A 6 soabã: B tõe n tũnuga ne bõn-naands la imaaz rãmb n pʋʋs Wẽnnaam

Sɩnga wãn tɩ b wa tẽed woto? Ad sebr a ye sẽn yete: “Pipi kiris-nebã ra pa tũnugd ne bõn-naands n pʋʋsd Wẽnnaam ye . . . Yaa yʋʋmd 300 la 400 soabã sʋk la egiliizã taoor dãmb sɩng woto maanego. B tagsame tɩ imaaz rãmbã na n sõnga sẽn pa mi-b karengã tɩ b bãng Kirist tũudmã sõma n yɩɩd goamã la sɛbã.—Cyclopedia of Biblical, Theological, and Ecclesiastical Literature, de McClintock et Strong, Volim a 4, seb-neng 503 la 504.

Bõe la Biiblã yeta? “Da mams bũmb baa a ye wẽneg n waoog-a ye: a ra yɩ yĩngri, saag zug bũmb ye, a ra yɩ tẽng zug ka bũmb ye, a ra yɩ koomẽ, mogrã pʋgẽ bũmb ye. Ra wõgemd bũmb sẽn dõog bɩ sẽn pees taoor ye, da waoog-a ye.” (Yikri 20:4, 5, Sebr Sõngo) Tʋm-tʋmd a Zã ra yeela pipi kiris-nebã woto: “Mam kom-bõonego, gũus-y y mens n da pʋʋs bõn-naands ye.”—1 Zã 5:21.

Egiliizã taoor dãmb yetame tɩ yaa teed sẽn sõngd-b tɩ b waoogd neb nins bõn-naandsã sẽn makdã bala. La rẽ yĩnga b bee bʋʋm bɩ? Ad sebr a ye (The Encyclopedia of Religion) sẽn yete: “Tõe tɩ sɩngrẽ wã, b ra tara bõn-naandsã n zãmsd nin-buiidã la b nagsd roto. Sɩd me, egiliizã rãmb da yeta woto. La sẽn pa yã n kaoose, b wa n sɩnga bõn-naandsã pʋʋsgo. Sẽn yɩɩd fãa bõn-naandsã pʋʋsg wa n paama pãng egiliiz ortodogsã pʋgẽ.” La no-rɛɛs a Ezai yaool n da soka woto: “Ãnda la y na n ges n yeele: Woto la Wẽnd wẽnego! Bõe la y na n dɩk n mams ne Wẽnde?”—Ezai 40:18, Sebr Sõngo.

Ges-y Biiblã vɛrse kãensã me: Ezai 44:13-19; Tʋʋma 10:25, 26; 17:29; 2 Korẽnt dãmba 5:7

SƖDÃ LA WOTO:

Wẽnnaam pa sakd tɩ b tũnug ne bõn-naandg buud baa a ye n pʋʋs-a ye

BAS-Y ZIRI WÃ LA Y TŨ SƖDÃ

Egiliiz rãmbã pʋsẽ, b ket n zãmsda nebã zɩlem-beed nins fãa yell d sẽn gomã. La d yãa vẽeneg tɩ yaa “soalem sẽn yaa belgre.” B yaa lebend fasɩ ne Wẽnnaam Gomdã sẽn yetã. Bala Biiblã sẽn yet bũmb ningã võor wʋmb yaa nana, la kengd raoodo.—2 Pɩɛɛr 1:16.

Y sẽn bãng woto wã, bɩ y modg n mak bũmb nins yãmb tũudmã karen-saam dãmb sẽn zãms-yã ne Biiblã sẽn yetã n gese. Bala yaa Biiblã sẽn yetã bal la sɩda. (Zã 17:17) Y sã n maan woto, y na n bãngame tɩ Biiblã gom-kãngã sɩd yaa sɩda. A yeta woto: “Yãmb na bãng sɩda, la sɩda na kõ yãmb lohorem.”—Zã 8:32.

[Fotã sẽn yitẽ, seb-neng a 9]

Pictorial Archive (Near Eastern History) Est.