Ni runi cré binni 6: Jneza nga iquiiñeʼ binni bidóʼ para guni adorar Dios

Ximodo biasastí ni. «Ca primé xpinni Cristu qué niquiiñecaʼ bidóʼ ora biʼniʼ adorarcaʼ Dios [...]. Lu siglu IV ne V que nga bisiidiʼ ca xaíque yuʼduʼ que gastiʼ naca iquiiñeʼ binni bidóʼ. Xiñee yaʼ. Purtiʼ guníʼ íquecabe zaqué nga jma nagueenda zaziidiʼ ca binni ni huaxiéʼ riene que de Cristu, que gucaadiágacaʼ laacabe o gúʼndacaʼ libru.» (Cyclopedia of Biblical, Theological, and Ecclesiastical Literature, stiʼ McClintock ne Strong.)

Xi rusiidiʼ Biblia. «Cadi naquiiñeʼ gúniluʼ ti bidóʼ, nin stobi casi laani ni nuu guibáʼ luguiáʼ o ni nuu ndaaniʼ guidxilayú o ni nuu ndaaniʼ nisa xagueteʼ yu. Cadi naquiiñeʼ guzuxíbiluʼ xañee cani ne cadi guicá íqueluʼ guʼnuʼ dxiiñaʼ para laacani.» (Éxodo 20:4, 5.) Ne sicaríʼ gudxi apóstol Pablu ca xpinni Cristu ni bibani lu siglu I que: «Hermanu ni nadxiee caʼ, lausaana bidóʼ ne cadi guni cre tu laacaʼ» (1 Corintios 10:14).

Stale de ca xaíque stiʼ ca religión ca riniʼcaʼ qué runi adorárdicaʼ bidóʼ, sínuque riquiiñecabe cani para guidxíñacabe Dios ne gusisácabe ca binni ni ziné lá ca bidóʼ ca. Peru, ñee dxandí zacá ni la? Ti enciclopedia na sicaríʼ: «Zándaca primé que biquiiñecabe ca bidóʼ ca para gusiidicabe binni o para guihuinni galán ra yuʼduʼ stícabe; ngue nga razón gúpacabe para biquiiñecabe ni. Peru, qué nindaa maʼ bizulú biʼniʼ adorárcabe cani. Iglesia Ortodoxa Oriental nga ni jma biʼniʼ zacá, purtiʼ guníʼcabe naquiiñeʼ gapa binni bidóʼ para guni adorar Dios» (The encyclopedia of Religion). Yanna, ñee dxandíʼ caquiiñepeʼ gapa binni bidóʼ la? Coʼ, purtiʼ profeta Isaías guníʼ sicaríʼ: «Tu ndiʼ zanda guchaagaʼ Dios ne xi bidóʼ nga zanda guneʼ ni gaca casi laabe yaʼ» (Isaías 40:18, Nacár-Colunga, 1972).

Biindaʼ ca versículo riʼ: Isaías 44:13-19; Hechos 10:25, 26; 17:29; 2 Corintios 5:7.

NI DXANDÍʼ:

Qué riuulaʼdxiʼ diʼ Dios iquiiñenu bidóʼ para guni adorarnu laa.

ÑEE ZUNI CRELUʼ NI RINÍʼ BINNI LA? O NI NA BIBLIA

De cani maʼ bidúʼyanu ca rizíʼdinu ti cosa nabé risaca: ni rusiidiʼ stale de ca religión ca yanna biree cani de ndaaniʼ ique si binni, ne qué zanda diʼ guchaaganu cani ne cani rusiidiʼ Biblia, purtiʼ cani rusiidiʼ Stiidxaʼ Dios riguixhedxícani ladxidoʼno (2 Pedro 1:16).

Nga runi, galán gúniluʼ pa guiníʼ íqueluʼ ni maʼ bisiidicabe lii ne guchaagaluʼ cani ne cani rusiidiʼ Stiidxaʼ Dios (Juan 17:17). Zacá zuuyaluʼ dxandí ni na ca diidxaʼ riʼ: «Zanna tu ni dxandíʼ, ne zaladi tu ra cá tu yaga purti ma nanna tu ni» (Juan 8:32).

[Paraa gucuaacabe dibuju o foto ni zeeda lu yaza 9]

Pictorial Archive (Near Eastern History) Est.