Samting Iumi Lanem From Jesus

Abaotem Famili Laef

Wanem tingting nao iumi mas garem abaotem marit for mekem famili hapi?

Marit hem arrangement wea God nao startim. Taem olketa askem Jesus sapos hem stret for divorce, hem sei: “Hao, iufala no readim finis? Start kam long taem wea God wakem olketa man, hem wakem man and woman and hem sei, ‘Dastawe man bae lusim dadi and mami bilong hem, hem bae stap olowe witim waef bilong hem, and datfala man and woman bae kamap wanfala body nomoa.’ Diswan minim tufala hia no tufala body, bat wanfala nomoa. So no eni man mas aotem samting wea God joinim finis. . . . Bat eniwan wea lusim waef bilong hem and maritim narawan bae spoelem waef bilong hem bikos datwan hem adultery.” (Matthew 19:​4-6, 9) Taem hasband and waef followim kaonsel bilong Jesus and faithful long tufala, evriwan insaed famili bae stap gud and hapi.

Why nao wei for lovem God mekem famili hapi?

Jesus sei: “‘Iu mas lovem God bilong iu Jehovah long full heart bilong iu. And iu mas iusim full soul, and evri savve bilong iu for lovem hem tu.’ Disfala law nao first wan, and no eni nara law important winim hem.” Wanem nao nara law wea barava important? Jesus sei: “Iu mas lovem narawan [diswan minim tu famili bilong iu] long sem wei wea iu lovem iuseleva.” (Matthew 22:​37-​39) So main samting for mekem famili hapi, hem for fren gud witim God, bikos taem iumi lovem God datwan nao bae muvim iumi for lovem iumi evriwan.

 Hao nao hasband and waef savve mekem tufala hapi?

Hasband savve mekem waef hapi taem hem followim example bilong Jesus. Jesus no tingim hemseleva bat hem lovem kongregeson, wea hem nao datfala tokpiksa waef bilong hem. (Ephesians 5:​25) Jesus sei: “Son bilong man tu bat no kam for olketa narawan mas waka for helpem hem. Hem kam for hem savve waka for helpem olketa.” (Matthew 20:28) Jesus nating bossim olketa wea hem lukaftarem bat hem kaen long olketa. (Matthew 11:28). Dastawe, hasband shud lukaftarem famili long kaenfala wei bikos datwan bae mekem evriwan insaed famili kasem gud samting.

Waef savve kasem gud samting tu from example bilong Jesus. Bible hem sei: “God hem hed bilong Christ.” Hem sei tu: “Man hem hed bilong woman.” (1 Corinthians 11:⁠3) Jesus hem nating ting daonem wei for stap anda long God. Hem barava respectim Dadi bilong hem. Jesus sei: “Mi evritaem duim samting wea hem laekem.” (John 8:​29) Waef wea stap anda long hedship bilong hasband bikos hem lovem and respectim God, hem helpem famili bilong hem for hapi.

Wanem nao parents savve lanem from samting wea Jesus duim for olketa pikinini?

Jesus hem laek for stap witim olketa pikinini and interest long samting wea olketa tingim and feeling bilong olketa. Bible sei: “Jesus kolem kam olketa smol pikinini hia and hem sei: ‘Letem olketa smol pikinini for kam long mi.’” (Luke 18:​15, 16) Wanfala taem pipol tok spoelem samfala boy wea talemaot faith wea olketa garem long Jesus. Bat Jesus praisem olketa young wan and sei long pipol hia: “Hao, no enitaem iufala readim disfala toktok wea sei, ‘Iu mekem olketa smol pikinini and baby for praisem iu’?”​—⁠Matthew 21:​15, 16.

Wanem nao olketa pikinini savve lanem from Jesus?

Jesus interest long olketa spiritual samting wea datwan hem nambawan example for olketa pikinini. Taem Jesus 12 year, olketa faendem hem “long temple. Hem sidaon witim olketa bigman long there and hem lisin long wanem olketa talem and hem gohed for askem kwestin long olketa.” Wanem nao kamaot from datwan? “Evriwan wea herem toktok bilong hem barava sapraes long hao hem ansarem olketa kwestin and long bigfala savve wea hem garem.” (Luke 2:​42, 46, 47) Nomata olsem, savve wea Jesus garem no mekem hem praod. Bat datfala savve mekem hem respectim parents bilong hem. Bible sei: “Hem gohed for obeyim tufala.”​—⁠Luke 2:​51.

For savve moa, lukim chapter 14 long buk Wanem Nao Really Samting wea Bible Teachim? *

[Footnote]