Ia a pop me ie ei afalafal mi mwääl? Eü puken äwewe a apasa: “Än aramas afona inelapen Kot we a lapolo lupwen chommong chon lukun ra kapachelong lon ewe tipitipin lamalamen Kraist. . . . Ren fitu ngeröü ier, ekkena chon lükün ra fen piin ächiföüa me fel ngeni ewe ‘anüfefin mi lap’ me ewe ‘föpwül mi fel esaamwo tori mwän.’”​—The New Encyclopædia Britannica (1988), Puk 16, pekin taropwe 326 me 327.

Met ewe Paipel a apasa? “Kopwele kolu o nouni emon at, o kopwe eita ngeni Jises. Atewe epwe lapalap, o epwe iteni Noun Ewe mi Fakkun Tekia. . . . Iei minne, ewe monukol epwe uputiu epwe iteni mi fel, ewe Noun Kot.”​—Luk 1:31-35.

Ena wokisin a affata pwe Meri inen “Noun Kot,” nge esap inen Kot. Itä epwe tongeni uwei lon upwan Emönnewe ‘esap kuch lon läng’? (1 King 8:27) Meri ese mwo erä fän eü pwe i inelapen Kot. Ewe afalafalen Trinitas a efisatä osukosuk ika iö na Meri. Lon 431 C.E., ewe mwichen nouwisen lamalam lon Efisus a eita ngeni Meri Theotokos (lon kapasen Krik a wewe ngeni “Chon Nöünatiw Kot”) are “Inelapen Kot.” Iwe, ina longolongun än aramas fel ngeni Meri. Ren fitepükü ier, aramasen ewe telinimwen Efisus ra piin fel ngeni ululun ewe anufefin Artemis, ewe koten nöükkis.

Chommong sokkopaten kinikinin än chon Efisus fel ngeni ululun Artemis mi “turutiu seni läng,” äwewe chök ar feffetäl fän ewe ululun, a kapachelong lon ar fel ngeni Meri. (Fofor 19:35) Ekis me ekis, pwal ekkoch föfförün fel, äwewe chök nöünöün liosun Meri me pwal ekkoch lios, ra kapachelong lon än Chon Kraist fel.

Apöpö ngeni ekkeei wokisin: Mattu 13:53-56; Mark 3:31-35; Luk 11:27, 28

PWORAUS MI ENLET:

Meri i inen Nöün Kot we, nge esap inen Kot. Ewe afalafalen Trinitas a efisatä än aramas fel ngeni Meri usun itä pwe i Inelapen Kot