Chhiartute Zawhna Siam

Jehova Thuhretute Chu Protestant An Ni Em?

Jehova Thuhretute chu Protestant-ah an inngai lo a ni. Engvângin maw?

Protestant thurin chu kum zabi 16-ah khân Europe ramah Roman Catholic Kohhran siamṭhat tumna avânga lo chhuak a ni a. “Protestant” tih thu mal hian atîrah chuan kum 1529-a Speyer khawpuia neih Inkhâwmpuia Martin Luther-a hnungzuitute sawi nâna hman a ni. Chu mi hnuah chuan, chu thu mal chu Kohhran Siamṭhatna thu bul leh thiltumte pawmtu zawng zawngte sawi nâna hman a lo ni chho ta a. Chuvângin, Merriam-Webster’s Collegiate Dictionary, 11th Edition sawi dân chuan Protestant mi tih chu “Pathian duhsakna chu rinnaah chauh a innghat a, ringtu zawng zawngte hi rawngbâwltu an nih bâkah, Bible hi thutak lo chhuahna awmchhun a ni tih Kohhran Siamṭhatna (Reformation) pawm a, Pope chu thuneitu ber nia pawm duh lo eng kohhrana mi pawh sawina” tiin a târ lang.

Jehova Thuhretute chuan pope thuneihna chu hnâwlin, Bible dah pawimawh ber mah se, Protestant kohhrante laka an danglamna chu a tamin, a langsâr hle a ni. A dik a dik chuan The Encyclopedia of Religion chuan Jehova Thuhretute chu mi “danglam bîkte” tiin a sawi hial a. An danglamna kawng thum i lo ngaihtuah ang u.

A hmasain, Protestant rinna chuan Catholic biak dân ṭhenkhat chu hnâwl mah se, Kohhran Siamṭhatna hruaitute chuan Catholic thurin ṭhenkhat Trinity te, hremhmun meidîl te, leh mihring thlarau thi thei lo rinnate chu an chhawm tho a ni. Jehova Thuhretute erawh chuan chûng thurinte’n Bible a kalh bâkah, Pathian chungchânga thlîr dân dik lo a awmtîr tih an ring a ni.—He magazine phêk 4-7-na en rawh.

A pahnihnaah chuan, Jehova Thuhretute sakhaw vawn chuan sakhaw dang do hrim hrim a tum lo va; mahse, kaihhruaina ṭha chu a ṭan tlat zâwk a ni. Anni chuan Bible fuihna: “Lalpa bâwih chuan a hnial buai tûr a ni lo va, mi zawng zawng chungah a hawihhâwmin, a zirtîr thiamin, mi dawhthei a ni zâwk tûr a ni. Hnial kalhtute chu thuhnuai rawlh takin zilh rawh,” tih chu an la thutak hle. (2 Timothea 2:24, 25 Mizo Bible, Baptist Mid-Missions’ Translation) Jehova Thuhretute chuan kohhran tam takte zirtîrna leh Bible thu inkalh dân chu an sawi lang ngei mai. Mahse, chutianga an tih chhan chu kohhran dangte siamṭhat an tum vâng a ni lo. An tum ber chu Pathian leh a Thu, Bible hriatna dik nei tûra rilru ṭha pu mi mal tinte ṭanpui hi a ni. (Kolossa 1:9, 10) Mi dangte’n an hnial luih tlat chuan Jehova Thuhretute chuan inhialna sâwt lo chu an pumpelh ṭhîn.—2 Timothea 2:23.

A pathumna chu, kohhran tam taka inṭhen darh Protestant ang lo takin, Jehova Thuhretute chuan khawvêl pum huap inunauna lungrual tak chu an nei a ni. Bible zirtîrna chungchângah pawh Jehova Thuhretute chuan ram 230 chuangah ‘thu thuhmun sawi’ tûra tirhkoh Paula fuihna chu an zâwm a. An zîngah inṭhenna rêng a awm lo. Awm ahnêkin, ‘rilru hmunkhat leh ngaihtuahna hmunkhatin’ an awm zâwk a ni. (1 Korinth 1:10) An unaute nên ‘remna phuarnaah chuan thlarau inpumkhatna chu vawn’ an tum tlat a ni.—Ephesi 4:1-3. (w09-E 11/01)