Ang Matun-an Naton kay Jesus

Parte sa Pamilya

Ano ang himuon sang mga mag-asawa para mangin malipayon ang ila pamilya?

Ang pag-asawahay sagrado. Sang ginpamangkot si Jesus kon puede bala magdiborsio, sia nagsiling: “Wala bala ninyo mabasahi nga sia nga nagtuga sa ila sa ginsuguran naghimo sa ila nga lalaki kag babayi kag nagsiling, ‘Bangod sini bayaan sang lalaki ang iya amay kag ang iya iloy kag magahiusa sa iya asawa, kag ang duha mangin isa ka unod’? Amo nga indi na sila duha, kundi isa ka unod. Gani, ang gintingob sang Dios indi pagbulagon sang tawo. . . . Ang bisan sin-o nga magdiborsio sa iya asawa, luwas lamang kon nakighilawas ang iya asawa, kag magpangasawa sang iban nagapanghilahi.” (Mateo 19:4-6, 9) Mangin malipayon ang pamilya kon sundon sang mag-asawa ang laygay ni Jesus kag mangin mainunungon sa isa kag isa.

Ngaa malipayon ang pamilya kon ginahigugma nila ang Dios?

Si Jesus nagsiling: “‘Higugmaon mo si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.’ Amo ini ang labing daku kag nahauna nga sugo.” Ano ang ikaduha? Si Jesus nagsiling: “Higugmaon mo ang imo isigkatawo [lakip na ang pinakasuod gid sa imo—ang imo pamilya] subong sang imo kaugalingon.” (Mateo 22:37-39) Kon ginahigugma naton ang Dios, higugmaon man naton ang isa kag isa, kag amo ini ang sekreto para mangin malipayon ang aton pamilya.

 Paano mapahalipay sang bana kag asawa ang isa kag isa?

Mapahalipay sang mga bana ang ila asawa kon sundon nila ang halimbawa ni Jesus. Ginahigugma ni Jesus ang iya simbuliko nga asawa, ang kongregasyon, amo nga nagsakripisyo sia para sa iya. (Efeso 5:25) Sia nagsiling: “Ang Anak sang tawo nagkari, indi agod alagdon.” (Mateo 20:28) Si Jesus indi dominante ukon mapintas sa iya mga sumulunod kundi makapaumpaw sia sa ila. (Mateo 11:28) Gani, dapat man gamiton sang mga bana ang ila awtoridad sa mainayuhon nga paagi para mangin malipayon ang iya pamilya.

Makatuon man ang mga asawa sa halimbawa ni Jesus. “Ang Dios amo ang ulo ni Cristo,” siling sang Biblia. Nagsiling man ini nga “ang lalaki amo ang ulo sang babayi.” (1 Corinto 11:3, Ang Pulong sang Dios) Wala ginkabig ni Jesus nga pagpakanubo sa iya ang pagpasakop sa Dios. Ginatahod gid niya ang iya Amay. Nagsiling sia, “pirme ko ginahimo ang mga butang nga kalahamut-an sa iya.” (Juan 8:29) Mangin malipayon ang pamilya kon ang asawa nagapasakop sa pagkaulo sang iya bana bangod sa iya gugma kag pagtahod sa Dios.

Ano ang matun-an sang mga ginikanan sa pagpakig-angot ni Jesus sa mga kabataan?

May tion gid si Jesus para sa mga kabataan kag interesado sia sa ila mga ginahunahuna kag ginabatyag. Ang Biblia nagsiling: “Ginpangabay ni Jesus nga dalhon sa iya ang mga lapsag, nga nagasiling: ‘Pabay-i ang mga bata nga magpalapit sa akon, kag indi sila pagpunggi.’” (Lucas 18:15, 16) Isa ka bes, sang gindayaw sang mga kabataan si Jesus, gin-akigan sila sang mga tawo. Pero ginpasalamatan ni Jesus ining mga kabataan, kag ginsilingan yadtong mga tawo: “Wala gid bala ninyo mabasahi ini, ‘Gikan sa baba sang mga bata kag mga nagasuso nagbaton ka sang pagdayaw’?”—Mateo 21:15, 16.

Ano ang matun-an sang mga kabataan kay Jesus?

Nagpakita si Jesus sing maayo nga halimbawa sa mga kabataan. Sang 12 anyos sia, nakita sia “sa templo, nga nagalingkod sa tunga sang mga manunudlo kag nagapamati sa ila kag nagapamangkot sa ila.” Ano ang resulta? “Ang tanan nga nagapamati sa iya nahayanghag gid sa iya paghangop kag sa iya mga sabat.” (Lucas 2:42, 46, 47) Bisan madamo si Jesus sing nahibaluan, wala sia nagpabugal. Ang iya ihibalo nagbulig pa gani sa iya nga tahuron ang iya mga ginikanan. Ang Biblia nagsiling: “Padayon sia nga nagpasakop sa ila.”—Lucas 2:51.

Para sa dugang nga impormasyon tan-awa ang kapitulo 14 sang libro nga Ano Gid ang Ginatudlo sang Biblia? *

[Nota]