Ni runi cré binni 5: Jñaa Dios nga María

Ximodo biasastí ni. «Dxi maʼ guca stale de ca binni ni runi adorar bidóʼ xpinni Cristu la? [...] dxiqué nga bizulú biʼniʼ adorárcabe ti gunaa casi jñaa Dios. [Ca binni ni beeda gaca xpinni Cristu que], maca mil de iza nga de runi adorarcaʼ “gran diosa madre” (diosa nandxóʼ jñaa guiráʼ ni nabani) ne “virgen divina” (diosa ni naca binnidxaapaʼ).» (The New Encyclopædia Britannica, 1988.)

Xi rusiidiʼ Biblia. «Chi aca xiiñi luʼ [...] ti badu huiiniʼ. Cuee lá lu laabe Jesús. Zaca be nandxóʼ ne zabi cabe laabe Xiiñi Dios ni nuu ibáʼ [...]. Nga runi zaree chu badu huiini ca para Dios, ne zabi cabe laa Xiiñi Dios.» (Lucas 1:31-35.)

Textu ca cusiidiʼ laanu qué ñaca diʼ María jñaa Dios, sínuque jñaa «Xiiñiʼ Dios». Biblia cuzeeteʼ qué rudii guibáʼ ca para chuʼ Dios, neca naroʼbaʼ ni; yanna, ximodo ndiʼ ganda chuʼbe ndaaniʼ María yaʼ (1 Reyes 8:27). Ne María qué ñuu dxi niníʼ naca jñaa Dios. Yanna, xiñee riníʼ stale binni nácabe jñaa Dios yaʼ. Purtiʼ runi crécabe naca Dios ti Trinidad. Lu Concilio ni guca Éfeso lu iza 431 que nga guníʼcabe gaca adorar María, casi «Jñaa Dios», o Theotokos (lu diidxaʼ griegu riniʼni «ni gupa Dios»). Éfeso, guidxi ra guca concilio que la? maca xadxí nga de runi adorar ca binni que Ártemis, ti diosa ni nácabe racané binni gapa xiiñiʼ.

Stale de ca cosa ni runi binni yanna para guni adorar María la? maca runi binni zacá dede dxiqué para guni adorarcaʼ Ártemis, ti bidóʼ ni nácabe «biaba de ibáʼ» (Hechos 19:35). Stobi de ca cosa ni biʼniʼ ca xpinni Cristu que chaahuiʼ chaahuiʼ nga, bizulú biquiiñecaʼ bidóʼ.

Biindaʼ ca versículo riʼ: Mateo 13:53-56; Marcos 3:31-35; Lucas 11:27, 28.

NI DXANDÍʼ:

María nga guca jñaa Xiiñiʼ Dios. De Trinidad nga zeeda ni runi cré binni ora riníʼ María nga Jñaa Dios.