Dilongi ya Luvunu 3: Bantu Yonso ya Mbote Kekwendaka na Zulu

Inki kele kisina ya dilongi ya luvunu? Na nima ya lufwa ya bantumwa ya Yezu, banda na luyantiku ya mvu-nkama ya zole T.B., Batata ya Dibundu ya ntete kumaka bantu ya lukumu. Ntangu yo ketadila malongi na bo, mukanda mosi (New Catholic Encyclopedia (2003), Volime 6, lutiti 687) ketuba nde: “Malongi na bo vandaka kutuba mingi nde moyo yina kefwaka ve kebakaka luzingu na paladisu ya zulu mbala mosi na nima ya konso kukedisa yina kevandaka mfunu mpi yina kesalamaka na nima ya lufwa.”

Biblia ketuba inki? “Kiese na bantu yina kele pima, sambu bo ta baka ntoto yina ya Nzambi me silaka bo!”​—Matayo 5:5.

Ata Yezu kusilaka balongoki na yandi nde yandi zolaka ‘kuyidikila bo kisika’ na zulu, yandi monisaka ve nde bantu yonso ya lunungu takwenda kuna. (Yoane 3:13; 14:2, 3) Keti yandi sambaka ve nde luzolo ya Nzambi “kusalama awa na ntoto bonso na zulu”? (Matayo 6:9, 10) Na kutuba ya mbote, bisika zole kevingila bantu ya lunungu. Ndambu na kati na bo tayala na zulu ti Yezu, kansi bantu mingi na kati na bo tazinga kimakulu na ntoto.​—Kusonga 5:10.

Na nima ya bamvula, dibundu ya ntete kusobaka mutindu na yo ya kutadila mukumba na yo na ntoto. Inki kuvandaka mbutu? Mukanda mosi (New Encyclopædia Britannica) ketuba nde: “Dibundu ya leta yantikaka kuyinga mpenza Kimfumu ya Nzambi yina bantu vandaka kuvingila.” Dibundu yantikaka kukumisa ngolo kiyeka na yo na kuvukanaka na mambu ya politiki, mpidina yo buyaka kulanda mambu ya pwelele yina Yezu kutubaka nde balongoki na yandi zolaka kuvanda ve “bantu ya nsi-ntoto.” (Yoane 15:19; 17:14-16; 18:36) Na bupusi ya Ntinu ya Roma Constantin, dibundu kufwaka mwa balukwikilu na yo, ebuna mosi na kati ya lukwikilu yango ketadila mpenza kimuntu ya Nzambi.

Fwanisa baverse yai ya Biblia: Nkunga 37:10, 11, 29; Yoane 17:3; 2 Timoteo 2:11, 12

DYAMBU YA KYELEKA:

Bantu mingi ya mbote tazinga kimakulu na ntoto​—kansi ve na zulu

[Kifwanisu ya kele na lutiti 6]

[Bangogo ya kemonisa kisina ya foto ya kele na lutiti 6]

Art Resource, NY