Nuhe Jesu Plọn Mí

Gando Gbẹzan Whẹndo Tọn Go

Nukun tẹwẹ mí dona yí do pọ́n alọwle nado tindo ayajẹ to whẹndo mẹ?

Alọwle yin kanṣiṣa tẹgbẹ tọn de. Whenue gbẹtọ lẹ kanse Jesu eyin e sọgbe nado basi gbẹdai, e dọmọ: “Be mìwlẹ ma ko hia dọ ewọ he dá yé sọn whẹwhẹwhenu basi yé asu po asi po bosọ dọ, ‘Na whẹwhinwhẹ́n ehe wutu, sunnu na jo otọ́ etọn po onọ̀ etọn po do bo na sẹbọdo asi etọn go, bọ yé omẹ awe lẹ na lẹzun agbasalan dopo’ ya? Sọmọ bọ yé masọ yin agbasalan awe ba, adavo dopo. Enẹwutu, nuhe Jiwheyẹwhe ko kọndopọ mì dike mẹde klan ẹn blo. ... Mẹdepope he gbẹ́ asi etọn dai, bọ e ma yin na whẹwhinwhẹ́n galilọ tọn wutu, bo wlealọ hẹ devo, e deayọ.” (Matiu 19:4-6, 9, NW) Eyin asu po asi po de hodo ayinamẹ Jesu tọn bo yin nugbonọ na ode awetọ, hagbẹ whẹndo lọ tọn lẹpo nọ voawu bo nọ tindo ayajẹ.

Naegbọn wanyina Jiwheyẹwhe do nọ hẹn ayajẹ wá whẹndo mẹ?

Jesu dọmọ: “‘Hiẹ dona yí ahun towe lẹpo, alindọn towe lẹpo, podọ ayiha towe lẹpo do yiwanna Jehovah Jiwheyẹwhe towe.’ Ehe wẹ gbedide lọ he klohugan bosọ yin tintan.” Awetọ lo? Jesu dọmọ: “Hiẹ dona yiwanna kọmẹnu towe [kakajẹ mẹhe sẹpọ we hugan lẹ ji—yèdọ whẹndo towe] di dewe.” (Matiu 22:37-39, NW) Enẹwutu, aṣli ayajẹ whẹndo tọn wẹ nado tindo haṣinṣan dagbe hẹ Jiwheyẹwhe, na wanyina ewọ wẹ nọ whàn mí nado yiwanna ode awetọ.

 Nawẹ asu po asi po lẹ sọgan hẹn ayajẹ wá na ode awetọ gbọn?

Eyin asu lẹ hodo apajlẹ Jesu tọn, yé na hẹn asi yetọn lẹ jaya. Jesu yiwanna asi yẹhiadonu tọn etọn, yèdọ agun lọ, sọmọ bọ e ze ede do sanvọ́ do ota etọn mẹ. (Efesunu lẹ 5:25) Jesu dọmọ: “Visunnu gbẹtọ tọn wá, e ma yin nado yin lizọnyina gba, ṣigba nado yilizọn namẹ.” (Matiu 20:28, NW) Jesu ma nọ paṣẹ glanglan kavi fiẹ do mẹhe tin to anademẹ etọn glọ lẹ go gbede, kakatimọ e nọ fakọna yé kavi miọnhomẹna yé. (Matiu 11:28) Enẹwutu, asu lẹ dona nọ yí tatọ́-yinyin yetọn zan po homẹdagbe po ehe na hẹn ale wá na hagbẹ whẹndo lọ tọn lẹpo.

Asi lẹ lọsu sọgan mọaleyi sọn apajlẹ Jesu tọn mẹ. Biblu dọ dọ “Jiwheyẹwhe wẹ ota Klisti tọn.” E sọ dọ dọ “sunnu wẹ ota yọnnu tọn.” (1 Kọlintinu lẹ 11:3, NW) Jesu ma nọ mọdọ taliliaina Jiwheyẹwhe de e pò gba. E nọ na sisi sisosiso Otọ́ etọn. E dọmọ: “Yẹn nọ wà nuhe nọ hẹn homẹhun in lẹ to whepoponu.” (Johanu 8:29, NW) Asi he nọ litaina tatọ́-yinyin asu etọn tọn na owanyi po sisi he e tindo na Jiwheyẹwhe po wutu, nọ wà nususu nado hẹn whẹndo etọn tindo ayajẹ.

Etẹwẹ mẹjitọ lẹ sọgan plọn sọn lehe Jesu yinuwa hẹ yọpọvu lẹ do mẹ?

Jesu yí whenu zan po yọpọvu lẹ po bo nọ tindo ojlo to linlẹn po numọtolanmẹ yetọn lẹ po mẹ. Biblu dọmọ: “Jesu ylọ yọpọ lẹ wá ede dè, bo dọmọ: ‘Mì gbọ yọpọvu lẹ ni wá dè e.’” (Luku 18:15, 16, NW) To nujijọ de whenu, gbẹtọ lẹ mọhodọdo yọpọ sunnu he do yise yetọn hia to Jesu mẹ lẹ go. Ṣigba Jesu pà yọpọ lọ lẹ bo dọna mẹhe to homọdọdo yé go lẹ dọmọ: “Be mì ma ko hia ehe gbede dọ, ‘Onù yọpọvu lẹ po ovi to anọ́nù lẹ po tọn mẹ wẹ hiẹ ko hẹn pipà wá sọn’?”—Matiu 21:15, 16, NW.

Etẹwẹ ovi lẹ sọgan plọn sọn Jesu dè?

Jesu ze apajlẹ dagbe dai na ovi lẹ na nuhe dù ojlo tintindo to gbigbọnu lẹ mẹ. Whenue e tindo owhe 12, mẹjitọ etọn lẹ mọ ẹn “to tẹmpli mẹ, bọ e to aisinsin to mẹplọntọ lẹ ṣẹnṣẹn bo to todoaina yé bosọ to ohó kanse yé.” Etẹwẹ yin kọdetọn lọ? “Nukunnumọjẹnumẹ etọn po gblọndo etọn lẹ po nọ jiawu na mẹhe to todoaina ẹn lẹ.” (Luku 2:42, 46, 47, NW) Ṣogan, oyọnẹn he Jesu tindo ma hẹn ẹn yigo gba. Kakatimọ, e hẹn ẹn nado setonuna mẹjitọ etọn lẹ. Biblu dọ dọ, E “to mẹmẹglọ yin hlan yé zọnmii.”—Luku 2:51, NW.

Na nudọnamẹ dogọ, pọ́n weta 14tọ owe lọ Etẹwẹ Biblu Plọn Mí Taun? a tọn.

[Nudọnamẹ odò tọn]