Ia Faaaʻoaʻo i lo Latou Faatuatua

Sa Ia Tauivi Faasaga i le Fefe ma le Masalosalo

SA TAUALO malosi e Peteru le vaa, ma pulatoʻa atu i le pō. Po o si malamalama itiiti lea na ia iloa atu i le talafatai i sasaʻe, o se faailoga o le tafa mai o ata? Ua tigā lona tua ma tauʻau i le umi o alo le vaa. Ua agi mai le matagi ma ua lelea solo ai ona lauulu, ma ua amata ona sousou le Sami o Kalilaia. Ua taia e galu le taumua o le vaa, ma ua susū ai o ia i le pisi mai o le suāsami. Ua faaauau pea ona ia alo atu.

O se vaimea i inā i uta i le matafaga, na tuua ai e Peteru ma ana aumea Iesu. I lenā aso, na latou vāai ai o fafaga e Iesu le faitau afe o le motu o tagata ua fia aai, i ni nai falaoa ma iʻa. Sa tali mai tagata e ala i le taumafai e fai Iesu ma tupu, ae e leʻi manaʻo o ia e aafia i a latou faiga faapolotiki. Sa ia maumaututū foʻi ia lē iai i ona soo ni faanaunauga faapena. Ua sola ese ma lafi mai le motu o tagata, ua ia augani atu i ona soo e feosofi i le vaa ma agaʻi atu i le matafaga i le isi itu, ae alu na o ia i le mauga e tatalo ai.—Mareko 6:35-45; Ioane 6:14, 15.

Ua lata ina atoa le masina ma ua maualuga, a o feosofi soo i totonu o le vaa; ma ua agaʻi mālie atu nei i le talafatai i sisifo. Peitaʻi, e na o ni nai maila na agaʻi atu i ai. O le malosi ma le gogolo leotele o le savili ma galu, na faigatā ai ona talanoa. Ae e foliga mai, sa leʻi talanoa ane Peteru ae na manatunatu loloto na o ia.

Sa matuā anoanoaʻi mea e mafaufau i ai! Sa mulimuli o ia iā Iesu le Nasareta mo le silia i le lua tausaga, lea e tele mea na tutupu ai. E tele mea na ia aʻoaʻoina, ma o loo tele pea mea e na te aʻoaʻoina. O lona lotomalie e faia faapea—e tauivi faasaga i tulaga faigatā e pei o le masalosalo ma le fefe—ua avea ai o ia ma faaaʻoaʻoga mataʻina mo i tatou e faaaʻoaʻo i ai. Seʻi o tatou vāai pe faapefea.

“Ua Ma Maua le Mesia”!

E lē mafai ona galo iā Peteru le aso na la feiloaʻi ai ma Iesu le Nasareta. O lona uso o Aneterea, o ia lea na muamua faailoaina atu iā te ia le tala e faateʻia ai e faapea: “Ua ma maua le Mesia.” Ona o na upu, na amata ai ona suia le olaga o Peteru. O le a lē toe pei o le olaga sa iai muamua.—Ioane 1:41.

Sa nofo Peteru i Kapanaumi, o se aai e tū i le matafaga o se vaituloto e taʻu o le Sami o Kalilaia. Sa la faia ma Aneterea se pisinisi fai faiva, faatasi ma atalii o Sepetaio o Iakopo ma Ioane. Sa nonofo faatasi Peteru ma lana avā, faapea foʻi le tinā o lana avā ma lona uso o Aneterea. Ina ia saunia mea e manaʻomia e lona aiga e ala i faiga faiva, e mautinoa e aofia ai galuega mamafa, le malosi, ma tomai. E mafai ona tatou mafaufau i le tele o pō e fai ai ia galuega—e lafo atu e nei tamāloloa upega i le va o vaa e lua ma toso aʻe i luga po o ā lava iʻa e maua. E mafai foʻi ona faaata i le mafaufau aso o galuega fitā, a o faavasega iʻa ma faatau atu, ma suʻi upega ma faamamā.

Ua taʻu mai e le Tusi Paia o Aneterea o le soo o Ioane le Papatiso. E mautinoa na faalogo atu Peteru i faamatalaga a lona uso e faatatau i le feʻau a Ioane. I se tasi aso, na vaai ai Aneterea iā Ioane o faapea lana faamatalaga e faatatau iā Iesu le Nasareta: “Vaai, o le Tamaʻi Mamoe a le Atua!” O inā na avea ai Aneterea ma soo o Iesu ma taʻu atu ma le naunau iā Peteru lenei  tala fiafia: Ua i inei le Mesia! (Ioane 1:35-40) Ina ua mavae le fouvalega i Etena pe tusa o le 4,000 tausaga muamua atu, na folafola mai e Ieova le Atua o le a iai se tagata faapitoa e sau e saunia le faamoemoe mo tagata. (Kenese 3:15) Na feiloaʻi Aneterea ma lenei Faaola, ma o ia lava o le Mesia! Na faanatinati atu loa foʻi Peteru e feiloaʻi atu iā Iesu.

A o leʻi oo mai i lenā aso, sa iloa Peteru i le igoa, o Simona po o Simeona. Ae na silasila atu Iesu iā te ia ma faapea atu: “ʻO oe o Simona le atalii o Ioane; o le a faaigoa oe o Kefa’ (pe a faaliliuina, o Peteru).” (Ioane 1:42) O “Kefa” o se nauna taatele e uiga atu i le “maa,” po o le “papa.” E mautinoa, o na upu a Iesu sa faavaloaga. Sa ia muaʻi silafia o le a avea Peteru e pei o se papa—o se tagata e tumau, mautū, ma faatuatuaina lana taaʻiga i soo o Keriso. Pe na vaai faapena Peteru iā te ia? E foliga mai e lē mautinoa. E oo lava i nisi e faitau i Evagelia i aso nei, e latou te lē o vaaia ai iā Peteru ni uiga o le tumau ma faatuatuaina. Ua faapea mai nisi, e foliga mai e lē tumau ma fesuisuiaʻi o ia.

E iai vaivaiga o Peteru. Ma na malamalama lelei i ai Iesu. Ae o Iesu, e pei o lona Tamā, o Ieova, e tagaʻi pea lava i uiga lelei o loo i tagata. Na silafia e Iesu mea e ono mafai ona fai e Peteru, ma manaʻo e fesoasoani iā te ia e atiaʻe na uiga lelei. O loo silasila foʻi Ieova ma lona Alo, i uiga lelei o loo iā i tatou. Atonu e faigatā ona tatou talitonu e tele ni uiga lelei e la te mauaina iā i tatou. Ae peitaʻi, e manaʻomia ona tatou talitonuina lo la finagalo, ma ia faaalia le lotomalie e toleniina ma suia i tatou e pei o Peteru.—1 Ioane 3:19, 20.

“Aua E te Toe Fefe”

E foliga mai na faatasi Peteru ma Iesu i se vaega o la latou talaʻiga faataamilo sa fai. Atonu na ia vaai o faia e Iesu lana uluaʻi vavega, o le faaliliuina o le vai e avea ma uaina i se tausamaaga o se faaipoipoga na faia i Kana. Ae e sili atu ona tāua lona faalogo atu i le feʻau mataʻina e iai se faamoemoe e faatatau i le Malo o le Atua. E ui i na mea na ia faalogo i ai, ae na ia tuua Iesu ma toe foʻi i lana pisinisi faifaiva. Ae i ni masina mulimuli ane ai, na toe feiloaʻi ai Peteru ma Iesu—ma i le taimi lea na valaaulia ai e Iesu Peteru e mulimuli atu iā te ia i lona olaga atoa.

Faatoʻā uma mai lava se galuega faigatā ma le faavaivai loto i le pō. Sa tuu ma saga tuu atu pea i lalo e le ʻau faifaiva a latou upega i le sami, ae toso aʻe lava e leai ni iʻa e maua. E mautinoa na faaaogā e Peteru lona poto masani ma lona tomai ina ia maua mai ni iʻa, e ala i le faataʻitaʻi o isi vaega o le sami e suʻe po o fea o aai ai iʻa. E mautinoa, e iai taimi na pei ai o ia o le toʻatele o isi tagata faifaiva, e talotalo maʻimau pe ana mafai ona ia iloa atu le ʻauiʻa ma tataʻi mai i lana upega. O na manatu e na ona atili ai ona fiu. E leʻi fagota Peteru e avea o se mea e mālōlō i ai; sa faalagolago atu tagata iā te ia e maua mai ni iʻa. Ae na toe foʻi mai lava e leai ni iʻa. E ui i lea, sa tatau lava ona faamamā upega. Sa pisi o ia e faamamā upega ina ua alu atu Iesu iā te ia.

Na fetuleni atu tagata iā Iesu ina ia faalogologo i ana fetalaiga. Ona ua siʻomia o ia e tagata, na oso ai Iesu i le vaa o Peteru ma talosaga atu iā te ia e tuutuu teisi ese atu le vaa mai le matafaga. Sa lagona lelei atu lona siʻufofoga mai le vai, ma aʻoaʻo atu Iesu i le motu o tagata. Sa faalogologo lelei atu Peteru e pei o le motu o tagata o loo i le matafaga. E leʻi fiu o ia e faalogologo atu a o faalautele e Iesu le matua  autū o lana talaʻiga—le Malo o le Atua. Maʻeu se faaeaga o le fesoasoani i le Keriso e folafola atu lenei feʻau o le faamoemoe i le atunuu atoa! Ae pe e talafeagai lenā tulaga? O le a faapefea ona tausia i laʻua? Atonu na toe mafaufau Peteru i le pō lea sa ia taumafai ai e maua ni iʻa.—Luka 5:1-3.

Ina ua uma fetalaiga a Iesu, ona ia faapea atu lea iā Peteru: “Ia tuutuu atu le vaa i le mea loloto, ma lafo ifo ai o outou upega, ina ia maua ai ni iʻa.” Sa tele le masalosalo o Peteru. Ua ia faapea mai: “Le Faiaʻoga e, ua alu le pō atoa o matou fagogota ae e leai se mea na maua, ae ona o lau fetalaiga, o le a ou toe lafo ifo ai upega.” E foliga mai e leʻi manaʻo Peteru e toe lafo le upega—aemaise o le taimi lea e lē o aʻai iʻa! Ae sa ia usitaʻi pea, ma e foliga mai na ia talotalo atu i lana ʻaufaifaiva o loo i le isi vaa e mulimuli mai iā i laʻua.—Luka 5:4, 5.

Ua teʻi Peteru ina ua ia lagona ua mamafa le upega a o taumafai e toso aʻe i luga. Ua lē talitonu, ma toso malosi mai le upega, ma e leʻi umi, ae ia vaaia le anoanoaʻi o iʻa o loo feminoiaʻi solo i totonu o le upega! Ua ia talo faanatinati atu i tamāloloa o loo i le isi vaa e ō mai e fesoasoani mai. Ina ua latou ō mai, na iloa ai e lē gafatia e le vaa e tasi nei iʻa uma. Na latou faatumu vaa uma e lua, ae na tele pea iʻa—ma ua amata ona tau magoto le vaa i le mamafa o iʻa. Na matuā faateʻia Peteru i le ofo tele. Na ia vaaia galuega o le mana o Keriso muamua atu, ae i le taimi lea, ua aafia totino ai o ia! O le tagata tonu lenei e mafai ona ia tataʻi iʻa i totonu o le upega! Ua amata ona fefe Peteru. Ua tootuli ifo ma faapea atu: “Le Alii e, ia e maliu ese atu, auā o aʻu o se tagata agasala.” E talafeagai faapefea ona ia auaufaatasi ma Lē o loo iai le pule e faaaogā ai le mana o le Atua i na auala?—Luka 5:6-9.

Sa faapea atu ma le agalelei Iesu: “Aua e te toe fefe, e amata atu nei ona e maua tagata.” (Luka 5:10, 11) E lē o se taimi lenei e masalosalo ma fefe ai. E leai se faavae o le lē mautonu o Peteru i mataupu masani o le olaga e pei o le faifaiva; o lona popole i mea e lē taulau ai ma lagona o lona lē agavaa. Sa telē se galuega a Iesu e ao ona fai, le faiva lea o le a aafia ai le lumanaʻi o tagata. Sa ia auauna i se Atua o lē e “na te matuā faamagaloina.” (Isaia 55:7) O le a tausia e Ieova o latou manaʻoga faaletino ma faaleagaga.—Mataio 6:33.

Sa vave ona tali atu Peteru, e pei foʻi o Iakopo ma Ioane. ‘Ua ave i uta o latou vaa, ua tuua mea uma lava, ae mulimuli atu iā te ia.’  (Luka 5:11) Na faatuatua Peteru iā Iesu ma Lē na auina atu o ia. O se filifiliga lea e sili ona lelei ua ia faia. O Kerisiano i aso nei ua foʻia lo latou uiga masalosalo ma le fefe, ina ia auauna i le Atua, ua faapena foʻi ona faaalia lo latou faatuatua. O lenā faatuatua iā Ieova, e lē o se mea ua tuu sesē.—Salamo 22:4, 5.

“Aiseā ua E Masalosalo Ai?”

Pe tusa o le lua tausaga talu ona feiloaʻi ma Iesu, na alo atu ai e Peteru lona vaa i se pō savili i le Sami o Kalilaia e pei ona taʻua i le amataga. O le mea moni, e tatou te lē iloa po o ā ona mafaufauga na iai. E tele mea e mafai ona tau i ai le mafaufau o Peteru! Na faamālōlō e Iesu le tinā o le avā a Peteru. Sa faia e Iesu se Lauga i le Mauga. Sa faaalia pea lava pea, e ala i ana aʻoaʻoga ma ana galuega mamana, o ia o Lē na Filifilia, ma o le Mesia. A o mavae atu masina, ua faapena foʻi ona tele ina mou atu le fefe ma le masalosalo o Peteru. Sa filifilia foʻi e Iesu Peteru e avea ma se tasi o ona aposetolo e 12! Peitaʻi, e leʻi teʻa atoatoa le fefe ma le masalosalo o Peteru, lea o le a ia iloaina.

I le taimi o le leoleoga lona fā i lenā pō, pe tusa o le va o le 3:00 i le vaveao ma le oso aʻe o le lā, sa faafuaseʻi ai ona taofi le aloina o le vaa o Peteru ae nofo saʻo i luga. Ua ia iloa atu i galu se mea o loo gaoioi! Po le pipisi o galu lea e iloa atu i le pō masina? E leai, e tū saʻo lava. O se tagata! Ioe, o se tagata, ma o loo savali mai i luga o le sami! A o latalata mai, e foliga mai o loo savali saʻo mai iā i latou. Ua fefefe, ma manatu ia soo o se ituaiga o faaaliga. Ua tautala mai le tagata: “O aʻu lenei, ia outou lototetele ma aua tou te fefefe.” O Iesu!—Mataio 14:25-28.

Ua tali atu Peteru e faapea: “Le Alii e, afai o oe, ia e fai mai iā te aʻu ou te alu atu iā te oe i luga o le vai.” O le lagona muamua na oso aʻe iā te ia, o le loto toa. Sa tumu o ia i le fiafia i lenei vavega mataʻina, ae sa manaʻomia ona faamautinoa atili lona faatuatua. Sa manaʻo e aofia ai ma ia i le mea o loo tupu. Sa fetalai atu ma le agalelei Iesu iā te ia. Na alu ifo Peteru i le itu o le vaa agaʻi i lalo i le sami. Seʻi manatu i lagona o Peteru a o mafai ona tū ona vae i luga o le sami. Sa tatau ona matuā maofa o ia a o savali atu iā Iesu. Ae peitaʻi, e leʻi umi ae toe oso aʻe se isi lagona iā te ia.—Mataio 14:29.

Sa tatau ona taulaʻi atu pea lana vaai iā Iesu. Sa faaaogā e Iesu le mana o Ieova, ina ia mafai ai ona tū Peteru i luga o galu o le sami. Ma sa faia faapea e Iesu ona o le faaalia o le faatuatua o Peteru iā te ia. Ae sa oo ina tosina ese le vaai a Peteru. E tatou te faitau e faapea: “Ina ua vaai atu i le matagi malosi, ona fefe ai lea o ia.”  Sa vaai atu Peteru i galu o taia ai le vaa, ma pisipisi atu galu ona o le matagi, ona ia fefe loa lea. Atonu na ia mafaufau o le a goto ifo i lenā vaituloto, ma malemo ai. A o oso aʻe lona fefe, ua itiiti atu ai ma lona faatuatua. O le tamāloa lea sa faaigoa o le Papa ona o lona mafai ona tumau, ua amata nei ona magoto ifo pei o le maa ona o le lē mautū o lona faatuatua. O Peteru o se tagata e tomai i le aau, ae ua lē mafai nei ona faalagolago atu i lenā tomai. Na ia alaga atu: “Le Alii e, ta fia ola!” Na tago atu Iesu iā te ia ma toso aʻe i luga. O lea, a o iai pea i luga o le vai, sa faamamafa e Iesu se lesona tāua iā Peteru: “Aiseā ua e masalosalo ai? Ua matuā laʻitiiti tele lou faatuatua!”—Mataio 14:30, 31.

“Masalosalo”—maʻeu se faaupuga talafeagai! O le masalosalo e mafai ona matuā afāina ai. Afai e tatou te lolo atu i ai, e mafai ona tatou magoto ifo ai faaleagaga. E manaʻomia ona tatou taumafai ma le malosi! E faapefea? E ala i le saʻo o le mea e taulaʻi atu i ai. Pe a fai e tatou te mafaufau pea i mea e tatou te fefe ai, mea e faavaivaia ai i tatou, o mea e tatou te tosina ese ai mai iā Ieova ma lona Alo, o le a tupu aʻe la lo tatou masalosalo. Pe a tatou taulaʻi atu iā Ieova ma lona Alo, i mea na la faia, mea o loo faia, ma mea o le a la faia mo i latou e alolofa iā i laʻua, o le a leai la so tatou masalosalo lea e faaleagaina ai lo tatou faatuatua.

A o mulimuli atu Peteru iā Iesu agaʻi i le vaa, na ia vaaia ua fāiifo le matagi. Ua toʻafimālie le Sami o Kalilaia. Ona auai faatasi lea o Peteru ma isi soo e taʻutino atu faapea, “E moni o oe lava o le Alo o le Atua.” (Mataio 14:33) A o tafa mai ata o le vaveao, na matuā faatumulia Peteru i le lotofaafetai. Ua ia aʻoaʻoina e aua neʻi avea lona fefe ma mea e masalosalo ai iā Ieova ma Iesu. Ioe, e tele ni suiga e manaʻomia ona ia faia a o leʻi avea ma Kerisiano e pei o se papa lea na muaʻi silafia e Iesu. Ae na ia maumauaʻi pea e taumafai e atiaʻe lona itu faaleagaga. Po o iā te oe lenā naunautaʻiga? O le a e mautinoa e aogā lou faaaʻoaʻo i le faatuatua o Peteru.

[Ata i le itulau 22, 23]

Na silafia e Iesu, e tele ni mea e mafai ona faataunuuina e lenei tagata faifaiva lotomaulalo

[Ata i le itulau 23]

“O aʻu o se tagata agasala”

[Ata i le itulau 24]

“Ina ua vaai atu i le matagi malosi, ona fefe ai lea o ia”