Miriambo mar 3: Ni Joma Beyo Duto Dhi E Polo

Miriamboni ne ochakore nade? Bang’ tho mar joote Yesu, e higini mag 100 E Ndalowa, jondiko machon mag puonj Jokristo nobiro mobedo gi huma. Buk miluongo ni New Catholic Encyclopedia (2003), Volume 6, ite mar 687, lero weche ma ne gipuonjo kama: “Paro ma ne gipuonjo ahinya ne en ni, ngima maber me polo imiyo chuny mowuok e del, mapiyo bang’ ka osepwodhe kaka dwarore.”

Muma to wacho ang’o? ‘Mano mor manadi ni jo mamuol; nikech gininwang’ piny ka girkeni margi.’—Mathayo 5:5.

Kata obedo ni Yesu nosingone jopuonjrene ni ne odhi ‘losonegi kar dak’ e polo, ne ok onyiso ni jomakare duto biro dhi e polo. (Johana 3:13; 14:2, 3) Donge nokwayo Nyasaye e lamo mondo dwaro mare otimre ‘e piny kaka e polo’? (Mathayo 6:9, 10) Adiera en ni, nitie jomakare mabiro dhi kuonde ariyogo. Mana ji manok ema biro locho e polo gi Kristo, to joma ng’eny biro dak e piny nyaka chieng’.—Fweny 5:10.

Bang’ kinde, kanisa motelo noloko pachgi kuom tich monego gitim e piny. Ang’o ma ne otimore nikech mano? Buk miluongo ni The New Encyclopædia Britannica wacho kama: “Riwruok mar kanisa ne okawo kar Pinyruodh Nyasaye ma ne ikiyo.” Kanisa nochako medo tekone kuom donjo e siasa, kendo ne ok giluwo weche ma Yesu nowacho ayanga ni jolupne ni kik gibed “mag piny ka.” (Johana 15:19; 17:14-16; 18:36) E bwo Ruodh Rumi ma ne iluongo ni Constantine, kanisa ne ok omakre chuth gi moko kuom puonj maggi, ma achiel kuomgi ne en puonj kuom chal mar Nyasaye.

Pim gi ndikogi mag Muma: Zaburi 37:10, 11, 29; Johana 17:3; 2 Timotheo 2:11, 12

ADIERA EN:

Thoth joma beyo biro dak e piny nyaka chieng’, to ok e polo

[En mar manie ite mar 6]

Art Resource, NY