Jesuspa yachachiykunasnin

¿Imaynatá familia kusisqa kawsakunman?

¿Imaynatá qhariwarmi kawsayta qhawananchik tiyan?

Qhariwarmi kawsaytaqa, Dios qallarichirqa. Juk kuti fariseos, divorciakuymanta Jesusta tapuptinku, pay jinata kutichirqa: “Manachu Diosmanta Qhelqasqapi leerqankichej, pichus kay pachata ruwajqa qallariypi qharita warmitawan ruwasqanta? Chayrayku qhareqa tatanta, mamanta saqespa, warminwan khuskachakaponqa. Iskayninkutaj ujllaña kanqanku. Ajinapeqa manaña iskaychu kanku, manachayqa ujllaña. Chayrayku, Diospa ujchasqanta ama runaqa tʼaqachunchu, [...] sichus pipis warminmanta tʼaqakun mana pay wajwan wasanchaspa khuchichakojtillan, waj warmiwantaj casarakun chayqa, khuchichakuspa qhenchachakun”, nispa (Mateo 19:4-6, 9). Qhariwarmi kaqkuna Jesuspa yachachisqanmanjina kawsakuspaqa, kusisqas kawsakunqanku.

Familiajina kusisqa kawsakunapaq Diosta munakuy may allin

Jesús nirqa: “Señor Diosniykitaqa munakunki tukuy sonqoykiwan, tukuy almaykiwan, tukuy yuyayniykiwantaj. Chaymin leypa kamachisqasninmanta aswan kuraj, ñawpaj kajtaj. Qhepan kaj kamachisqapis ñawpaj kajman rijchʼakullantaj: Runa masiykita munakunki qan kikiykita jina” (Mateo 22:37-39). Arí, familianchikwan kusisqa kawsakunanchikpaqqa, Jehovata munakunanchik tiyan, imaraykuchus payta munakusunchik chayqa, familianchikta munakullasuntaq familianchikmanta sapa jukninku runa masillanchiktaq kasqankurayku.

¿Imaynatá qhariwarmi kaqkuna kawsakunanku tiyan?

Qusasqa, Jesusmanta yachakunkuman. Jesusqa, cristiana qutuchakuyta munakurqa,  qutuchakuyraykutaq kawsayninta qurqa. Bibliaqa, cristiana qutuchakuy Jesuspa warminjina kasqanta nin (Efesios 5:25). Jesús nirqa: ‘Mana sirvichikuqchu jamuni. Astawanqa runasta sirviq jamuni’, nispa (Mateo 20:28). Payqa, atiyniyuq kaspapis manchay kʼacha karqa, chayrayku paywan kaqkunaqa kusikuq kanku (Mateo 11:28). Qusaspis Jesusjinallataq kananku tiyan.

Warmispis Jesusmanta yachakullankumantaq. Bibliaqa, Cristopaq Dios kamachiq umajina kasqanta, qharitaq, warminpaq kamachiq umanjina kasqanta nin (1 Corintios 11:3). Jesusqa, Tatanta jatunpaq qhawasqanrayku kusiywan kamachiq umantajina qhawarqa. Chayrayku nirqa: “Paypa munaynillanta ruwani”, nispa (Juan 8:29). Jehovata jatunpaq qhawaq, munakuq ima warmipis, qusanta may kusiywan kamachiq umantajina qhawan.

¿Imatá tatas Jesusmanta yachakunkuman?

Jesusqa, wawaswan khuska kananpaq, imatachus yuyasqankuta uyarinanpaq ima tiempochakurqa. Juk kuti discipulosnin payman qayllaykunankupaq wawasta jarkʼachkaptinku, Jesús nirqa: “Ama jarkʼaychejchu wawasta noqaman jamojta”, nispa (Lucas 18:15, 16). Wak pʼunchaytaq wawas, Jesusta jatunchaptinku payqa ruwasqankuta allinpaq qhawarqa, sacerdotestaq chayta rikuspa mayta phiñakurqanku, chayrayku Jesús paykunaman nirqa: “Manachu jaykʼajpis Diosmanta Qhelqasqapi leerqankichej: Juchʼuy wawasta, ñuñojkunatawan sumajta yupaychanankuta yuyaycharqanki, nispa nisqata?” (Mateo 21:15, 16).

¿Imatá wawas Jesusmanta yachakunkuman?

Jesusqa, Diosmanta yachakuyta may allinpaq qhawarqa. Tatasninqa, 12 watayuq kachkaptin Jesusta “tarerqanku Templopi yachachejkunawan tiyashajta, parlasqankuta uyarispa, tapurispa ima. Uyarejkunaqa, anchatataj tʼukusharqanku yachayninmanta, kutichisqasninmanta ima” (Lucas 2:42, 46, 47). Jesús may yachayniyuq kaspapis tatasninta kasukurqa, jatunpaqtaq qhawarqa, Bibliaqa, “paykunata kasuspa kak[usqanta]” nin (Lucas 2:51).

Kaymanta astawan yachayta munaspaqa, ¿Imatapunitaq Biblia yachachin? *, librota 14 yachaqananta ñawiriy.

[Sutʼinchaynin]