Kunsa liytʼirinakax yatiñ munapxi

¿Supayax chiqapunit utjpacha?

Supayax chiqapuniw utjaski sasaw Bibliax yatichi. Ukampis Bibliar jiskʼachir jaqinakax kawkit Supayax utjanix sasaw sapxi. Amuyaparjamaxa, Supayax jaqin chuymapan jan wali lurañ amtanakax utjki ukakiwa.

Chiqansa, ukham amuyunakatxa janiw mayjtʼasiñasäkiti. ¿Kunatsa ukham sistanxa? Amuytʼañataki: jan wali lurir jaqinakax jan wali luräwinakap jan katjayasiñataki ukat jukʼamp jan walinak luraskakiñatakix kuns lurapxakispawa. Supayax ukhamarakiw ñanqha luräwinakap jan khitins amuyañapatakix kunaymanit chʼamachasi, ukhamatwa jaqinakarux kunayman jan wali luräwinak lurasipkakiñapatakix wiyti. Ukampisa, Uraqpachan jan walinak utjañapatakix Supayaw juchani sasaw Jesusax qhanañchäna. Supayax ‘akapachan apnaqiripawa’ sasaw sarakïna (Juan 12:31).

¿Kunjamatsa Supayax utjpacha? Qalltanxa jan juchan angelänwa. Ukampis jaqinakax Diosar yupaychañat sipansa jupaw yupaychayasiñ wal munäna. Uka amuyump atipayasisaw Diosar kutkatasiwayäna. Ukharakiw Diablor tukuwayäna. Supayax Jesusamp parlkäna ukax Biblian qillqatawa, ukanwa kunsa Supayax munäna ukax qhan amuyasi, kunattix Jesusan qunqurtʼasiñapa ukat yupaychañapwa munäna (Mateo 4:8, 9).

Diosampi parlkäna ukax Job libron qillqatarakiwa, ukanwa kunsa jupax muni ukax amuyasiraki. Supayax jaqinakan Diosat jithiqtapxañapatakisa, jupar yupaychapxañapatakis kuns lurakispawa, ukwa uka qillqatax uñachtʼayistu (Job 1:13-19; 2:7, 8).

Amuytʼañasataki: Supayax Jehová Diosampi ukat Jesusampiw parläna, ukhamasti, ¿kunjamatarak chuymasan utjki uka jan wali lurañ amtanakakïspasti? ¿Diosansa, Jesusansa jan wali lurañ amtanakax akchʼas utjaspatisti? Janipuniw utjkaspati. Supayax utjaskapuniwa, janiw ukxat pächasksnati. Ukhamarusa, jan sinttʼasiri ñanqha ajayuwa, Jehová Diosarusa, Jesusarusa janipuniw akchʼas respetkiti.

Uraqpachan sinti jan waltʼäwinak utjatapaw Supayan utjatap amuytʼayistu. Millón millón jaqinakaw manqʼatjam jiwarasipki, ukampis walja markanakanwa jiltkʼi uka manqʼañanakap ñusantayapxi. Ukatxa jupanakkam jiwarayasiñatakix walja jaqinakar jiwayir armanakwa imkatapxaraki. Maysa tuqitsti, umsa, samansa sinti qʼañuchxapxaraki. Ukhamäkipansa, waljaniw kunatsa jaqinakax ukham jan walinak lurapxi uk jan amuyapkiti. ¿Kunatsa jan amuyapkpacha?

Supayaw “jupanakan amuytʼanakapxa chʼamaktʼayi” sasaw Bibliax qhanañchistu (2 Corintios 4:4). Ukampis ¿kunjamatsa jaqinakar munañaparjam apnaqpacha? Ñanqha ajayunak tuqnamwa apnaqi. Jupaw ñanqha ajayunakan pʼiqtʼiripax sasaw Qullan Qillqatanakax qhanañchistu (Mateo 12:24). Kamisatix ñanqha lurir jaqinakan pʼiqtʼiripax walja chiqanakan jan khitimpis uñtʼayasis ñanqha luräwinak apnaqkixa, ukhamarakiw Supayaxa. Chiqansa, ñanqha ajayunak tuqnamwa jaqinakarux apnaqi, waljaniw uk jan amuyasipkiti.

Supayasa, saxranakapasa kunja ñanqhanakäpkitix ukxa Bibliax wali sumwa qhanstayi. Uk yatiñaw sipitanakapar jan jalantañatakix yanapistu. ¿Kunjamatsa sipitanakapar jan jalantksna? Biblian aka iwxtʼapar istʼasa: “Diosaruy jaysapxam, Supayatakisti saytʼasipxarakim, [...] Supayasti jumanakatxa jaltawayxarakiniwa” (Santiago 4:7).