YAQA 1950 watakuna ñawpaqtan apóstol Pablo iñiqmasinkunaman nirqan: “Makilla cuidakuychis, paqtan pipas q’otusunkichisman yanqa mana valeq yuyaykunawan [filosofía nisqawan], llulla yachachikuykunawan ima, paykunaqa manan Cristoq yachachisqantachu yachachinku, aswanpas runakunaq yachachikuynillantan”, nispa (Colosenses 2:8).

Chaytaña yacharqanku chaypas, pachak wata qhepamanqa wakin cristianokunaqa filosofía nisqa yachachikuykunaman hinan yachachiyta qallarirqanku, ¿imaraykun chayta ruwarqanku? Roma llaqtayoq allin yachaysapa runakunata cristianoman tukuchinankupaqmi.

Hukninmi karqan Justino Mártir. Paypa nisqanman hina, Diospa Churinqa ñas reqsichikusqaña Grecia llaqta filósofo runakunaman, manaraq kay pachaman hamushaspa. Paymi huk teólogo runakunapiwan niqku: ‘Filosofiamanta, cuentokunamantapas yachayqa allinmi kanqa lliw runakuna cristiano kapunankupaq’, nispa.

Justino Martirpa yachachikuyninkunawanmi askha runakuna cristianoman tukupurqanku. Ichaqa chaykunapi runakuna creeshanallankupaqqa huk pantasqa yachachikuykunatawanraqmi paqarichimurqanku, chaykunatan kunan ninku: “Cristianokunaq yachachikuyninkuna”, nispa. ¿Mayqenkunataq chaykunari? Qatiqnin paginakunapi wakinmanta yachasunchis, hinaspa qhawarisunchis huk librokunaq nisqanta Bibliaq nisqanta ima.