Ifyo Tusambilila Kuli Yesu

Pa Lupwa

Bushe tufwile ukumona shani icupo pa kuti ulupwa lwesu lube ne nsansa?

Icupo ca mushilo. Ilyo Yesu bamwipwishe nga ca kutila calisuminishiwa ukulekana, ayaswike ukuti: “Bushe tamwabelenga ukuti uwababumbile pa kutendeka ababumbile umwaume no mwanakashi, kabili atile, ‘E mulandu wine umwaume akashiila wishi na nyina no kulambatila ku mukashi wakwe, kabili aba babili bakaba umubili umo’? E ico tabali babili na kabili iyo, lelo bali umubili umo. Kanshi, ico Lesa alundenye, umuntu ecilekanya. . . . Onse uwaleka umukashi wakwe, apashili umulandu wa bulalelale, aupa na umbi, ninshi acita ubucende.” (Mateo 19:4-6, 9) Abaupana nga balekonka ukufunda kwa kwa Yesu kabili bali ne cishinka ku bena mwabo, bonse mu lupwa balacingililwa kabili balaba ne nsansa.

Mulandu nshi ukutemwa Lesa kulengela ulupwa ukuba ne nsansa?

Yesu atile: “‘Uletemwa Yehova Lesa obe no mutima obe onse, no mweo obe onse, no kutontonkanya kobe konse.’ Ili e funde ilikalamba kabili e lya ntanshi.” Lifunde nshi ilya cibili ilyakonka pali ili? Yesu atile: “Uletemwa umunobe [ukubikako na bo mwikala nabo, e kutila ulupwa lwenu] nge fyo waitemwa we mwine.” (Mateo 22:37-39) Kanshi icingalenga ulupwa ukuba ne nsansa kuba na bucibusa busuma na Lesa pantu ukutemwa Lesa kulalenga ukuti tuletemwana.

 Finshi abalume na bakashi bengacita pa kulenga abena mwabo ukuba ne nsansa?

Abaume abaupa balalenga abakashi babo ukuba ne nsansa nga balepashanya Yesu. Alitemenwe sana icilonganino, icaba kwati e mukashi wakwe. (Abena Efese 5:25) Yesu atile: “Umwana wa muntu taishile ukuti balemubombela, lelo aishile mu kubombela abantu.” (Mateo 20:28) Yesu taletitikisha abasambi bakwe nangu ukubacusha, lelo alebasansamusha. (Mateo 11:28) Kanshi, abalume bafwile ukuba ne cikuuku ilyo baletungulula ulupwa lwabo pa kuti bonse mu lupwa balesekelamo.

Abanakashi abaupwa nabo kuti basambililako kuli Yesu. Baibolo itila: “Umutwe wa kwa Kristu ni Lesa.” Ilanda no kuti, “umutwe wa mwanakashi mwaume.” (1 Abena Korinti 11:3) Yesu taleimona ukuti nga anakila Lesa ninshi tacindama. Ali na katiina kuli Wishi. Atile: “Lyonse ncita ifya kumusekesha.” (Yohane 8:29) Umwanakashi uunakila umulume wakwe pa mulandu wa kuba na katiina kuli Lesa na pa mulandu wa kumutemwa, alalenga mu lupwa mwaba insansa.

Finshi abafyashi bengasambilila kuli Yesu pa fyo alemona abana?

Yesu alekwatako inshita ya kuba na bana kabili alibikile amano ku fyo baletontonkanya ne fyo baleumfwa. Baibolo itila: “Yesu aitile abana abanono ukuya apo ali, ati: ‘Lekeni abana abanono bese kuli ine.’” (Luka 18:15, 16) Bushiku bumo, abantu balikalipile abana abalandile pa fyo bacetekele Yesu. Lelo Yesu alitashishe balya bana, aebele abalebakalipila ukuti: “Bushe tamwabelenga ifyo calembwa ati, ‘Mwalenga utunwa twa bana abanono na bonka ukumulumbanya’?”—Mateo 21:15, 16.

Finshi abana bengasambilila kuli Yesu?

Yesu alilangile abana ukuti nabo balingile ukubika amano ku fya kwa Lesa. Ilyo ali ne myaka 12, bamusangile “mwi tempele, naikala na bakasambilisha alekutika kuli bena no kubepusha.” Cinshi cafuminemo? “Bonse abalekutika kuli ena balipapile amano yakwe ne myasukile yakwe.” (Luka 2:42, 46, 47) Nalyo line, amano Yesu akwete tayamulengele ukulaitutumuna. Lelo yamulengele ukuba no mucinshi ku bafyashi bakwe. Baibolo itila: “Alebanakila.”—Luka 2:51.

Nga mulefwaya ukwishibilapo na fimbi, belengeni icipandwa 14 mu citabo citila Bushe Cinshi Baibolo Isambilisha? *

[Futunoti]