Atuartartutta apeqqutaat

Jehovap Nalunaajaasui upperisarsioqatigiiuppat naaggaartut?

Jehovap Nalunaajaasui upperisarsioqatigiittut naaggaartutut imminnut isiginngillat. Sooq?

1500-kkunni Europami ilagiit katuullit Romalerisut iluarsaaqqinniarneranni naaggaartuuneq pilerpoq. Oqaaseq “naaggaartoq” rigsdagimi 1529-mi Speyerimi Martin Lutherimik tapersersuisut pillugit atorneqaqqaarpoq. Taamanimiilli taaguut tamanna iluarsaaqqinnermi ajoqersuutigineqartunik anguniakkanillu tapersersuisunut tamanut atorneqartalerpoq. Qinerlerfissiaq naapertorlugu naaggaartoq tassaavoq ilagiissoqatigiinni arlalinni paavip silarsuarmi tamanut tunngasunut oqartussaaneranut akuerinninngitsunut ilaasortaq, aamma iluarsaaqqinnermi ajoqersuutigineqartunut ukununnga ilannguttoq: Uppernikkuinnaq iluartuutinneqarneq, uppertut tamarmik palasiunerat Biibilillu kisimi sallusuissummut saqqummersinneqartumut aallaaviunera.

Jehovap Nalunaajaasuisa paavip silarsuarmi tamanut tunngasunut oqartussaanera akuersaanngikkaluarlugu, uummatikkullu iluunngarlutik Biibilimik ajoqersuutitut pingaarnerpaajutitsigaluarlutik, pingaarutillit amerlaqisut ilagiissoqatigiinnit naaggaartunit immikkoorutigaat. Qinerlerfissiaq Den Store Danske Encyklopædi naapertorlugu Jehovap Nalunaajaasui “immikkut ittunik nassuiaateqarlutillu isumaqarput”. Jehovap Nalunaajaasuisa immikkoorutaat pingasut misissoriartigit.

Siullermik, ilagiissoqatigiit naaggaartut katuuliussutsip ilaanut akuersinngikkaluarlutik, iluarsaaqqinnermi siuttuusut katuullit ajoqersuutaasa ilaat ajoqersuutigiinnarpaat, assersuutigalugu Guutimik ataasiullunilu pingasuussusermik ajoqersuut, anniarfimmik ikualasumik ajoqersuut tarnillu toqujuitsuuneranik ajoqersuut. Jehovap Nalunaajaasui isumaqavipput ajoqersuutit taakku Biibilimut naapertuutinngiinnaratik aammali Guuti pillugu eqqunngitsumik isiginnilersitsisut. — Takuuk Napasuliaq Alapernaarsuiffik 1. januaari 2010-moortoq, qupp. 4-7.

Aappassaanik, Jehovap Nalunaajaasui upperisarsiornermik aalajangersimasumik iluarsaaqqinniarneq ajorput akerlilersuiumasarnatillu, tassami ilinniartitsineq iluaqutaasoq ulapputigigamikku. Siunnersuut Biibilimeersoq una pimooruppaat: “[Naalakkamut] kiffaasoq saqitsaassisussaanngilaq. Taanna tamanut inussiarnersuussaaq, ajoqersuilluartuulluni naammaginnillunilu atukkamini ajortumi. Assortortini avoqqaarisassavai saamasumik periaaseqarluni.” (2 Timotheusi 2:24, 25) Ilumoorpoq Jehovap Nalunaajaasui Biibilimi ajoqersuutigineqartut upperisarsiornernilu amerlasuuni ajoqersuutigineqartut assigiinngissutaannik erseqqissaasarsimammata. Upperisarsioqatigiinnilli allanik iluarsaaqqinnissaq siunertarinngilaat. Jehovap Nalunaajaasuisa inuit ataasiakkaat eqqortuliorusuttut Guuti taassumalu oqaasia, Biibili, pillugit eqqorluartumik ilisimasaqalernissaannut ikiorusuppaat. (Kolossemiut 1:9, 10) Allamik upperisaqartoq taakkuninnga kimigiiserluni isumaqataanngikkaangat assortuineq peqataaffiginaveersaartarpaat angusaqarnaviannginnamik. — 2 Timotheusi 2:23.

Pingajussaanik, Jehovap Nalunaajaasui, naaggaartutut upperisarsioqatigiinnut assiginngitsunut hundredelinnut avissaartuuttutut innatik, silarsuaq tamakkerlugu qatanngutigiissuartut ataasiussuseqatigiittuarsimapput. Biibilimi ajoqersuutigineqartut pineqartillugit Jehovap Nalunaajaasuisa nunani 230-nit amerlanerusuniittut apustilip Paulusip ‘isumaqatigiinneq’ pillugu siunnersuutaa maleruartarpaat. Avissaartuutinngillat. Kisianni ‘eqqarsaatimikkut isummamikkullu ataasioqatigiipput’. (1 Korinthimiut 1:10) Iluminni ‘eqqissineq ataqatigiissutigalugu ilungersorlutik aalajangiusimaniarpaat anersaakkut ataasiussuseqarnissartik’. — Efesosimiut 4:3. (wp09 11/01-E)