Lalo 2: Mẹylankan lẹ Nọ Jiya to Zòmẹ

Fie wẹ lalo lọ wá sọn? “To tamẹnuplọnmẹtọ Glẹki hohowhenu tọn lẹpo mẹ, mẹhe yinuwado pọndohlan he gbẹtọ lẹ tindo to paa mẹ gando Zòmẹ go ji hugan wẹ Platon.”—Histoire des enfers, gbọn Georges Minois dali, weda 50.

“Sọn gblagbla owhe kanweko 2tọ W.M. tọn mẹ wẹ Klistiani he ko plọn tamẹnuplọnmẹ Glẹki tọn jẹ obá de mẹ lẹ jẹ numọtolanmẹ lọ tindo ji nado yí tamẹnuplọnmẹ enẹ zan do basi dohia yise yetọn tọn ... Tamẹnuplọnmẹ he dọ̀n yé dogo hugan wẹ Platon tọn.”—The New Encyclopædia Britannica (1988), Bladopọ 25, weda 890.

“Nuplọnmẹ Ṣọṣi tọn zinnudeji dọ zòmẹ tin bo ma na busẹ gbede. Tlolo to okú godo, alindọn mẹhe wà ylando he jẹna okú lẹ tọn nọ yì zòmẹ, fie yé nọ jiya yasanamẹ zòmẹ kavi ‘miyọ́n madopodo’ tọn te. Yasanamẹ tangan zòmẹ tọn wẹ yindọ mẹlọ nọ jẹla sọn Jiwheyẹwhe dè kakadoi.”—Catechism of the Catholic Church, zinjẹgbonu 1994 tọn, weda 270.

Etẹwẹ Biblu plọn mí? “Mẹhe to ogbẹ̀ yọnẹn dọ emi na kú; ṣigba oṣiọ lẹ ma yọ́n nude, ... na azọ́n ma tin, linlẹn ma tin, zinzan ma tin, kavi nuyọnẹn to kutomẹ fie hiẹ jei.”—Yẹwhehodọtọ 9:5, 10.

Etẹwẹ wefọ ehe dohia gando ninọmẹ oṣiọ lẹ tọn go? Be yé nọ jiya to kutomẹ nado suahọ nuṣiwa yetọn lẹ tọn wẹ ya? Lala. Na yé “ma yọ́n nude.” Nuhe zọ́n niyẹn bọ to whenue tọgbo Job to oyà azọ̀n ylankan de tọn ji sinsinyẹn, e vẹvẹna Jiwheyẹwhe dọmọ: “Whlá mi do yọdò mẹ.” (Job 14:13) Eyin nọtẹn yasanamẹ madopodo tọn de wẹ kutomẹ kavi yọdò yin, zẹẹmẹ tẹwẹ obiọ Job tọn na ko tindo? To Biblu mẹ, hogbe he yin lilẹdo “kutomẹ” ma yin nudevo de hugan yọdò paa gbẹtọvi lẹ tọn, fie yè ma nọ wà nudepope te.

Be zẹẹmẹ ehe ma sọgbe hẹ lẹnpọn dagbe po Owe-wiwe po hugan ya? Nuṣiwa tẹ, mahopọnna lehe e sinyẹn sọ, wẹ sọgan hẹn Jiwheyẹwhe owanyinọ mítọn nado sayana mẹde kakadoi? (1 Johanu 4:8) Ṣigba eyin nuplọnmẹ olọnzomẹ tọn yin lalo, dehe gando gbẹninọ to olọn mẹ go lo?

Sọ pọ́n wefọ ehelẹ: Psalm 146:3, 4; Owalọ lẹ 2:25-27, NW; Lomunu lẹ 6:7, 23, NW

NUGBO LỌ DIE:

Jiwheyẹwhe ma nọ sayana gbẹtọ lẹ to zòmẹ

[Asisa Yẹdide tọn to weda 11]

Barrators—Giampolo/The Doré Illustrations For Dante’s Divine Comedy/Dover Publications Inc.