Cava O Vulica Vei Jisu

Me Baleta na Bula Vakavuvale

Na rai cava me baleta na vakawati ena marau kina na vuvale?

Na vakawati e ka tabu. Ni tarogi se tara na veisere, a kaya o Jisu: “Oni sega beka ni wilika ni o koya e bulia na tamata mai na ivakatekivu e bulia na tagane kei na yalewa qai kaya, ‘Ena biuti tamana kina kei tinana o tagane me kabiti watina me rau sa dua ga na yago’? Erau na sega ni lewe rua tiko, erau sa na dua ga na yago. O koya gona, na ka sa vauca vata na Kalou me kua ni tawasea na tamata. . . . Na tagane e sereka na watina qai vakawati tale e sa wili me veibutakoci ke sega ni veidauci o watina.” (Maciu 19:​4-6, 9) Ni rau muria na veiwatini na ivakasala i Jisu rau qai yalodina vei kedrau isa, era na nuidei, ra mamarau tale ga na lewenivuvale.

Na cava era na marau kina na vuvale ke ra lomana na Kalou?

A tukuna o Jisu: “‘Mo lomani Jiova na nomu Kalou ena lomamu taucoko, ena nomu bula taucoko, kei na nomu vakasama taucoko.’ Qo na ivunau levu duadua, na kena imatai tale ga.” Na cava na kena ikarua? E tomana o Jisu: “Mo lomana na kainomu [oka kina o ira era voleka sara vei iko​— nomu vuvale] me vaka nomu lomani iko.” (Maciu 22:​37-​39) Na noda veiwekani vinaka kei na Kalou e ki ni vuvale mamarau. Noda lomani koya ena uqeti keda tale ga meda dau veilomani.

Ena vakamarautaki kena isa vakacava o tagane se yalewa vakawati?

Ena vakamarautaki watina o tagane ke muria na ivakaraitaki i Jisu. A solibula sara ga  ena nona lomana na watina vakaivakatakarakara, na ivavakoso. (Efeso 5:​25) E kaya o Jisu: “Sa sega ni lako mai na Luve ni tamata me qaravi, ka me dauveiqaravi ga.” (Maciu 20:​28, Ai Vola Tabu) A sega ni vakacolasau se voravora o Jisu vei ira e qarava, a vakacegui ira ga. (Maciu 11:28) Me lewa gona vakayalololoma o tagane vei ira kece na lewenivuvale.

Ena yaga tale ga na ivakaraitaki i Jisu vei ira na yalewa vakawati. “E ului Karisito na Kalou,” e kaya na iVolatabu. E kaya tale ga ni “ulu ni yalewa na tagane.” (1 Korinica 11:3) A sega ni raica o Jisu me ka beci nona vakamalumalumu vua na Kalou, ni dokai Tamana vakalevu. E kaya, “Au dau cakava na ka e vinakata.” (Joni 8:​29) Nona vakamalumalumu o yalewa vakawati ena veiliutaki i watina e ivakaraitaki ni nona lomani watina, e doka na Kalou, ena marau tale ga kina na vuvale.

Cava oni vulica vei Jisu na itubutubu ena nona rai me baleti ira na gone?

A vakayagataka na gauna o Jisu vei ira na gone. A kauaitaka na ivakarau ni nodra vakasama kei na ivakarau ni lomadra. E kaya na iVolatabu: “E tukuna ga o Jisu mera kau yani vua na gone dramidrami qai kaya: ‘Laivi ira na gone lalai mera lako mai vei au.’” (Luke 18:​15, 16) Ena dua na gauna era a vakalewai eso na gonetagane era tukuna nira vakabauti Jisu. Ia a vakacaucautaki ira na gone qori o Jisu, mani kaya vei ira na veivakalewai: “Vakaevei oni sega tale ga ni wilika qo, ‘Oni uqeti ira na gone lalai kei na gone era se sucu tiko mera veivakacaucautaki’?”​—Maciu 21:​15, 16.

Na cava oni vulica vei Jisu na gone?

E ivakaraitaki vinaka o Jisu vei kemuni na gone moni dau kauaitaka na veika vakayalo. Ni se yabaki 12, a kunei “ena valenisoro ni dabe tiko ena kedra maliwa na ivakavuvuli. E vakarogoci ira e vakatarogi ira tale ga.” Na cava qai yaco? “Era druka tu ga na rogoci koya ena levu ni ka e kila kei na nona sauma na nodra vakatataro.” (Luke 2:​42, 46, 47) Ia a sega ni dokadokai koya ena levu ni ka e kila. A dokai rau tiko ga na nona itubutubu. Na iVolatabu e kaya: “E . . . talairawarawa tiko ga vei rau.”​—Luke 2:​51.

Ena so tale na ivakamacala, raica na wase 14 ni ivola Na Cava Sara Mada e Kaya na iVolatabu? *

[iVakamacala e ra]