Svakibal jecheʼ loʼil: Stakʼ jtunestik lokʼoletik sventa chkichʼtik ta mukʼ Dios

¿Kʼuxi ilik tal li jecheʼ loʼile? «Li baʼyel yajtsʼaklomtak Cristoe muʼyuk la stunesik lokʼoletik sventa chichʼik ta mukʼ li Diose [...]. Li relijion Katolikae la spakbe skʼoplal li stunesel lokʼoletik ta siglo 4 xchiʼuk 5, laj yal ti jaʼ mas kʼun chaʼiik xchanel chanubtaseletik yuʼun Cristo li krixchanoetik ti muʼyuk xchanojik lek vun mi tstunesik lokʼoletike, ti jaʼ muʼyuk mi naka noʼox mantaletik o livroetik chichʼ tunesele.» (Cyclopedia of Biblical, Theological, and Ecclesiastical Literature, yuʼun McClintock y Strong.)

¿Kʼusi chal li Vivliae? «Mu xavaʼan jtosuc locʼobbail, mi jaʼuc slocʼobbailtac ti cʼusitic oy ta acʼol ti ta vinajele, mi jaʼuc slocʼobbailtac ti cʼusitic oy ta banomil ti oy ta peqʼuele, mi jaʼuc ti cʼusitic oy ta nab ti tsʼanal ta banomile. Mu xanijan xachiman aba ta stojolic. Mi jaʼuc xamuyubta ta yichʼel ta mucʼ.» (Éxodo 20:4, 5, Ch.) Xchiʼuk li ta siglo 1 xi laj yalbe yajtsʼaklomtak Cristo li jtakbol Juane: «Jnichʼnabtac, qʼuelo me abaic ta sventa li slocʼobal cʼusitic cuybilic ta Diose» (1 Juan 5:21).

Epal relijionetike chalik ti muʼyuk la kuybilik ta dios li lokʼoletik xchiʼuk santoetike, ti jaʼ noʼox la chtun sventa ta jtsaktik ta venta xchiʼuk chi jnopajutik ta stojolal li Diose. Pe, ¿mi jech van taje? Jech kʼuchaʼal chal jun ensiklopediae, «xuʼ van, ti ta slikebe, jaʼ noʼox tun sventa chchanubtasvanik xchiʼuk sventa xnichimtasobil [kʼusitik]; veno, jaʼ toʼox jech tspak-o skʼoplalik sventa tstunesik. Pe, mu ta sjaliluk laj yichʼ ilel ti jaʼ xa chichʼik ta mukʼ li lokʼoletike. Taje mas to kʼot ta pasel jech li ta lokʼoletik chichʼ tunesel ta relijion Katolika Ortodoxa Orientale, ti bu jaʼ xa mas tsots skʼoplal ikʼot yuʼunik li ta srelijionike» (The Encyclopedia of Religion). Pe ¿mi oy van sbalil li lokʼoletike? Muʼyuk, yuʼun xi onoʼox laj yal li j-alkʼop Isaiase: «¿Bochʼo xuʼ chacoʼoltsanic jech chac cʼu chaʼal li Diose? ¿Cʼusi slocʼobal ti xuʼ chalocʼtaic ta Diose?» (Isaías 40:18).

Kʼelo li versikuloetik liʼe: Isaías 44:13-19; Hechos 10:25, 26; 17:29; 2 Corintios 5:7.

LI KʼUSI MELELE:

Li Diose muʼyuk lek chil ti chichʼ tunesel lokʼoletik sventa chkichʼtik ta mukʼe.

¿MI JAʼ VAN CHA TʼUJ LI JECHEʼ LOʼILETIKE, O MI JAʼ LI KʼUSI MELELE?

Li kʼusitik laj xa kani chanbetik skʼoplale oy kʼusi chakʼ kʼotuk ta nopel kuʼuntik: li «[jecheʼ] loʼil[etik] ti nopbile» ti jaʼ chakʼik ta chanel epal relijionetike mu xuʼ stsal li kʼusi lek jamal chakʼ ta aʼyel li Vivliae, ti chakʼbutik jun oʼontonale (2 Pedro 1:16, Ch).

Jaʼ yuʼun chaʼa, chkalbotkutik ti akʼo xa nopbe smelolal li kʼusi xchanubtasojoxuke xchiʼuk ti xa kʼel mi koʼol xchiʼuk li kʼusi chal ta melel li sKʼop Diose (Juan 17:17). Jaʼ jech chavil chkʼot ta pasel li kʼusi xi chal Vivliae: «Chavotquinic o li cʼusi melele. Ta sventa li cʼusi melele chaloqʼuic o ta mozoil» (Juan 8:32).

[Stojel ta vokol ta pajina 9]

Pictorial Archive (Near Eastern History) Est.