Orọwọ Nọ U Notọ Ze 6: Ọghẹnẹ Ọ Jẹ Iwoho Gbe Emema Nọ A Rẹ Rọ Gọ Rehọ

Ẹvẹ uwuhrẹ nana u ro muhọ? “Ileleikristi ọsosuọ a rehọ emema ru iruẹru egagọ rai hi . . . Ileleikristi ikpe-udhusoi avọ ene gbe erọ ikpe-udhusoi avọ isoi a jẹ uruemu yena rehọ, be ta inọ emema nọ a rẹ rọ gọ o rẹ sai fi obọ họ kẹ igbori riẹ iwuhrẹ Ileleikristi viọ usiuwoma nọ a rẹ gaviezọ kẹ hayo ebe nọ a re se.”—Cyclopedia of Biblical, Theological, and Ecclesiastical Literature, onọ McClintock avọ Strong a kere, Uko avọ 4, ẹwẹ-obe avọ 503 gbe 504.

Eme Ebaibol e ta? “Whọ kare ẹdhọ ọvuọvo kẹ oma ra ha, hayo ithatho oware nọ o rọ obọ ehru, hayo oware nọ o rọ obọ otọ akpọ, hayo oware nọ o rọ obọ otọ ame eva otọ akpọ; who ruwẹ kẹ ae he, whọ gọ ae gbe he.” (Ọnyano 20:4, 5) Jọn ukọ na o kere se Ileleikristi ikpe-udhusoi ọsosuọ nọ: “Emaha esese mẹ, wha si oma rai no edhọ-egọ.”—1 Jọn 5:21.

Wọhọ epanọ ichọche e be ta na, kọ ginọ uzẹme inọ emema yọ edhere jọ gheghe nọ a re ro si kẹle jẹ gọ oware nọ a ta nọ emema na i dikihẹ kẹ? Obe na, The Encyclopedia of Religion, o ta nọ: “Evaọ ọsosuọ, ẹsejọhọ emema na e jọ eware nọ a je ro wuhrẹ ahwo hayo whẹ erru họ eria egagọ; oye o jọ oware nọ a jobọ kru evaọ eroruiruo rai. Rekọ u ri kri hi, i te ti zihẹ ruọ eware nọ a be rọ adhẹẹ egagọ kẹ. Onana o mae rrọ uzẹme kpahe iwoho nọ i zihe ruọ ekwakwa egagọ evaọ Ichọche ofẹ Ovatha-Ọre.” Rekọ Aizaya ọruẹaro na ọ nọ onọ jọ nọ u fo, inọ: “Ono who re kele Ọghẹnẹ dhe, hayo didi oware who re ro dhesẹ iẹe?”—Aizaya 40:18.

Rri eria Ebaibol nana: Aizaya 44:13-19; Iruẹru Ikọ Na 10:25, 26; 17:29; 2 Ahwo Kọrint 5:7

UZẸME ẸME NA:

Ọghẹnẹ ọ jẹ iwoho gbe emema nọ a rẹ rọ gọ rehọ họ

SIỌ IWUHRẸ ERUE, DADAMU UZẸME NA

Rono ọkiẹriwo ọkpẹkpẹe nana ze, eme ma rẹ sae ta kpahe iwuhrẹ nọ i n’otọ ze nọ ichọche buobu i gbe bi ro wuhrẹ ahwo na? A rẹ sae rọ ‘iku anwae enana nọ a nabe ma kiete’ na rọ wawọ uzẹme uvevẹ nọ o rẹ kẹ omosasọ nọ o rrọ Ebaibol na ha.—2 Pita 1:16.

Fikiere, ehoo o ru owhẹ hẹ, rehọ Ẹme Ọghẹnẹ—onọ o rrọ ehri uzẹme na—rọ wawọ eware nọ a wuhrẹ owhẹ no. (Jọn 17:17) Who te ru ere, whọ te ruẹ orugba ẹme nana: ‘Whọ rẹ te riẹ uzẹme na, uzẹme na u re ti ru owhẹ họ ọmuyẹ.’—Jọn 8:32.

[Ọnọ o wo uwoho nọ o rrọ ẹwẹ-obe avọ 15]

Pictorial Archive (Near Eastern History) Est.