Nɔ Ni Wɔkaseɔ Kɛjɛɔ Yesu Ŋɔɔ

Yɛ Weku Shihilɛ He

Mɛɛ susumɔ kɛ́ ahiɛ yɛ gbalashihilɛ he lɛ ehaa miishɛɛ hiɔ wekui amli?

Gbalashihilɛ yɛ krɔŋkrɔŋ, ejaakɛ Nyɔŋmɔ ni to shishi. Beni abi Yesu kɛji eja gbɛ akɛ atse gbala mli lɛ, ekɛɛ akɛ: “Ani nyɛkaneko akɛ, mɔ ni bɔ gbɔmɔ yɛ shishijee lɛŋ lɛ, ‘nuu kɛ yoo ebɔ amɛ’? Ni ekɛɛ: ‘Enɛ hewɔ ni nuu aaashĩ etsɛ kɛ enyɛ ni eeekpɛtɛ eŋa he, ni amɛyi enyɔ lɛ fɛɛ amɛaatsɔ heloo kome lɛ.’ Belɛ agbɛnɛ amɛjeee mɛi enyɔ dɔŋŋ, shi moŋ heloo kome; no hewɔ lɛ, nɔ ni Nyɔŋmɔ eŋɔtsa lɛ, akaha gbɔmɔ miigbala mli. . . . Mɔ fɛɛ mɔ ni jeee ajwamaŋbɔɔ hewɔ jɛ ni eeeshwie eŋa ni eyawɛ yoo kroko lɛ, efite gbala.” (Mateo 19:4-6, 9) Kɛ́ gbalashihilɛ mli hefatalɔi kɛ Yesu ŋaawoo lɛ tsu nii ni amɛye amɛhe anɔkwa lɛ, ehaa mɛi fɛɛ ni yɔɔ weku lɛ mli lɛ nuɔ he akɛ amɛyɛ shweshweeshwe, ni amɛnáa miishɛɛ.

Mɛni hewɔ suɔmɔ kɛha Nyɔŋmɔ haa miishɛɛ hiɔ wekui amli lɛ?

Yesu kɛɛ akɛ: “‘Suɔmɔ Nuŋtsɔ [Yehowa], o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ.’ Kitai lɛ amli otu kɛ ewulu nɛ.” Te kitai lɛ ateŋ nɔ ni he hiaa waa yɛ enɛ sɛɛ? Yesu kɛɛ akɛ: “Suɔmɔ onaanyo [ni mɛi ni bɛŋkɛ bo kpaakpa, ni ji oweku kɔkrɔɔ lɛ mlibii fata he lɛ] tamɔ bɔ ni osumɔɔ bo diɛŋtsɛ ohe.” (Mateo 22:37-39) No hewɔ lɛ, nɔ ni haa miishɛɛ hiɔ weku mli ji wekukpãa kpakpa ni baakã mɔ kɛ Nyɔŋmɔ teŋ, ejaakɛ suɔmɔ kɛha Nyɔŋmɔ tsirɛɔ wɔ koni wɔsumɔ wɔhe.

 Te wu aaafee tɛŋŋ eha eŋa aná miishɛɛ, ni te ŋa lɛ hu aaafee tɛŋŋ eha ewu aná miishɛɛ?

Kɛ́ wumɛi nyiɛ Yesu nɔkwɛmɔnɔ lɛ sɛɛ lɛ, amɛhaa amɛŋamɛi náa miishɛɛ. Yesu kɛ ehe shã afɔle eha efonirifeemɔŋ ŋa, ni ji asafo lɛ yɛ suɔmɔ ni eyɔɔ kɛha lɛ lɛ hewɔ. (Efesobii 5:25) Yesu kɛɛ akɛ: “Gbɔmɔ bi lɛ baaa ni asɔmɔ lɛ, shi eba sɔɔmɔ moŋ.” (Mateo 20:28) Yesu kɛ yitsoŋwalɛ yeee mɛi ni akɛ amɛ ewo ekwɛmɔ shishi lɛ anɔ, shi moŋ emli jɔ yɛ amɛnɔ. (Mateo 11:28) No hewɔ lɛ, kɛ́ wumɛi tsu amɛyitsoyeli lɛ he nii yɛ mlijɔlɛ gbɛ nɔ lɛ, weku lɛ mlibii lɛ fɛɛ baaná he sɛɛ.

Ŋamɛi hu baanyɛ aná Yesu nɔkwɛmɔnɔ lɛ he sɛɛ. Biblia lɛ kɛɔ akɛ: “Kristo yitso ji Nyɔŋmɔ.” Agbɛnɛ hu ekɛɔ akɛ, “yoo fɛɛ yoo hu yitso ji nuu.” (1 Korintobii 11:3) Yesu nuuu he akɛ eji mɔ ni esaaa akɛ ebaa ehe shi ehaa Nyɔŋmɔ. Eyɛ bulɛ ni mli kwɔ kɛha e-Tsɛ lɛ. Yesu kɛɛ akɛ: “Nɔ ni sa ehiɛ mifeɔ daa.” (Yohane 8:29) Yoo ni baa ehe shi ehaa ewu yitsoyeli lɛ yɛ suɔmɔ kɛ bulɛ ni eyɔɔ kɛha Nyɔŋmɔ hewɔ lɛ bɔɔ mɔdɛŋ koni eha miishɛɛ ahi eweku shihilɛ lɛ mli.

Mɛni fɔlɔi baanyɛ akase yɛ bɔ ni Yesu buɔ gbekɛbii ehaa lɛ mli?

Yesu ná be eha gbekɛbii, ni enya amɛsusumɔi ahe ni efee nibii ni baaha amɛná miishɛɛ. Biblia lɛ kɛɔ akɛ: “[Yesu tsɛ] amɛ kɛba eŋɔɔ ni ekɛɛ: Nyɛhaa gbekɛbii lɛ abaa miŋɔɔ.” (Luka 18:15, 16) Be ko lɛ, mɛi wie nyanyaanya amɛshi gbekɛbii komɛi ni jaje hemɔkɛyeli ni amɛyɔɔ yɛ Yesu mli lɛ. Shi Yesu jie gbekɛbii lɛ ayi ni ekɛɛ mɛi ni wie amɛshi gbekɛbii lɛ akɛ: “Ani nyɛkaneko dã akɛ: ‘Abifabii kɛ fufɔbii anaa ni osaa yijiemɔ oto yɛ?’”—Mateo 21:15, 16.

Mɛni gbekɛbii baanyɛ akase kɛjɛ Yesu ŋɔɔ?

Yesu fee bɔ ni esa akɛ gbekɛbii anya Nyɔŋmɔjamɔ he lɛ he nɔkwɛmɔnɔ. Beni eye afii 12 lɛ, ayana lɛ “yɛ sɔlemɔwe lɛ, ni eta shi yɛ tsɔɔlɔi lɛ ateŋ eebo amɛ toi ni eebibii amɛ nii.” Mɛni jɛ mli kɛba? “Mɛi fɛɛ ni boɔ lɛ toi lɛ naa kpɛ amɛhe yɛ enilee kɛ ehetooi ni ehaa lɛ ahewɔ.” (Luka 2:42, 46, 47) Kɛlɛ, nilee ni Yesu yɔɔ lɛ haaa ewo ehe nɔ. Yɛ no najiaŋ lɛ, no ha ejie bulɛ kpo etsɔɔ efɔlɔi. Biblia lɛ kɛɔ akɛ: “[Etee nɔ] eba ehe shi eha amɛ.”—Luka 2:51.—w09-E 11/1.

Kɛ́ ootao enɛ he saji babaoo lɛ, kwɛmɔ Mɛni Biblia lɛ Tsɔɔ Diɛŋtsɛ? * wolo lɛ yitso 14 lɛ mli.

[Shishigbɛ niŋmaa]