Lalo 6: Jiwheyẹwhe Nọ Kẹalọyi Yizan Boṣiọ lẹ Tọn to Sinsẹ̀n-bibasi Mẹ

Fie wẹ lalo lọ wá sọn? “Klistiani dowhenu tọn lẹ ma nọ yí boṣiọ lẹ zan to sinsẹ̀n-bibasi yetọn mẹ ... Yizan boṣiọ lẹ tọn to ṣọṣi mẹ to owhe kanweko 4tọ po 5tọ po mẹ yin whẹsuna to dodonu linlẹn lọ tọn ji dọ boṣiọ lẹ nọ hẹn ẹn bọawuna agblinọ lẹ nado plọnnu gando sinsẹ̀n Klistiani tọn go hugan yẹwhehodidọ po owe lẹ po.”— Cyclopedia of Biblical, Theological, and Ecclesiastical Literature, gbọn McClintock po Strong po dali, Bladopọ 4, weda 503 po 504 po.

Etẹwẹ Biblu plọn mí? “Hiẹ ma na basi boṣiọ lẹ na dewe, kavi nudepope he tindo awusọhia nuhe tin to olọn mẹ to aga, to aigba ji to odò fi kavi to otọ̀ mẹ to aigba glọ de tọn gba. Hiẹ ma na dẹ́ dewe do odò hlan yẹwhe enẹlẹ podọ hiẹ ma na sẹ̀n yé gba.” (Eksọdusi 20:4, 5, TOB) Apọsteli Johanu wlanwe hlan Klistiani owhe kanweko tintan tọn lẹ dọmọ: “Yọpọ lẹ emi, mì họ́ mìde sọta boṣiọ lẹ.”—1 Johanu 5:21, NW.

Be nuyizan de poun wẹ boṣiọ lẹ yin nado dọnsẹpọ mẹhe yé nọtena lọ bo gbògbéna ẹn, dile ṣọṣi lẹ dọ do ya? Otanwe lọ The Encyclopedia of Religion dọmọ: “To tintan whenu, boṣiọ lẹ sọgan ko nọ yin yiyizan na mẹpinplọn po aṣọ́didonanu po; e whè gbau whẹwhinwhẹ́n he yin nina nado suwhẹna yizan yetọn niyẹn. Ṣigba kunnudenu dohia dọ, e ma dẹn bọ yé jẹ yinyin yiyizan to sinsẹ̀n-bibasi mẹ ji. Na taun tọn, ehe gando yẹdide he wá lẹzun adà tangan sinsẹ̀n-bibasi tọn to ṣọṣi Orthodoxe Whèzẹtẹn-waji tọn mẹ lẹ go.” Ṣigba, yẹwhegán Isaia kanse po whẹjijọ po dọmọ: “Mẹnu go wẹ mì na jlẹ Jiwheyẹwhe do? Kavi apajlẹ tẹwẹ mì nado jlẹ́te hẹ ẹ?”—Isaia 40:18.

Sọ pọ́n wefọ ehelẹ: Isaia 44:13-19; Owalọ lẹ 10:25, 26; 17:29, NW; 2 Kọlintinu lẹ 5:7, NW

NUGBO LỌ DIE:

Jiwheyẹwhe ma nọ kẹalọyi yizan boṣiọ lẹ tọn

GBẸ́ LALO LẸ DAI BO TẸDO NUGBO GO

Tadona tẹ kọ̀n wẹ mí sọgan wá todin he mí ko gbadopọnna lalo delẹ to kleun mẹ, ehe ṣọṣi susu gbẹ́ pò to pinplọnmẹ? “Otàn lalo he yè yí ayikinkan gigẹdẹ do doai” ehelẹ ma sọgan nọte to nukọn na nugbo Biblu tọn he bọawu bo nọ miọnhomẹnamẹ lẹ.—2 Pita 1:16, NW.

Enẹwutu, hùn ahun towe donuvo bo ma whleawu nado yí nuhe Ohó Jiwheyẹwhe tọn—yèdọ asisa nugbo tọn—dọ jlẹdo nuhe yè ko plọn we lẹ go gbede blo. (Johanu 17:17) Eyin a wàmọ, opagbe ehe na mọ hẹndi do gowe dọmọ: “Mìwlẹ nasọ yọ́n nugbo lọ, nugbo lọ nasọ hẹn mì jẹ mẹdekannu.”—Johanu 8:32, NW.

[Asisa Yẹdide tọn to weda 15]

Pictorial Archive (Near Eastern History) Est.