Dilongi ya Luvunu 5: Maria Kele Mama ya Nzambi
Dilongi ya Luvunu 5: Maria Kele Mama ya Nzambi
Inki kele kisina ya dilongi ya luvunu? “Kukumisa mama ya Nzambi kukumaka ngolo ntangu . . . mimpani mingi kufulukaka na dibundu. . . . Bo [mimpani yina kukumaka Bakristu] yedisaka banda ntama kibeni mpusa ya kukangama na Nzambi mpi ya kusambila na nzila ya lusambu ya ‘mama ya nene’ mpi ‘mwense ya Nzambi.’”—The New Encyclopædia Britannica (1988), Volime 16, balutiti 326 mpi 327.
Biblia ketuba inki? “Nge ta baka divumu; nge ta buta mwana ya bakala; nge ta pesa yandi zina: Yesu. Yandi ta vanda muntu ya nene. Zina na yandi ta vanda Mwana ya [Muntu ya Kuluta Kuzanguka, NW]. . . . Yo yina, mwana yina ta butuka bo ta binga yandi muntu ya santu ti Mwana-Nzambi.”—Luka 1:31-35.
Verse yai ya Biblia ketuba pwelele nde Maria kuvandaka mama ya “Mwana-Nzambi,” kansi ve ya Nzambi yandi mosi. Keti yandi lendaka kunata na divumu na yandi Muntu yina ‘ata zulu lenda kuka ve na kubumba’? (1 Bantotila 8:27) Yandi metubaka ve dyambu ya mutindu yina ata mbala mosi. Dilongi ya Butatu kele kima ya mekotisaka mavwanga na yina metala Maria. Na mutindu bo tubaka nde Maria kele Theotokos (ngogo ya Kigreki ya ketendula “muntu yina kubutaka Nzambi”), to “Mama ya Nzambi,” Lukutakanu ya Efezo yina kusalamaka na mvu 431 T.B., kukangulaka nzila na lusambu ya Maria. Mbanza ya Efezo kisika lukutakanu yai ya dibundu kusalamaka, kuvandaka banda bamvu-nkama mingi kisika ya nene ya lusambu ya biteki, yina vandaka kukumisa nzambi-nkento ya lubutu Artemisi.
Yo yina bo mekotisaka mambu mingi ya lusambu ya kiteki ya Artemisi ‘yina katukaka na zulu mpi kwisaka kubwa na ntoto,’ mu mbandu badefile, na lusambu ya Maria. (Bisalu 19:35) Dyambu yankaka yina kukotaka malembe-malembe na malongi ya Bukristu kuvandaka kusadila biteki ya Maria mpi ya bantu yankaka na lusambu.
Fwanisa baverse yai ya Biblia: Matayo 13:53-56; Marko 3:31-35; Luka 11:27, 28
DYAMBU YA KYELEKA:
Maria kuvandaka mama ya Mwana-Nzambi, kansi ve ya Nzambi yandi mosi. Dilongi ya luvunu ya Butatu kubasisaka lusambu ya Maria bonso Mama ya Nzambi
[Kifwanisu ya kele na lutiti 8]