Ityesen I Aiegh 6: Aôndo Lumun Ér I̱ Civir Un A Ieev Man Akav Agen

Ityesen i aiegh ne hii nena? Takerada u i yer ér Cyclopedia of Bibilical, Theological, and Ecclesiastical Literature, by McClintock and Strong, tihi u sha 4, peeji 503 man 504 la kaa ér: “Mbakristu mba tsuaa mbara yange ve yaren tom a ieev ken mcivir ve ga . . . Yange i hii u yaren tom a ieev ken côôci ken derianyom u sha unyiin man u sha utaan la sha ci u í hen ér ieev mbin mbia hemba wasen ior mba ve fa kwaghaôndo ga la u henen mimi u kwaghaôndo u Mbakristu la a u pasen ve a pase adua sha zwa shin ken ityakerada tseegh tsô la.”

Bibilo kaa ér nyi? “De gbe eev ga, shin kwagh u a bee ma kwagh u a lu sha kwavaôndo shin u a lu shin inya, shin u a lu shin mngerem ma shin mkur u inyaagh kpaa ga. De gur ve inya ga, shi de civir ve kpaa ga.” (Ekesodu 20:4, 5) Apostoli Yohane yange nger Mbakristu mba sha derianyom u hiihii la ér: “Mbayev av, kemen nen ayol sha akombo [shin ieev, NW].”—1 Yohane 5:21.

Ieev ka di gbenda u zan a or hen kwagh u mbi til sha ityough nagh la shi nan un icivir er mbaaduav ve sengen nahanaa? Takerada u i yer ér Encyclopedia of Religion la kaa ér: “Sha hiihii la, alaghga i eren ieev sha u tesen ior kwagh a mbi tsô; man ka ityôkyaa i mba yange ve luun a ieev naan kpaa je la. Nahan kpa, ica gba ga tsô, i gema civir mbi. Se fatyô u nengen a mimi u kwagh ne, hemban cii je yô sha gbenda u i yaren tom a ieev kpishi ken adua u Orthodox u sha ityoughkitaregh la.” Nahan kpa, profeti Yesaia pine sha inja vough nahan ér: “Tsô né kar Aôndo sha ana? Man ka hanma eev mbu kom u karen sha a Naa?”—Yesaia 40:18, Mgem u Bibilo i i yer ér The New Jerusalem Bible la.

Ôr avur a Bibilo ne kpa nenge: Yesaia 44:13-19; Aerenakaa 10:25, 26; 17:19; 2  Mbakorinte 5:7

KA MIMI JE NE:

Aôndo soo ér i civir un a ieev man akav agen ga

VENDA ITYESEN I AIEGH, VAR A ITYESEN I MIMI

Se fatyô u kuren ikyaa ser nyi sha kwagh u atesen a aiegh a i lu tesen ken ucôôci kpishi, a se tim sha mi laa? “Ukwaghahir mba i dugh a dugh sha kwaghfan” mban kuma sha atesen a taver ga a Bibilo, a mimi, a nan ior msurshima la cuku kpaa ga.—2 Peteru 1:16.

Sha nahan yô, de kera we a wa ahô u karen kwagh u i tese u la sha Mkaanem ma Aôndo, ma ma lu imbor i mimi la ga. (Yohane 17:17) U er nahan yô, ityendezwa ne ia kure sha a we: “Man né fa mimi, mimi kpaa una pase ne una tuhwa.”—Yohane 8:32.

[Ape i zough a foto ne yô u sha peeji 15 la]

Pictorial Archive (Near Eastern History) Est.