Aligen so Pananisia Ra

Nilabanan Toy Takot tan Duaruwa To

BEGSAY lan begsay si Pedro tan kumunineng ed labi. Singa walay nanenengneng ton gulis na liwawa ed bukig. Anto kasi, manpalbangon la? Onkekelat lay beneg tan taktaklay to ta pigay oras lan manbebegsay. Samay dagem a mangipapalig ed buek to et makmaksil la natan. Kanian mantutumbokan so daluyon ya ombabasig ed arap na baloto tan abasabasa lay Pedro. Balet siansia nin diretso-diretso’d pambebegsay to.

Si Pedro tan saramay kakaiba to et sinipotan day Jesus dima’d baybay. Diad saman ya agew, anengneng day Jesus ya amakan ed nilibon totoon narasan, panamegley na pigara labat a tinapay tan sira. Lapud satan et labay na totoo a gawaen ya ari si Jesus, balet agto labay so onloob ed politika. Determinado to met a tulongan iray patumbok to ya agpirawaten itan. Lapud labay ton paliisan iramay totoo, pinalugan to’d baloto iray disipulo to paarap ed biek a baybay insan linman bukor ed palandey pian manpikasi.​—Marcos 6:35-45; Juan 6:14, 15.

Sanen sinmipot iray disipulo, walad petek da imay managaag a bulan, balet natan et kalkalna la itan ya onseselek ed sagur. Ingen pigara ni labat a milyay abatik da. Ag-ira makapantotongtong ta mabanesbes so dagem tan maungol so dayat. Mapatnag ya aralem so nononoten nen Pedro.

Agaylay karakel na nayarin nonoten to! Diad masulok a duay taon ya akaiba toy Jesus a Nazareno et dakel lay agawa. Amayamay lay naaralan to, balet dakel ni kaukolan ton aralen. Lapud inkamabulos ton manaral ni, salanti, manaeg ed saray negatibon liknaan a singa say duaruwa tan takot, nibagan si Pedro et alay abig ya alimbawan nepeg tayon aligen. Nengnengen tayo no panon.

“Aromog Mi Mesias”!

Atattandaan ni nen Pedro imay agew nen akabat toy Jesus. Diad saman et oniay maliket ya imbalita ed sikato na agi ton si Andres: “Aromog mi Mesias.” Manlapu la’d saman, anguman so bilay nen Pedro. Aglan balot itan pinmawil ed dati.​—Juan 1:41.

Si Pedro et taga Capernaum, a walad gilig na Dayat na Galilea, a diad tua et sakey a tabang. Sikato tan si Andres et kasosyo day Santiago tan Juan ya ananak nen Zebedeo, diad negosyon panagsigay. Say kaamong nen Pedro et aliwa labat a say asawa to noag pati say katulangan ton bii tan say agi ton si Andres. Seguradon kaukolan so kuli, biskeg, tan abilidar pian nalegpet so ontan kabaleg a pamilya. Singa nanenengneng tayo irayan lalaki a mabetbet lan nanaabotay palbangon ed dayat, a mangipepelag na iket ed nampegleyay duaran baloto tan mangisasakbit na saray narel dan sira. Tan no agew et diretso ni trabaho ra, a pambibiiganen tan ilalako da ray sira, tan aayosen tan lilinisan da ray iket da.

Ibabagay Biblia a si Andres et disipulo nen Juan Bautista. Seguradon it-interesadoy Pedro ed saray ibabaga nen agi to nipaakar ed mensahe nen Juan. Sakey agew, anengneng nen Andres ya inturo nen Juan si Jesus a Nazareno tan inkuan to: “Nia, so Kordero na Dios!” Tampol a nagmaliw a patumbok nen Jesus si Andres tan oniay malikeliket ton imbalita ed si Pedro: Sinmabi lay Mesias! (Juan 1:35-40) Apat a libon taon manlapud samay rebelyon ed Eden,  insipan nen Jehova a walay espisyal ya indibidual ya onsabi pian mangiter ed katooan na peteg ya ilalo. (Genesis 3:15) Natan, akabat la nen Andres iyan Manangisalba, say mismon Mesias! Tan si Pedro et malikeliket met ya angabet ed Sikato.

Anggad satan ya agew, si Pedro et kabkabat ed ngaran a Simon. Balet, sanen sikatoy ninengneng nen Jesus, inkuan to: “Sika si Simon ya anak nen Jonas: ingaran ka naani Cefas (a no ipatalos, Pedro).” (Juan 1:42) Say salitan “cefas” et mankabaliksay “bato.” Sirin, nayarin walay arum nin labay ya ibaga nen Jesus. Anengneng to lan si Pedro et magmaliw a singa bato​—mapekder tan napanmatalkan ya impluensya ed papatumbok nen Kristo. Ontan kasi pakanengneng nen Pedro ed sarili to? Singa andi. Anggan say arum a manbabasa natan ed saray Ebanghelyo et agda nanenengneng itan a singa baton kualidad ed si Pedro. Walara ingey mangibabagan sikatoy manguman-uman, pabigla-bigla, tan agnatalosay labay to.

Tua, walaray kakapuyan nen Pedro. Aliwan bulag si Jesus ed saratan. Balet singa say Ama ton si Jehova, say nenengnengen nen Jesus et say kamaongan a walad totoo. Anengneng toy baleg a potensyal nen Pedro, tan tinulongan toy Pedro a napaaligwas iratan. Natan, say nenengnengen met nen Jehova tan say Anak to et say kamaongan tayo. Nayarin singa agtayo napanisiaan a dakel so nanenengneng dan potensyal tayo. Balet, nepeg tayon panmatalkan so panmoria ra tan mabulos tayon paipasal tan paibangat a singa si Pedro.​—1 Juan 3:19, 20.

“Agka Natatakot”

Kayari impankabat da, nayarin akikkilay Pedro ed si Jesus diad impanpupulong to. Sirin, mapatnag ya anengneng to imay sankaunaan a milagro nen Jesus, a pinagmaliw ton alak so danum diad bansal ed Cana. Say mas importante, arengel toy alay abig tan napnoy ilalon mensahe nen Jesus nipaakar ed Panarian na Dios. Siansia ni, sinmian si Pedro tan pinawil toy negosyon panagsigay. Ingen, kayari pigay bulan, akapannengneng lamet si Pedro tan Jesus, tan diad saya et kinerew nen Jesus ed si Pedro ya iter toy amin a panaon to bilang disipulo To.

Diad saman, naknaksawan si Pedro ed makapadismayan impansigay dan sanlabi. Paulit-ulit dan impelag iray iket da, balet anggapoy nanaerel da. Seguradon impaway la nen Pedro so amin ya amta tan abilidar to. Impepelag da lay iket da ed anggad iner a posiblin pakalaay sira. Anganko, singa ed maslak a managsigay, no maminsan et iisipen ton nanengneng to komon so anggad dalem na dayat pian naromog to iramay sira odino napasurob to ira ed iket to. Balet no ontay nonoten to, lalo labat a nadismaya. Insan diad si Pedro, say panagsigay et aliwan panagrelaks ta walaray akadepende ed sikato. Diad kaunoran, sinmakbit si Pedro a kalimalima. Balet kaukolan to nin siansia a linisan iray iket. Sirin, walay gagawaen to sanen inasinggeran nen Jesus.

Antis na satan, si Jesus et minukot na totoon madengedengel ed ibabaga to. Kanian linmugan ed baloto nen Pedro tan kinerew ton onarawi daiset ed baybay. Diad satan, malinlinew da lan arengel iray ibabangat nen Jesus. Madengedengel met si Pedro. Agton balot onsasawa ed saray paliwawa nen Jesus nipaakar ed manunan tema na mensahe to, say Panarian na Dios. Talagan baleg a pribilehyon tulongay Kristo a mangipulong ed sayan mensahe na ilalo diad interon nasyon! Balet, praktikal kasi itan? Antoy  pambilay da ey? Seguro, sankanonot lamet nen Pedro imay agawa kalabian labat, ya anggapoy gunggonay impansagpot da.​—Lucas 5:1-3.

Kasumpal nen Jesus, inkuan to’d si Pedro: “Laka yo ed bandad aralem tan ipelag yo ray iket yo, pian makala kayoy sira.” Manduaruwan maong si Pedro. Inkuan to: “Sanlabi kami lan nansagpot, et anggapoy nala mi. Balet lapud ibabagam, ipelag ko ray iket.” Seguradon anggapo la komoy plano nen Pedron ipelag lamet so iket, lalo la ta diad satan et aliwa lan oras na kapapaway tan pangakan na saray sira! Balet siansia nin inmunor si Pedro, a nayarin sininyasan to ray kakaiba ton walad sananey a baloto ya ontumbok.​—Lucas 5:4, 5, Maung a Balita.

Abiglay Pedro nen guyoren to lay iket. Ambelat itan! Ginuyor to ni itan a maong, tan nanagunoyan et anengneng toy mantampuwag a narel dan sira! Atarantay Pedro. Kinaweyan to iramay kakaiba to ed sananey a baloto. Kaasingger da, naamtaan dan agmanaya nakarga na sakey a baloto iray narel da. Pinano day duaran baloto, balet siansia nin ag-onduga, tan ngalngali la iratan onlereg. Talagan agmakapanisiay Pedro. Nensaman, anengneng to lay Jesus ya angusar ed pakayari to, balet duma iya ta sikaton mismoy akaeksperiensya! Makapakelaw iyan too! Pati saray sira, napaloob to’d iket! Akaliknay takot si Pedro. Kanian, tinmalimukor tan kuan to: “Arawi ka’d siak, Katawan, ta makasalanan ak a too!” Panon a tuan say sakey a kapara to et magmaliw a makanepegan a miulop ed Sakey a walaay autoridad a mangusar ed mismon pakayari na Dios ed ontan a paraan?​—Lucas 5:6-9, MB.

Oniay maaron imbaga nen Jesus: “Agka natatakot. Manlapud natan, magmaliw kan sumisigay na too.” (Lucas 5:10, 11, MB) Aliwa iyan panaon pian manduaruwa odino ontakot. Anggapoy basiyan na panduaruwa nen Pedro nipaakar ed inagew-agew iran pamaakaran a singa say panagsigay; anggapo met so basiyan na takot to nipaakar ed saray lingo tan kakulangan to. Dakel ni gawaen nen Jesus a kimey, say ministeryo ton manresulta’d baleg a pananguman. Say Dios a panseserbian to et ‘mamerdona na daakan.’ (Isaias 55:7) Asikasoen nen Jehova so pankaukolan da, pisikal man o espiritual.​—Mateo 6:33.

Tampol ya inawat nen Pedro itan ya imbitasyon, a singa di Santiago tan Juan. “Nen niyakar da ed dalin so saray baloto ra, tinaynan da ya amin, tan tinmumbok ira ed sikato.” (Lucas 5:11) Angipatnag na pananisia si Pedro ed si  Jesus tan ed Samay angibaki ed sikato. Satan lay sankaabigan a desisyon to. Saray Kristiano natan a dadaegen day duaruwa tan takot da pian makapanlingkor ed Dios et mangipapatnag met na pananisia. Tan ag-ira alingo-lingo ed satan a panmamatalek da ed si Jehova.​—Salmo 22:4, 5.

“Akin et Nanduaruwa Ka?”

Kalabas na duay taon kayari impankabat di Pedro tan Jesus, agawa imay asalambit ed gapo ya eksena ed Dayat na Galilea. Siempre, agtayo amta iray nononoten nen Pedro legan ton manbebegsay. Dakdakel la ray agawa! Tinambal nen Jesus so katulangan a bii nen Pedro. Insalaysay toy Sermon ed Palandey. Panamegley na bangat tan saray makapanyarin gawa to, aminpigapiga ton pinaneknekan a sikato so Mesias, say Pinili nen Jehova. Diad inlalabas na bulan, seguradon abawasan met la ray kakapuyan nen Pedro, ya aliwa lan main-inomay a makaliknay takot tan duaruwa. Sikatoy pinili ni ingen nen Jesus a magmaliw a sakey ed saray 12 apostol to! Balet magano lan naamtaan nen Pedro ya agto ni manaya adaeg so takot tan duaruwa to.

Legan na komapat a panagbantay ed labi, odino diad baetan na alas-3 na palbangon tan ibubutay na agew, abigbiglay Pedro tan tinmundan nambegsay. Diad bandad man et walay nanenengneng ton onggagalaw! Anto kasi ‘man, ompan repleksion labat na liwaway bulan ed daluyon? Andi, aliwan magalaw tan masyadon maptek. Agi, too manaya! Toon manaakar ed tapew na dayat! Manasingger lan manasingger, tan singano paarap ed sikara. Ataktakot iray disipulo tan abaloan da et maniilusyon ira labat. Kabekta et nansalita itan: “Pakpel yoy loob yo, ta siak ya. Agkayo natatakot!” Si Jesus manaya!​—Mateo 14:25-28, MB.

Inkuan nen Pedro: “Katawan, no tuan sika, parago mo ak a manakar ed tapew na danum.” Say labay ton tampol et onlasur la’d dayat. Makmakpel! Labay ton nasalin mismo iyan nikadkaduman milagro tan amtaen no talagan mabiskeg so pananisia to. Tinawag nen Jesus si Pedro, kanian sikatoy linmasur ed madaluyon a dayat. Isip mo pay alikna to sanen kalasur to et singa dalin so gagatinan to tan akaalagey ed tapew na dayat. Seguradon alay pandinayew to legan a manaakar paonla’d si Jesus. Balet kabebekta, anguman so liknaan to.​—Mateo 14:29, MB.

Kaukolan ya iteen nen Pedro so imano to ed si Jesus. Lapud si Jesus, ya angusar ed pakayari nen Jehova, so makasengeg no akin ya ag-onlelereg si Pedro. Tan gagawaen itan nen Jesus lapud pananisia nen Pedro ed sikato. Balet ta  aguloy Pedro. Oniay agawa: ‘Sanen anengneng to so dagem, ataktakot.’ Ninengneng nen Pedro iray daluyon ya ombabasig ed baloto, a manpupulasi tan manburabura, kanian asabiay takot. Seguro naiisip toy sarili ton onlelereg tan nalelener ed dayat, anggad atalo la na takot so pananisia to. Samay lakin nginaranan a Bato lapud potensyal ton magmaliw a mapekder et onlelereg lan singa bato lapud kinmapuy so pananisia to. Maong ya onlangoy si Pedro, balet agto la itan naisip natan. Oniay inyeyag to: “Katawan, ilaban mo ak”! Siningkat nen Jesus so lima to tan ginuyor to. Insan, diman a mismo ed tapew na dayat et oniay indanet ton importantin leksion ed si Pedro: “O sika makulang na pananisia, akin et nanduaruwa ka?”​—Mateo 14:30, 31.

“Nanduaruwa”​—dugarugan deskripsion! Say duaruwa et nayarin makaderal a maong. No manpadaeg tayo ed satan, onkapuy so pananisia tayo tan onlereg tayo’d espiritual. Nepeg tayon labanan itan! Panon? Pansiansiaen tayon dugay akateenay imano tayo. No piimano tayo ray pakatatakotan tayo, pakakadismayaan tayo, tan saray mangaabala ed sikatayo’d panlilingkor ed si Jehova tan ed Anak to, ombaleg so duaruwa tayo. Balet, no iteen tayoy imano tayo ed si Jehova tan ed Anak to, diad saray agawaan da, gagawaen da, tan gawaen da ni parad saray mangaaro ed sikara, mansiansian mabiskeg so pananisia tayo.

Legan a tutumboken nen Pedro si Jesus papawil ed baloto, anengneng ton tinmunday bagyo. Dinmeen so Dayat na Galilea. Sikatoy akibiang ed saramay kapara ton disipulo a mangikuan, “Tua a sika so Anak na Dios.” (Mateo 14:33) Legan ya onliliwawa, seguradon napnoy pisasalamat so puso nen Pedro. Naaralan ton labanan so duaruwa tan takot to. Tua a dakel ni kaukolan ton dalanen pian magmaliw ya onma’d samay anengneng nen Jesus ed sikato, salanti, Kristianon singa bato. Balet sikatoy determinadon ag-onsuko tan mantultuloy ya onaligwas. Ontan met kasi determinasyon mo? Seguradon antam la natan a maabig so pangalig ed pananisia nen Pedro.

[Litrato ed pahina 22, 23]

Anengneng nen Jesus so baleg a potensyal na sayan mapaabeban managsigay

[Litrato ed pahina 23]

“Katawan, . . . makasalanan ak a too”

[Litrato ed pahina 24, 25]

‘Sanen anengneng to so dagem, ataktakot’