Bubela 2: Babi Basusukanga Mu Kalunganyembo Ka Mudilo

Le buno bubela butambile kwepi? “Mu bafilozofe Bangidiki bonso ba kala, umo wāikele na bukomo bukatampe bwa kunekenya bakwabo mu milangwe itala Kalunganyembo i Platon.”— Histoire des enfers, na Georges Minois, paje 50.

“Tamba pa bukata bwa myaka tutwa 2 K.K., Bene Kidishitu bādi bafundijibwa filozofi imoimo ya Bangidiki, bo bāshilwile kunena’mba i biyampe nabo bālombole lwitabijo lwabo mu bishima byayo . . . Filozofi yēbasangeje kutabuka i ya Platon [bufundiji bwa Planton].”—The New Encyclopædia Britannica (1988), Volime 25, paje 890.

“Bufundiji bwa Kipwilo bubingijanga amba kalunganyembo ka mudilo kadi’ko kadi i ka nyeke. Myuya ya boba bafwa na bubi bwa kupyana yendelelanga ponka na ponka mu kalunganyembo ka mudilo, moisusulwa na mfuto, ‘mudilo wa nyeke’ wa mu kalunganyembo ka mudilo. Mfuto minemine ya mu kalunganyembo i kusansana nyeke na Leza.”—Catechism of the Catholic Church, kyalupwilwe mu 1994, paje 270.

Lelo Bible unena’po bika? “Ino bōmi bayukile’mba bakafwa; nanshi bafwe kebayukilepo nansha kimo kine, . . . ino kekudipo mingilo nansha kusambakanya bintu pamo miswelo ne miswelo, nansha kuyukidija, nansha ñeni mu kibundu koenda’kwa.”—Musapudi 9:5, 10.

Kishima kya Kihebelu Sheol, kifunkila pa “kīkalo kya bafwe,” i kyalamunwe bu “kalunganyembo” mu malamuni amoamo a Bible. Lelo kino kisonekwa kinena bika pa ngikadilo idi’mo bafwe? Le basusukanga mu Sheole pangala pa bilubo byabo? Mhm, mwanda “kebayukilepo nansha kimo kine.” Ye o mwanda mukulutuba Yoba, pa kususuka bisansa mutyima na misongo ya kashā, wāzenzele Leza amba: “Ii! shi uswele kumfya mu Kalunga-nyembo [Kihebelu, Sheol].” (Yoba 14:13) Lelo kulomba kwandi kwādi na kamweno’ka shi Sheole i kifuko kya masusu a nyeke? Kukwatañana na Bible, kalunganyembo i kibundu’tu mwendanga bantu bonso, mwa kubulwa mwingilo nansha umo.

Mwene buno bushintuludi bwa kalunganyembo i buluji ne bukwatañane na Bisonekwa? Shi Leza wa buswe asusule bantu pampikilwa mfulo uno muswelo, mwene buno i buñumauma bwa poso? (1 Yoano 4:8, Bisonekwa Bitokele) Ino shi kalunganyembo ka mudilo i bubela, le kwenda mūlu nako?

Dingakanya na ano mavese a mu Bible: Mitōto 146:3, 4; Bilongwa 2:25-27; Loma 6:7, 23

NA BUBINE:

Leza kapangapo bantu mfuto na kwibela mu kalunganyembo ka mudilo

[Kifwatulo pa paje 5]

[Kutambile bifwatulo pa paje 5]

Barrators—Giampolo/The Doré Illustrations For Dante’s Divine Comedy/Dover Publications Inc.