Mambu ya Beto Kelonguka na Yezu

Na Yina Metala Luzingu ya Dibuta

Inki mutindu ya kutadila makwela kesalaka nde mabuta kuvanda na kyese?

Makwela kele ngidika mosi ya santu. Ntangu bantu kuyulaka Yezu kana bo lenda fwa makwela, yandi tubaka nde: “Keti beno me tangaka ve mambu yai na mukanda ya Nzambi? ‘Na luyantiku, ntangu Nzambi salaka bantu, yandi salaka bo bakala ti nkento. Ebuna Nzambi tubaka nde: Yo yina, bakala ta bikisa tata na yandi ti mama na yandi, yandi ta kwenda kuvukana na nkento na yandi. Ebuna bo zole ta kuma muntu mosi.’ Mpidina bo kele diaka bantu zole ve kansi kaka muntu mosi mpamba. Yo yina, muntu lenda kabula ve yina ya Nzambi me vukisaka. . . . Konso muntu yina ta bikisa nkento na yandi kana nkento yina me sala pite ve, ebuna muntu yina kukwela nkento ya nkaka, muntu yango me sala pite.” (Matayo 19:4-6, 9) Ntangu bankwelani kelanda bandongisila ya Yezu mpi konso nkwelani kele ya kwikama na nkwelani na yandi, bantu yonso na dibuta takudiwa na lutaninu mpi na kyese.

Sambu na nki kuzola Nzambi kenataka kyese na dibuta?

Yezu kutubaka nde: “‘Nge fweti zola Mfumu Nzambi na nge, na ntima na nge yonso, na luzolo na nge yonso ti na mabanza na nge yonso.’ Yina kele nsiku me luta mfunu, yo kele mpi nsiku ya ntete.” Inki kele nsiku ya zole ya meluta mfunu? Yezu kutubaka nde: “Nge fweti zola mpangi na nge [tanga mpi bantu yina kezingaka penepene na nge​—dibuta na nge] bonso nge mosi.” (Matayo 22:37-39) Yo yina, nsapi ya kyese ya dibuta kele kuvanda na bangwisana ya mbote ti Nzambi, sambu kuzola yandi kepusaka beto na kuzolana beto na beto.

Inki babakala mpi bankento lenda sala sambu na kupesana kyese?

Babakala kesepedisaka bankento na bo ntangu bo kelandaka mbandu ya Yezu. Yandi kuditambikaka na zola na yandi sambu na dibundu yina kele nkento na yandi ya kifwani. (Efezo 5:25) Yezu kutubaka nde: “Mwana-muntu . . . kwisaka ve sambu bantu kusadila yandi, kansi yandi kwisaka sambu na kusadila bantu.” (Matayo 20:28) Yezu kuvandaka ve makambu ngolo to kunyokula bantu yina vandaka na nsi ya lutwadisu na yandi, kansi yandi vandaka kupesa bo kupema. (Matayo 11:28) Yo yina, babakala fwete sadila kiyeka na bo na mutindu mosi ya mbote yina tanatila bantu yonso ya dibuta mambote.

Bankento mpi lenda baka mambote na mbandu ya Yezu. Biblia ketuba nde: “Nzambi kele mfumu ya Kristo.” Yo ketuba dyaka nde “bakala kele mfumu ya nkento.” (1 Korinto 11:3) Yezu vandaka kumona ve nde kulemfukila Nzambi vandaka kukulumusa yandi. Yandi vandaka ti luzitu ya mudindu sambu na Tata na yandi. Yezu kutubaka nde: “Ntangu yonso mono ke salaka mambu yina ke pesaka yandi kiese.” (Yoane 8:29) Nkento yina zola mpi luzitu na yandi sambu na Nzambi kepusaka yandi na kulemfuka na kiyeka ya bakala na yandi kesadisaka mpenza sambu luzingu ya dibuta na yandi kuvanda ya kyese.

Inki bibuti lenda longuka na mutindu Yezu vandaka kutadila bana?

Yezu vandaka kulutisa ntangu ti bana mpi yandi vandaka kutula dikebi na bangindu mpi mawi na bo. Biblia ketuba nde: “Yesu songaka bantu yina na kunata bana na bo penepene na yandi, ebuna yandi tubilaka balonguki na yandi nde: ‘Beno bikisa bana bo kwisa awa na mono.’” (Luka 18:15, 16) Kilumbu mosi, bantu kuvwezaka mwa kibuka ya bana yina vandaka kumonisa lukwikilu na bo na Yezu. Kansi Yezu kusikisaka bana yango, mpi yandi zabisaka bantu yina vandaka kuvweza bo nde: “Keti beno me tangaka ntete ve mambu yai na mukanda ya Nzambi nde: ‘Nge me longaka bana yina ke nwaka mabele ya bamama na bo, ti bana ya nkaka, sambu bo kupesa nge lukumu’?”​—Matayo 21:15, 16.

Inki bana lenda longuka na Yezu?

Yezu kupesaka bana mbandu ya mbote ya kutula dikebi na mambu ya kimpeve. Ntangu yandi vandaka na bamvula 12, bo monaka yandi “na Nzo-Nzambi, yandi me vanda na kati ya balongi ya Bayuda. Yandi vandaka kuwa bo, yandi vandaka kupesa bo bangiufula.” Inki kusalamaka? “Bantu yina yonso vandaka kuwa yandi, bo vandaka kuyituka sambu na mayele na yandi ti sambu na bamvutu yina ya yandi vandaka kupesa.” (Luka 2:42, 46, 47) Ata mpidina, nzayilu ya Yezu kukumisaka yandi ve lulendo. Kansi, yo sadisaka yandi na kuzitisa bibuti na yandi. Biblia ketuba nde: “Yandi vandaka kulemfuka na bo.”​—Luka 2:51.

Sambu na kuzaba mambu mingi, tala kapu ya 14 ya mukanda Inki Biblia Kelongaka Mpenza? a

[Noti na nsi ya lutiti]