku e ta pidi di nos—ta pa nos mes bon. I esei ta asina pasobra Beibel ta bisa ku “Dios ta amor.” (1 Juan 4:8) Pues, tur su mandamentunan ta pa nos bienestar eterno. (Isaias 48:17) Si nos hasi tur loke Yehova ta pidi di nos, nos lo evitá hopi frustrashon awor i nos lo haña bendishonnan sin fin den futuro bou di su Reinado. *

Pa bin bèk riba e desishon di obedesé òf no obedesé—ora ta trata di hasi loke Yehova ta pidi di nos tin solamente ún desishon sabí: Obedensia total i boluntario. Esei semper ta mihó. Ora nos ta obedesé Yehova fielmente, esei ta hala nos mas serka di e Dios amoroso ku semper tin nos bienestar na pechu.

[Nota]