Cani bisiidiʼ Jesús

Ximodo guibani binni nayecheʼ ne ca binnilidxi

Ximodo riquiiñeʼ guʼyaʼ binni xquendaxheelaʼ

Risaca nga xquendaxheelaʼ binni. Ti biaje, dxi gunabadiidxacabe Jesús pa jneza nga gaca divorciar binni la? bicábibe laacaʼ sicaríʼ: «Qué xa huayuunda tu ra cá xi biʼni Dios dxi bizulú bizáʼ binni. Bizáʼ be hombre ne gunaa, ne na be: “Pur nga runi zusaana hombre bixhoze ne jñaa, ne zadxaaga xheela ne zaca ca tobi si.” Ne zacá ma cadi chupa cabe sínuque tobi si laacabe. Pur nga runi ni ma bichaaga Dios la? ma cadi indaa binni guidxilayú». De raqué guniʼbe xcaadxi diidxaʼ riʼ: «Tutiica gaca divorciar né xheela ne ichaganá stobi, neca qué nuchee xheela la? ma enda rapa jnadxii ngue» (Mateo 19:4-6, 9). Pa chinanda cani maʼ bichaganáʼ conseju riʼ ne qué gucheenecaʼ xheelacaʼ la? zabaninecaʼ binnilídxicaʼ nayecheʼ.

Xiñee riquiiñeʼ gannaxhii binni Dios para guibaniné ca binnilidxi nayecheʼ

Jesús guníʼ: «“Gunaxhii Dios stiuʼ de idubi ladxidóʼ loʼ ne idubi xhialma luʼ ne idubi xquenda biaani luʼ”. Nga nga primé mandamientu ne ni jma risaca». De raqué guniʼbe gunáʼ nga sti mandamientu ni risaca cásica laani: «Gunaxhii stobi cásica nadxii lu lii» (Mateo 22:37-39). Nga runi, para ganda chuʼ familia stinu nayecheʼ la? naquiiñeʼ gannaxhiinu Jiobá. Xiñee yaʼ. Purtiʼ pa nadxiinu laabe la? laaca zanda gannaxhiinu sti binni. Ne binni ni jma naquiiñeʼ gannaxhiinu nga ca binnilídxinu.

Xi naquiiñeʼ guni cani maʼ bichaganáʼ para guibánicaʼ nayecheʼ

Jesús nga ejemplu ni jma galán para ca hombre ni maʼ bichaganáʼ. Laabe guleebe  tiempu ne biyúbibe modo gacanebe ca xpínnibe, ni zeeda gaca casi xheelabe (Efesios 5:25). Sicaríʼ guniʼbe ti biaje: «Benda cadi para gacané cabe naa, sínuque para gacaniá laacabe» (Mateo 20:28). Qué ñuu dxi nucaabe binni ñuni ni nabe purtiʼ si nápabe derechu guni mandarbe ne qué ñaninabe ca binni ni caquiiñeʼ gacanebe. Ni bíʼnibe nga, biyúbibe ximodo chuʼ binni nayecheʼ ora maʼ nuucaʼ ra nuube (Mateo 11:28). Hombre ni maʼ bichaganáʼ naquiiñeʼ gaca nachaʼhuiʼ ne familia stiʼ ne guni mandar laacabe casi biʼniʼ Jesús ni.

Gunaa ni maʼ bichaganáʼ laaca zanda guiziidiʼ stale de Jesús. Biblia na sicaríʼ: «Dios nga xaíque sti Cristu» ne «hombre nga xaíque sti gunaa» (1 Corintios 11:3). Qué niníʼ diʼ Jesús huaxiéʼ galán nga guzuubaʼ stiidxaʼ Bixhoze, purtiʼ nabé biʼniʼ respetarbe laa. Jesús guníʼ: «Qué riaana dxie de gune ni riulaʼdxi be» (Juan 8:29). Ti gunaa ni nadxii Dios ne runi respetar laabe la? laaca ruzuubaʼ stiidxaʼ xheelaʼ de guidubi ladxidóʼ.

Xi zanda guiziidiʼ cani napa xiiñiʼ de ejemplu stiʼ Jesús

Jesús cadi gulee si tiempu para ca baʼduhuiiniʼ, sínuque laaca bizaaláʼdxibe xi caníʼ íquecaʼ ne xi runi sentircaʼ. Ti biaje, dxi gucalaʼdxiʼ ca discípulo stibe nucueezacaʼ caadxi baʼduhuiiniʼ ni zidxíñacaʼ laabe la? gúdxibe laacaʼ: «Laudii lugar gueeda ca baʼdu ca ra nuaaʼ» (Lucas 18:15, 16). Laaca qué nidxíbidibe ora bisisácabe caadxi hombrehuiiniʼ. Ora qué ñuulaʼdxiʼ caadxi binni modo cusihuinni caadxi hombrehuiiniʼ pabiáʼ fe nápacaʼ Jesús la? gudindenebe ca binni que ne ca diidxaʼ riʼ: «Qué xa huayuunda tu lu Xquiʼchi Dios ra cá: Gudixhe lu usihuinni ca xcuidi huiini ne ca badu huiini enda nandxóʼ stiuʼ» (Mateo 21:15, 16).

Xi zanda guiziidiʼ ca baʼduhuiiniʼ ca de ejemplu stiʼ Jesús

Jesús bisaana ti ejemplu galán para ca hombrehuiiniʼ ne ca dxaapahuiiniʼ, purtiʼ nabé guyuuláʼdxibe guiziidibe de Dios. Dxi gúpabe 12 iza, «beda idxela» bixhózebe ne jñaabe «laabe ndaani yuʼdu roʼ. Zuba be galahui de cani rusiidi ley sti Dios, cucaa diaga be laacaʼ ne canaba diidxa be laacaʼ». Stiidxaʼ Dios ruzeeteʼ «nabé bidxagayaa cani cayuna diaga pabiáʼ riene be ne modo ricabi be» (Lucas 2:42, 46, 47). Neca nánnabe stale la? qué nuchabe bi yánnibe ne niniʼbe maʼ qué zuni respetarbe bixhózebe ne jñaabe, purtiʼ Biblia na «bizuuba be stiidxa caʼ» (Lucas 2:51).

[Textu ni zeeda lu yaza 16]

Pa riuuláʼdxiluʼ gánnaluʼ jma de laani la? biiyaʼ capítulo 14 stiʼ libru Xipeʼ ndiʼ cusiidiʼ Biblia*

[Ni cá ñee yaza]

* Ni biʼniʼ ca testigu stiʼ Jiobá.