Ia a pop me ie ei afalafal mi mwääl? “Ewe sou sile itan Plato a fokkun watte an etipetipa ekiekin aramas usun Ell lap seni ekkewe sou tipatchemen chon Kris meinisin.”​—Histoire des enfers (Uruwoon Ell), makkeien Georges Minois, pekin taropwe 50.

“Ipükü som ier mwirin mäloon Jises we, ekkoch Chon Kraist mi fen käeö ekiekin ekkewe sou tipatchemen Kris ra poputä le pwäri lüküer . . . Ra äkkäeüin efich äitien Plato.”​—The New Encyclopædia Britannica (1988), Puk 25, pekin taropwe 890.

Eü puken äweweei met chon Katolik ra ächiföüa a apasa: “Ewe lamalamen Katolik a apöchökküla ewe afalafal pwe a wor ell. Mwittir chök mwirin mäloon aramas mi föfföringaw, ngünür ra feitiw lon ell, ikewe ra kan riäfföü ie lon ‘ekkei esekun.’ Äkkäeüin, iei liwinin ar tipis pwe repwe imu seni Kot.”​—Catechism of the Catholic Church, minen 1994, pekin taropwe 270.

Met ewe Paipel a apasa? “Pun ekewe chon manau ra silei pwe repwe mäla. Nge ekewe sotup resap silei och mettoch, . . . pun esap wor och angang, ekiek, silelap ika tipachem lon lenien sotup [Seol] ewe ia kopwe feila ie.”​—Än Salomon Afalafal 9:5, 10.

Ewe kapasen Ipru Seol a afföü ngeni “lenien sotup,” nge ekkoch Paipel ra afföü ngeni “ell.” Met Än Salomon Afalafal 9:5, 10 a pwäratä usun napanapen ekkewe mi mälo? Itä repwe riäfföü lon Seol pun ina liwinin ar tipis? Aapw, pun ‘rese silei och mettoch.’ Ina popun, lupwen Jop a fokkun riäfföü ren an semwen mi chou, a tingor ngeni Kot: “Kopwe aopaei lon ell [Ipru, sheol].” (Hiop 14:13, Douay-Rheims Version) Ika Seol are ell eü leenien riäfföü esemuch, itä Jop epwe tingor ena? Lon Paipel, ewe kapas ell a chök wewe ngeni peiasen aramas, ikewe esor angang ie.

Esap pwe ei äweween ell a ffatöch me tipeeü ngeni met Paipel a apasa? Inaamwo ika föfförün emön a fokkun annou, nge itä ewe Kot mi tong epwe eriäfföü i tori feilfeilo chök? (1 Jon 4:8) Nge ika a mwääl ewe afalafal usun ekkein ell, itä a mwääl pworausen än aramas manau lon läng?

Apöpö ngeni ekkeei wokisin: Kölfel 146:3, 4; Fofor 2:25-27; Rom 6:7, 23

PWORAUS MI ENLET:

Kot ese eriäfföü aramas lon ekkein ell

[Credit Line]

Barrators—Giampolo/​The Doré Illustrations For Dante’s Divine Comedy/​Dover Publications Inc.