U kaʼansajoʼob Jesús

Bix jeʼel u yantal kiʼimak óolal ichil le familiaoʼ

¿Bix unaj u yilaʼal le tsʼoʼokol beeloʼ?

Le tsʼoʼokol beeloʼ upʼéel baʼax kiliʼich. Le ka kʼáataʼab tiʼ Jesús wa maʼalob ka u divorciartuba máakeʼ, tu yaʼalaj: «¿Maʼ wa a xokmajeʼex tiʼ le Kiliʼich Tsʼíiboʼ, le máax beet wíinikoʼob tu yáax chuuneʼ tu beetaj xiib yéetel koʼolel? Tu yaʼalaj xan: Tu yoʼolal lelaʼ juntúul xiibeʼ yaan u pʼatik u taata yéetel maamaeʼ utiaʼal u nupikuba yéetel u yatan, tu kaʼatúuliloʼob bíin jumpʼéelchajkoʼob. Beyoʼ maʼ kaʼatúuloʼobiʼ, baʼaleʼ juntúuliloʼob. Le oʼolaleʼ mix máak unaj u jatsik le baʼax nupaʼan tumen Jajal Dioseʼ». Tsʼoʼoleʼ tu yaʼalaj xan: «Le máax ku pʼatik u yatan, wa maʼ tu yoʼolal núupkʼebaneʼ, yéetel ku tsʼoʼokol u beel yéetel uláakʼ koʼoleleʼ pʼataʼan tumen u yíichameʼ, ku núupkʼebantal xan» (Mateo 19:4-6, 9). Wa le máaxoʼob tsʼokaʼan u beeloʼob ku beetkoʼob le baʼax tu yaʼalaj Jesús yéetel maʼatech u tusik u núupoʼoboʼ, tuláakal le familia ken u jóoʼs u yutsiloʼ.

¿Baʼaxten u yaabiltaʼal Dioseʼ ku taasik kiʼimak óolal ichil le familiaoʼ?

Jesuseʼ tu yaʼalaj: «Yaabilt Yuumtsil a Jajal Dios yéetel tuláakal a puksiʼikʼal, yéetel tuláakal a wóol, yéetel tuláakal a naʼat. Le jeʼelaʼ u [maas] nojochil yéetel u yáaxil ichil le aʼalmaj tʼaanoʼoboʼ. U kaʼapʼéeleʼ chíikaʼan tiʼ, ku yaʼalikeʼ: Yaabilt a láakʼ jeʼel bix ka yaabiltkabaeʼ» (Mateo 22:37-39). Jeʼex túun k-ilkoʼ utiaʼal ka yanak kiʼimak óolal ichil le familiaoʼ kʼaʼabéet u yaabiltik máak Jéeoba, tumen wa k-beetik beyaʼ yaan xan k-yaabiltik k-éet máakil. Yéetel le máaxoʼob maas kʼaʼabéet k-yaabiltkoʼ letiʼe yanoʼob ichil k-familiaoʼ.

 ¿Bix unaj u biskuba le máaxoʼob tsʼokaʼan u beeloʼoboʼ?

Jesuseʼ tu yeʼesaj bix unaj u yaabiltik u yatan le íichamtsiloʼ. Letiʼeʼ tu kʼubaj tak u kuxtal yoʼolal le múuchʼuliloʼ (Efesoiloʼob 5:25). Jesuseʼ tu yaʼalaj: «U Paal Máak[eʼ] maʼ taal utiaʼal ka meyajtaʼakiʼ, baʼaleʼ utiaʼal u meyajtik máak» (Mateo 20:28). Mix utéen píitmáan u yeʼesik u autoridad yóokʼol u disipuloʼob. Baʼaxeʼ ku yilik u yuʼubkuba maʼalob le máaxoʼob yanoʼob tu yéeteloʼ. (Mateo 11:28). Le íichamtsiloʼ bey xan unaj u beetkoʼ.

Le atantsiloʼ yaʼab baʼaloʼob jeʼel u kanik xan tiʼ Jesuseʼ. Le Bibliaoʼ ku yaʼalikeʼ «Jajal Dioseʼ u pool Cristo» yéetel le «íichamoʼ u pool u yatan» (1 Corintoiloʼob 11:3). Jesuseʼ maʼ tu yuʼubaj wa táan u mixbaʼalkúuntikuba úuchik u yantal yáanal u autoridad u Taataiʼ, tumen jach ku yeʼesik tsiikil tiʼ. Jesuseʼ tu yaʼalaj: «Teneʼ mantatsʼ kin beetik le baʼax utstutʼaanoʼ» (Juan 8:29). Le atantsil u yaabiltmaj yéetel ku yeʼesik tsiikil tiʼ Diosoʼ ku tsʼáaikuba xan yáanal u autoridad u yíicham.

¿Baʼax jeʼel u kanik le taatatsiloʼob tiʼ Jesusoʼ?

Jesuseʼ maʼ chéen tu jóoʼsaj tiempo utiaʼal u yantal yéetel le mejen paalaloʼoboʼ, baʼaxeʼ tu chʼaʼaj en cuenta baʼax ku tuklikoʼob yéetel bix u yuʼubikubaʼob. Utéenjeakileʼ u disipuloʼobeʼ maʼ tu chaʼik kaʼach u náatsʼal le mejen paalal tu yiknaloʼ, baʼaleʼ letiʼeʼ tu yaʼalajtiʼob: «Chaʼex u taal le mejen paalal tiʼ tenoʼ» (Lucas 18:15, 16). Letiʼeʼ tu yaʼalaj tiʼ le táankelem paalaloʼoboʼ jach maʼalob baʼax ku beetkoʼob. Jeʼex le ka joʼopʼ u yaʼalaʼal baʼal tiʼob ikil u yaʼalikoʼob yaan u fejoʼob tiʼ Jesuseʼ, letiʼeʼ tu yaʼalaj: «¿Maʼ wa a xokmajeʼex le Kiliʼich Tsʼíib tuʼux ku yaʼalaʼal le baʼax ku yúuchulaʼ? Ku yaʼalik beyaʼ: ¡Ta beetaj u jóokʼol kiʼikiʼ kʼayoʼob tu chiʼ le mejen paalaloʼoboʼ yéetel tu chiʼ le ku chuʼuchoʼoboʼ!» (Mateo 21:15, 16).

¿Bix jeʼel u beetik le paalaloʼob jeʼex Jesusoʼ?

Jesuseʼ mantatsʼ tu yilaj u kʼaʼananil u meyajtik Dios. Le yaan kaʼach 12 jaʼaboʼob tiʼoʼ kaxtaʼab tumen u taataʼob «kulukbal ichil u j-kaʼambesajiloʼob le aʼalmajtʼaanoʼ, táan u yuʼubik baʼax ku yaʼalikoʼob yéetel táan u kʼáatchiʼitikoʼob». Le máaxoʼob yanoʼob teʼeloʼ «jaʼakʼ u yóoloʼob, tumen jach sen yaan u naʼat, yéetel tu yoʼolal u núukil le kʼáatchiʼob beetaʼabtiʼoʼ» (Lucas 2:42, 46, 47). Baʼaleʼ kex jach yaan u naʼat kaʼacheʼ maʼ tu taasuba nojbaʼaliliʼ yéetel maʼ pʼáat maʼ u yeʼesik tsiikil tiʼ u taataʼobiʼ, tumen jeʼex u yaʼalik le Bibliaoʼ seguernaj u yuʼubik u tʼaan u taataʼob (Lucas 2:51).

Wa a kʼáat a wojéelt u maasileʼ, ilawil u catorce xookil tiʼ le libro ¿Baʼax jach tu jaajil ku kaʼansik le Bibliaoʼ?*

[U tsolajil le oochel teʼ táan juʼun 16]

* Beetaʼan tumen u j-jaajkunajoʼob Jéeoba.