Talitonuga 6: E Talia e le Atua Faatusa ma Tupua i Tapuaʻiga

O fea e tupuaga mai ai lea aʻoaʻoga?

“Sa leʻi faaaogāina faatusa i le tapuaʻiga a uluaʻi Kerisiano . . . Na talia faatusa i le lotu i le senituri lona 4 ma lona 5 ona e faapea e faigofie ai iā i latou e leʻi lelei ni aʻoaʻoga, ona iloa mea moni o le faa-Kerisiano mai na mea i lo o lauga po o tusi.”— Cyclopedia of Biblical, Theological, and Ecclesiastical Literature, tusia e McClintock ma Strong, Tusi 4, itulau 503 ma le 504.

O le ā le tala a le Tusi Paia?

“Aua e te fai mo oe se tupua ua tā, po o se faatusa lava o se mea o i le lagi i luga, po o i le fanua i lalo, po o i le sami o i lalo o le fanua. Aua e te ifo i ai, aua foʻi e te tapuaʻi i ai.” (Esoto 20:4, 5, The Holy Bible—New International Version) Na tusi le aposetolo o Ioane i Kerisiano i le uluaʻi senituri: “Le fanau e, ia leoleo outou mai i tupua.”—1 Ioane 5:21.

Pe e moni manatu o lotu, o faatusa, ua na o se auala e faalatalata atu ai ma faamamaluina ai ē o avea faatusa ma sui? Ua taʻua i le Encyclopedia of Religion: “I le amataga, o le manatu na faaofi mai ina ua faaaogā faatusa, ua na o ni mea e aogā e aʻoaʻo ai ma teuteu ai. Ae e leʻi pine ae avea ma mea e tapuaʻi i ai. O le tulaga lenā sa iai le avea o faatusa ma vala autū i le lotu Eastern Orthodoxy.” Peitaʻi, na fesili le perofeta o Isaia: “Tou te faatusa le Atua iā te ai? se ā foʻi se faatusa tou te faatusaina ai o ia?”—Isaia 40:18.

Faatusatusa mau nei: Isaia 44:13-19; Galuega 10:25, 26; 17:29; 2 Korinito 5:7

LE AʻOAʻOGA MONI:

E lē talia e le Atua faatusa ma tupua i tapuaʻiga

[Pusa i le itulau 9]

TEENA AʻOAʻOGA SESĒ, TAOFI MAU LE UPU MONI

O le ā ua tatou iloa i nei iloiloga pupuu o talitonuga taatele o le tele o lotu? E sili mamao upu moni faigofie e faamāfanafanaina ai o le Tusi Paia, i lo nei “tala o le vavau [Eleni, my ʹthos] ua fatua ma le poto.”—2 Peteru 1:16, O le Tusi Paia Samoa (Lomiga 1884).

O lea la, ia fetālaʻi ma aua le faatalatū e iloilo mea ua e aʻoaʻoina mai le Afioga a le Atua, le puna o le upu moni. (Ioane 17:17) Ona taunuu ai lea o le mau iā te oe: ‘E te iloa le upu moni, e tuusaʻoloto foʻi oe e le upu moni.’—Ioane 8:32.

[Ē Ana le Ata i le itulau 9]

Pictorial Archive (Near Eastern History) Est.