Ncotwiiya Kuli Jesu

Kujatikizya Mukwasyi

Ino lukwatano lweelede kubonwa buti alimwi ino ncinzi cipa kuti mikwasyi kaikkomana?

Lukwatano lulisetekene. Jesu naakabuzyigwa naa kulekana kulazumizyigwa, wakaamba kuti: “Sa tamubalide kuti oyo iwakabalenga kuzwa kumatalikilo wakabacita baalumi abanakazi? Alimwi wakaamba kuti, Nkaambo kaako mwaalumi asie wisi abanyina, akakatile mukakwe, kuti aba bobile babe nyama yomwe. Lino tabacili bobile pe, baba nyama yomwe. Nkaambo kaako, abo mbaakakakatizya Leza muntu atabapambukanyi . . . Umwi aumwi uuleka mukakwe akukwata umbi, nkutaamba nkaambo kakuvuula luzutu, waba sibwaamu. Nkabela oyo uukwata mwanakazi uwakalekwa waba sibwaamu.” (Matayo 19:4-6, 9) Ikuti banabukwetene kabalutobela lulayo lwa Jesu alimwi kabasyomana, boonse mumukwasyi bani kukkomene.

Ino nkaambo nzi kumuyanda Leza ncokukonzya kupa mikwasyi kukkomana?

Jesu wakaamba kuti: “Yanda Leza Jehova wako amoyo wako woonse, amoya wako woonse, amumiyeeyo yako yoonse. Ngooyu mulazyo mutaanzi mupati.” Ino mulawo wabili ngwa buti? Jesu wakaamba kuti: “Yanda mweenzinyoko [kubikkilizya abaabo mbomukkala limwi—bamukwasyi wenu] mbuli mboliyanda omwini.” (Matayo 22:37-39) Aboobo, icikonzya kupa mukwasyi kukkomana nkumvwana a Leza nkaambo ikucita boobo kulakonzya kutupa kubayanda bantu bamwi.

 Ino mbuti banabukwetene mbobakonzya kukkomana?

Bamaalumi balakonzya kubakkomanisya bamakaintu babo ikuti batobela cikozyanyo ca Jesu. Wakali lyaabide kumukaintu wakwe wacikozyanyo, imbungano. (Ba-Efeso 5:25) Jesu wakaamba kuti: “Mbubonya obo Mwana a-Muntu tazide kuti abelekelwe, wakeza kuti abeleke.” (Matayo 20:28) Jesu tanaakali alunya alimwi tanakali kubadyaaminina aabo mbaakali kulanganya, pele wakali kubakatalusya. (Matayo 11:28) Aboobo, bamaalumi beelede kuzibelesya kabotu nguzu zyabo kutegwa banamukwasyi boonse bagwasyigwe.

Bamakaintu abalo balakonzya kugwasyigwa acikozyanyo ca Jesu. Ibbaibbele lyaamba kuti: “Mutwe wa-Kristo ngu-Leza.” Alimwi lyaamba kuti, “mutwe wamwanakazi ngumwaalumi.” (1 Ba-Korinto 11:3) Jesu tanaakali kulibona kuti takonzyi kulibombya kuli Leza. Wakali kubalemeka kapati Bausyi. Jesu wakaamba kuti: “Ndacita lyoonse zintu izimubotela.” (Johane 8:29) Imukaintu uulibombya kumulumi wakwe akaambo kakuti ulamuyanda akumulemeka ulakonzya kupa kuti mukwasyi wakwe kaukkomana.

Ino ncinzi bazyali ncobakonzya kwiiya kuli Jesu mbwaakali kubabona bana?

Jesu wakali kujanika abana alimwi wakali kubabikkila maano. Ibbaibbele lyaamba kuti: “Amuzumizye bana kuti baboole kulindime.” (Luka 18:15, 16) Buzuba bumwi, ibantu bakafwubaazya bana ibakali kwaamba kuti balamusyoma Jesu. Pele Jesu wakabalumbaizya bana aaba, akubaambila bakali kubafwubaazya kuti: “Sa tamubalide kuti, kuzwa kumilomo yatwana atunyonka wakalondola lutembaulo?”—Matayo 21:15, 16.

Ino ncinzi bana ncobakonzya kwiiya kucikozyanyo ca Jesu?

Jesu wakabapa cikozyanyo cibotu bana cakuyanda zyintu zyakumuuya. Naakali amyaka iili 12, “bakamujana muntempele, ulikede akati kabaiyi, ulabaswiilila akubabuzya.” Ino ncinzi cakacitika? “Boonse abakamuswiilila bakayoowa kukuziba kwakwe akukuvuwa kwakwe.” (Luka 2:42, 46, 47) Nokuba boobo, Jesu tanaakalisumpula akaambo kaluzyibo ndwaakajisi. Pele, eeci cakamupa kuti kabalemeka bazyali bakwe. Ibbaibbele lyaamba kuti wakali ‘kulibombya kubazyali bakwe.’—Luka 2:51.

Ikuti kamuyanda kuzyiba zinji amubone cibalo 14 mubbuku lyakuti Ncinzi Cini Bbaibbele Ncoliyiisya? *

Bupanduluzi buyungizidwe