Zirtirna Dik Lo 1: Mihringte Hian Thlarau Thi Thei Lo An Nei

He zirtîrna dik lo hi khawi aṭanga lo chhuak nge? “Kristian philosopher hmasate chuan Grik mite ngaih dân thlarau a thi thei lo tih leh thlarau chu Pathian siam, nu pum chhûnga naute insiam ṭan tirha a dah luh a ni tih chu an chhawm a ni.”—The New Encyclopædia Britannica (1988), Volume 11, phêk 25.

Bible-in eng nge a sawi? “A thawin a chhuahsan a, ani chu a leilungah a kîr leh a; chu mi nî ngei chuan a ngaihtuahnate chu a bo nghâl a ni.”—Sâm 146:4.

Bible chuan “mitthi . . . chuan engmah an hre lo,” a ti a. Tin, anni chuan an hmangaih thei lo va, an haw thei hek lo; “thlân [an] kalna tûrah chuan thiltih tûr emaw, remruat tûr emaw, hriatna emaw, finna emaw a awm si lo va,” tiin a sawi belh bawk a ni. (Thuhriltu 9:5, 6, 10) Thi thei kan ni a, thih hnua dam khawchhuak thei engmah kan nei lo. Tûna kan nunna hi mombati alh lai ang a ni a. Chhêm hlum a nih chuan, a alh chu khawiah mah a kal lo. A awm tawh lo ringawt mai a ni.

Mihringte hian thlarau thi thei lo an nei tih zirtîrna chuan zawhna dang a chawk chhuak a ni: Thih hnuah thlarau chu khawiah nge a kal? Mi sualte an thih hian an chungah eng nge thleng?, tihte hi. Kristiana inchhâlte’n thlarau thi thei lo zirtîrna an pawm hian, zirtîrna dik lo dang—hremhmun zirtîrna chu—an pawm belh a ngai ta ṭhîn a ni. (w09-E 11/01)

Hêng Bible chângte nên hian khaikhin rawh: Thuhriltu 3:19, 20; Matthaia 10:28; Genesis 3:19

ZIRTIRNA DIK CHU:

Mi a thih hian, ani chu a awm tawh lo