¿Yacharqankichu?

‘Templota qhawaqkunata kamachiq’, ¿imatataq ruwaq?

Biblia nisqanmanjina juk kuti, Pedrowan, Juanwan Jesusmanta yachachichkaptinku, templota qhawaqkunata kamachiqqa, saduceoswan, sacerdoteswan khuska chayamurqa, Pedrotawan, Juantawan japʼichispa carcelman wisqʼaykuchinankupaq (Hechos 4:1-3). Bibliaqa, templota qhawaqkunata kamachiq imastachus ruwaq kasqanta mana sutʼita willanchu, chaywanpis wak librosqa, imastachus ruwaq kasqanta astawan sutʼinchan.

Jesús Jallpʼapi kachkaptin, templota qhawaqkunata kamachiqmanta nisqaqa, kuraq sacerdotella astawan atiyniyuq karqa. Templota qhawaqkunata kamachiqqa, templopi imaynatachus Diosta yupaychakunanpaq qhawariq. Chantá templo ukhupi, jawapi ima, ni ima chʼaqwa kananpaq templota qhawaqkunata churallaqtaq. Wakkunap yanapayninkuwantaq paykunata kamachiq paqarinpi templop punkunta kicharinankupaq, chʼisinpi punkunta wisqʼanankupaq, mayniqmanchus mana pipis yaykullanmanchu chayman mana pillatapis yaykuqta saqinankupaq, templopi valorniyuq imasta qhawanankupaq ima.

Tukuynin sacerdotes, levitas imaqa, 24 tʼaqaspi rakʼisqas kachkarqanku, sapa tʼaqataq watapi iskay kutita, juk semana juntʼata templopi llamkʼaq. Chantá ichá sapa tʼaqapi templota qhawaqkunata kamachinanpaq juk sacerdote churasqa karqa (1 Crónicas 24:1-18).

Templota qhawaqkunata kamachiqkunaqa, atiyniyuq karqanku. Biblia nisqanmanjina paykunaqa, kuraq sacerdoteswan khuska imaynatachus Jesusta wañuchichinankupaq yachachinakurqanku. Chantá atiyninpi kaqkuna runaswan Jesusta japʼichirqanku (Lucas 22:4, 52).

Mateo 3:4 pʼiti nisqanmanjina Juan Bautista, “langostasta, lachiwana miskʼita ima mikhuq”. Chaywanpis, ¿chay tiempopi runas langostastapunichu mikhuq kanku?

Wakinkunaqa, Juan Bautista mana langostastapunichu mikhuq kasqanta ninku, manaqa thaqusta, chayri challwasta manachayri kʼita qhurap puquyninta mikhuq kasqanta ninku. Chaywanpis Mateoqa, griego simipi evangelionta qillqachkaspa, kay pʼitipi langostasmantapuni parlachkarqa. Israel jallpʼapi juk laya langosta astawan riqsisqa, chay langostastaq chakrasta mikhukapuspa qʼarata saqinku (Joel 1:4, 7; Nahúm 3:15).

Unay tiempopi, asirios, etíopes imapis, langostasta mikhuq kanku. Kunan tiempopipis wakin judíos, beduinos imaqa, langostasta mikhullankutaq. Unayqa Israel suyupi wakchas kaqkunaqa, langostasllata mikhuq kanku. Mikhukapunankupaqtaq umanta, chakisninta, wiksanta ima urqhuq kanku. Chantá chawata, chayri chayachispa, manaqa chʼakichispa, kachichaspa chayri vinagrepi manaqa lachiwana miskʼipi chulluchispa mikhuq kanku.

Ichapis Juanqa, chʼin pampapi Diosmanta willachkaspa, langostasta tariyta atillaq (Marcos 1:4). Chay langostaqa achkha alimentoyuq karqa, lachiwana miskʼipi chhapuspataq astawan sumaq alimentoyuq karqa.

[28 paginapi dibujo/foto]

Asirios granadasta, langostasta ima apachkanku

[Maymantachus foto urqhukusqan]

From the book Discoveries Among the Ruins of Nineveh and Babylon (1853)